رەسمي مالىمەت بويىنشا, 18 مامىردا قوستاناي قالاسىندا – 15, رۋدنىيدا – 4, ارقالىقتا 3 ادام كورونوۆيرۋس جۇقتىرعان. قالعان اۋدانداردا ءبىردى-ەكىلى ناۋقاستان عانا تىركەلىپ تۇر. جالپى پاندەميا باستالعالى وبلىستا كورونوۆيرۋسپەن اۋىرعان 15 226 ادام تىركەلىپ, 14 542 ناۋقاس ەمدەلىپ شىقتى.
وسى ايدىڭ باسىندا وبلىسقا اراب ەلدەرىندە كەڭ قولدانىسقا يە بولعان قىتايلىق «حايات ۆاك» ۆاكتسيناسى اكەلىنگەن. بۇل ۆاكتسينا مىسىر, ارگەنتينا, پەرۋ, باحرەين, بىرىككەن اراب امىرلىكتەرىندە قولدانىلادى ەكەن. دارىگەرلەر «حايات ۆاكتىڭ» كوپتەگەن ارتىقشىلىعى بار ەكەنىن ايتىپ وتىر. مىسالى, ارى-بەرى تاسىمالداۋعا, ساقتاۋعا قولايلى كورىنەدى. الىستان جەتكەن ۆاكتسينانى قوستانايلىقتار دا بەلسەندى قابىلداي باستادى. ماسەلەن, وبلىس ورتالىعىنداعى №1 ەمحانانىڭ وزىندە عانا 300-گە جۋىق ادام ءدال وسى ۆاكتسينانى ەكتىرگەن. ولاردىڭ قاتارىندا مەديتسينا قىزمەتكەرلەرى دە بار.
– كوروناۆيرۋسپەن ءوزىم دە اۋىردىم. 30 مامىردان 1 ماۋسىمعا دەيىن دەنە قىزۋىم 40 گرادۋستان تومەن تۇسپەي قويدى. 8 كۇن بويى ينفەكتسيالىق اۋرۋحانادا جاتتىم. ارىپتەستەرىمنىڭ كومەگىمەن جانىم ازەر قالدى, جەتىنشى كۇن دەگەندە بارىپ قىزۋىم ورنىنا ءتۇستى. تالداۋ قورىتىندىسى پنەۆمونيا ەكەنىمدى راستادى. بۇل سوزىلمالى اۋرۋ عوي. جۇمىستا جۇرگەندە اۋا ارقىلى جۇقتىرىپ السام كەرەك. ەمدەلىپ شىققان سوڭ, ءبىراز ۋاقىت وتكىزىپ بارىپ وسى ۆاكتسينانىڭ ءبىرىنشى كومپونەنتىن قابىلدادىم. قورقاتىن تۇگى جوق, مەنىڭ ويىمشا, بۇل جاقسى ۆاكتسينا, – دەدى ب.حاليكوۆا.
جالپى, وسى جىلدىڭ سوڭىنا دەيىن ءوڭىر تۇرعىندارىنىڭ 72%-ىن, ياعني 365 مىڭنان استام ادامعا ەكپە جاساۋ جوسپارلاپ وتىر. قازىر وبلىس اۋماعىندا 31 مەديتسينالىق مەكەمەدە ەكپە كابينەتتەرى جۇمىس ىستەپ جاتىر. كەيبىر ءىرى كاسىپورىنداردىڭ جۇمىسشىلارىن ءوندىرىس باسىندا ۆاكتسينالاۋ ءۇشىن كوشپەلى بريگادالار ۇيىمداستىرىلۋدا. الداعى ۋاقىتتا اۋىل تۇرعىندارىن ۆاكتسينالاۋ ماقساتىندا شالعاي ەلدى مەكەندەرگە دە جىلجىمالى مەديتسينالىق كەشەندەر شىعاتىن بولادى.
