دەگەنمەن «قىزىل ايماقتاعى» وڭىردە ءالى دە كوروناۆيرۋس ينفەكتسياسىن جۇقتىرۋشىلار قاتارى تولاستاماي تۇر. ماسەلەن, وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ مالىمەتىنە سۇيەنسەك, 26 مامىردا 75 ادامنان قاۋىپتى ۆيرۋستىڭ بەلگىسى تابىلدى. ناۋقاستاردىڭ اراسىندا اتىراۋ قالاسىنان 51 ادام بولسا, تەڭىز كەنىشىندەگى مەردىگەر مەكەمەلەردىڭ 6 جۇمىسشىسى دا بار. سونداي-اق جىلىوي اۋدانىندا 10 تۇرعىن كوروناۆيرۋس ينفەكتسياسىن جۇقتىرىپتى. قۇرمانعازى اۋدانىندا – 4, يندەردە – 1, يساتايدا 3 ادام اتالعان دەرتكە شالدىعىپ وتىر.
«قازىر ءۇي جاعدايىندا 535 ناۋقاس ەمدەلىپ جاتىر. ال مودۋلدىك اۋرۋحانادا – 153, №2 وبلىستىق اۋرۋحانادا – 128, فتيزيوپۋلمونولوگيا ورتالىعىندا – 44, اۋداندارداعى ستاتسيونارلاردا 127 پاتسيەنت حاتتاماعا سايكەس ەم الۋدا. سونداي-اق تەڭىز كەن ورنىنداعى ينفەكتسيالىق ستاتسيوناردا 58 ناۋقاس ەم قابىلداۋ ءۇشىن وقشاۋلاندى», دەپ حابارلادى باسقارمانىڭ ءباسپاسوز قىزمەتى.
ينفەكتسيالىق ستاتسيونارعا جۇكتى ايەلدەر دە ءتۇسىپ جاتىر. سونىڭ ءبىرى بەس بالالى انا نۇرگۇل وڭعارباەۆا ينفەكتسيالىق ستاتسيونارعا جۇكتىلىكتىڭ 35-اپتاسىندا تۇسكەن.
– العاشقىدا اعزامدا السىرەۋ بايقالىپ, دەنەم قاتتى قالتىرادى. ۇرەيگە بوي الدىرماۋ ءۇشىن ءموبيلدى توپتى ۇيگە شاقىرىپ, كوروناۆيرۋس ينفەكتسياسىنا قارسى پتر-سىناماسىن تاپسىردىم. ءۇش كۇن ۇيدە امبۋلاتورلىق ەم قابىلدادىم. ءتورتىنشى كۇنى دەنە قىزۋى 38 گرادۋسقا دەيىن كوتەرىلدى. سودان كەيىن جەدەل جاردەم بريگاداسىن شاقىرۋعا تۋرا كەلدى, – دەيدى ن.وڭعارباەۆا.
ول №2 وبلىستىق اۋرۋحاناداعى ينفەكتسيالىق ستاتسيوناردىڭ بوساندىرۋ زالىندا التىنشى پەرزەنتىن ومىرگە اكەلدى. دارىگەرلەر انا مەن ءسابيدى امان ساقتاپ قالۋ ءۇشىن كەسار تىلىگى ارقىلى وتا جاساعان.
– بۇرىن قاۋىپتى ۆيرۋستىڭ بارىنا سەنبەۋشى ەدىم. اۋرۋحاناعا جاتقان سوڭ باستاپقىدا وتتەگى كونتسەنتراتورىن پايدالانعىم كەلمەدى. بىراق جانساقتاۋ بولىمىنە تۇسكەننەن كەيىن ونىڭ قاجەتتىگىنە كوندىكتىم. مۇندا دارىگەرلەر مەن مەدبيكەلەر تاۋلىك بويى ناۋقاستاردىڭ ومىرىنە اراشا بولىپ جۇرگەنىن كوردىم. ءبىراۋىز جىلى سوزىمەن دە, حاتتامادا كورسەتىلگەن ەمىمەن دە ناۋقاستارعا مەيىرىمىن توككەن اق حالاتتى جانداردىڭ قۇرمەتىنە قىزىمىزدىڭ ەسىمىن مەيىرىم اتادىق, – دەيدى ن.وڭعارباەۆا.
باسقارمانىڭ ءباسپاسوز قىزمەتى ۇسىنعان اقپاراتقا قاراعاندا, ينفەكتسيالىق ستاتسيوناردا جىل باسىنان بەرى 51 ءسابي دۇنيەگە كەلىپتى. قازىر بۇل ستاتسيوناردا بوسانعان 8 ايەل ەمدەلىپ جاتىر. ال 43 انا سابيىمەن بىرگە ۇيىنە شىعارىلعان. سابيلەردىڭ ەشقايسىسىنان كوروناۆيرۋس ينفەكتسياسى انىقتالعان جوق.
ارينە, تاجالدى توقتاتۋدىڭ باستى ءتاسىلى – ۆاكتسينا سالدىرۋ. وسىعان بايلانىستى دەرەكتى تارقاتار بولساق, 26 مامىردا سپۋتنيك V, QazVac جانە Hayat-Vax ۆاكتسينالارىنىڭ ءبىرىنشى كومپونەنتىن جەرگىلىكتى 849 تۇرعىن سالدىرىپتى. ال 1 اقپان مەن 26 مامىر ارالىعىندا ۆاكتسينا سالدىرعاندار سانى 52 354 ادامعا جەتىپ وتىر. ۆاكتسينالاردىڭ ەكىنشى كومپونەنتىن 21 144 ادام العان.
بىراق مۇنى دارىگەرلەر تۇرعىندار بەلسەندىلىگىنىڭ تومەندىگىمەن بايلانىستىرىپ وتىر. سول سەبەپتەن ۆاكتسينا سالدىرۋدىڭ ماڭىزىن تۇسىندىرەتىن ءموبيلدى توپ قۇرىلدى. ونىڭ قۇرامىندا وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆ, ءوڭىردىڭ باس مەملەكەتتىك سانيتار دارىگەرى مادەنيەت تاناۋوۆ, سونداي-اق وبلىستىق ءبىلىم باسقارماسىنىڭ باسشىسى ساتقان ەسەنعاليەۆ بار. بۇل توپ مۇشەلەرى الدىمەن س.مۇقاشەۆ اتىنداعى كوللەدجدىڭ ۇجىمىمەن كەزدەسۋ وتكىزدى.
– اتىراۋ وبلىسىنا 1 اقپان مەن 26 مامىر ارالىعىندا 74 200 دوزا ۆاكتسينا جەتكىزىلدى. اقپاراتتىق-ءتۇسىندىرۋ جۇمىستارىنىڭ ناتيجەسىندە ۆاكتسينا دوزالارىنىڭ تەڭ جارتىسى يگەرىلدى. تۇرعىندار اراسىندا ۆاكتسينا سالدىرۋدىڭ ماڭىزىن ءتۇسىندىرۋ قاجەت. ويتكەنى تۇرعىندار ۆاكتسينالاۋ تۋرالى بارلىق اقپاراتتى ءتيىستى باسقارمالار بسشىلارىنىڭ وزىنەن ەستىگىسى كەلەدى, – دەيدى وبلىستىق دەنساۋلىق ساقتاۋ باسقارماسىنىڭ باسشىسى ا.بايدۋاليەۆ.
