قوعام • 13 مامىر، 2021

ماس جۇرگىزۋشى – قاۋىپتى قىلمىسكەر

12 رەت كورسەتىلدى

ماس كۇيىندە كولىك جۇرگىزگەندەرگە زاڭ جازانى قاتايتقانىنا قاراماستان، «اششى سۋ» ءىشىپ الىپ، تەمىر تۇلپار تىزگىندەيتىندەر ايىل جيار ەمەس. بۇعان قوستاناي وبلىسىنىڭ ءتارتىپ ساقشىلارى وتكىزگەن «ماس جۇرگىزۋشى – قىلمىسكەر» اتتى ەكىكۇندىك الدىن الۋ شاراسى دالەل بولا الادى.

وسى ەكى كۇننىڭ ىشىندە پوليتسيا ماس كۇيىندە كولىك ايداعان 29 جۇرگىزۋشىنى ۇستاعان. ولاردىڭ ءبارى زاڭ الدىندا جاۋاپكەرشىلىككە تارتىلىپ، ۇشەۋى كولىك قۇرالىن جۇرگىزۋ قۇقىعىنان ايىرىلدى. وبلىستىق پوليتسيا دەپار­تا­مەنتىنىڭ مالىمەتىنشە، جىل باسىنان بەرى الكوگولدى ىشىمدىك ءىشىپ الىپ كولىك جۇرگىزگەن 286 ادام اكىمشىلىك ايىپپۇل ارقالاعان. ال قىلمىستىق كودەكستىڭ 346-بابى بويىنشا 30 ادام رۇقسات قۇجاتىنسىز جانە ماس كۇيىندە رۋلگە وتىرعانى ءۇشىن قىلمىستىق جازاعا تارتىلىپ وتىر.

مىسالى، 6 ناۋرىزدا قوستا­ناي قالاسىنداعى اباي كوشەسى­نىڭ بويىندا ءتارتىپ ساقشىلارى كولىك جۇرگىزۋ قۇقىعى جوقتىعى­نا قاراماستان، ىشىمدىككە سىلقيا تويىپ الىپ، «ۆاز 2107» ماركالى كولىگىن جۇرگىزىپ كەلە جات­قان ازاماتتى توقتاتقان. كەيىن سوت وتىرىسىندا ءوز كىناسىن تو­لىق مويىنداعان ايىپتالۋشى بۇ­رىن-سوڭدى جۇرگىزۋشى كۋا­لىگىن مۇلدە الماعانىن ايتتى. تاراپتاردىڭ ءسوزى مەن پرو­كۋ­روردىڭ قورىتىندىسىن تىڭ­داپ، ءىستى زەردەلەپ بولعان سوڭ سوت تور­اعاسى ايىپتالۋشىنى اكىمشىلىك قۇقىق بۇزۋشىلىق تۋرالى كودەكستىڭ 608-بابى، 6-تار­­ماعى بويىنشا اكىمشىلىك جاۋاپ­كەرشىلىككە تارتۋ جانە 20 تاۋ­لىككە قاماۋعا الۋ تۋرالى ۇكىم شى­عاردى.

قولىمىزعا تيگەن سوت قاۋلى­لا­رىنىڭ كوبى مازمۇنى جاعىنان ءبىر-بىرىنە ۇقساس بولىپ كەلەدى. ماسەلەن، ناۋرىز ايىندا قوستا­نايداعى «يۋبيلەينىي» شاعىن اۋدانىندا ءتارتىپ ساقشىلارى توق­تاتقان «Lada 21705» ماركالى اۆتوكولىگىنىڭ جۇرگىزۋشىسى دە كولىك تىزگىنىندە ماس كۇيىندە وتىرعان. اكىمشىلىك حاتتامادا ايىپتالۋشىنىڭ ماس كۇيىندە كولىك جۇرگىزگەنى باياندالىپ، ونى دالەلدەيتىن مەديتسينالىق كۋالاندىرۋدىڭ قورىتىندىسى تىركەلگەن. سوت وتىرىسىندا كىنا­سىن موينىنا الىپ، كولىككە قالاي وتىرعانىن، پوليتسيا قاي جەردە توقتاتقانىنا دەيىن تاپىشتەپ ايتىپ بەرگەن ايىپتالۋشىنى سوت كىنالى دەپ تانىپ، 15 تاۋلىككە قاماۋعا الۋ جانە جەتى جىل مەر­زىمگە جۇرگىزۋشى كۋالىگىنەن ايىرۋ تۋرالى شەشىم شىعاردى.

جول ساقشىلارىنىڭ ايتۋىن­شا، بىلتىر وبلىس اۋماعىندا ماس كۇيىندە كولىك جۇرگىزگەن 1285 جۇر­گىزۋشى ۇستالىپتى.

– بىلتىر «اششى سۋ» ۇرتتاپ الىپ كولىك قۇرالىن جۇرگىزگەنى ءۇشىن 1213 ادام سوت ۇكىمىمەن جۇر­­گىزۋشى كۋالىكتەرىنەن ايىرىل­دى. 1049 جۇرگىزۋشىگە قاماۋ تۇرىندەگى جازا قولدانىلدى. سونىمەن قا­تار كولىك جۇرگىزۋگە قۇقىق بە­رەتىن كۋالىگى جوق بولا تۇرا، ماس كۇ­يىندە اۆتوكولىك ايداعان 72 ادام 20-30 تاۋلىككە جابىل­دى. ال ايىپ تۇراعىنا 547 اۆتو­كو­لىك قويىلدى. بىلتىر وبلىس بو­يىنشا 3101 جول-كولىك وقي­عا­سى تىركەلسە، سونىڭ ىشىندە 22 جۇر­­گىزۋشىنىڭ ماس كۇيىندە كو­­لىك باسقارعانى انىقتالدى. ولار­دىڭ كىناسىنەن 2 ادام كوز جۇ­مىپ، 62 جولاۋشى ءارتۇرلى دارە­جەدەگى دەنە جاراقاتتارىن الدى. بىلتىر وبلىس جولدارىندا تىركەلگەن 244 جول اپاتىنان 37 ادام ومىرمەن قوشتاسىپ، 319 جولاۋشى جاراقاتتاندى. جول اپاتىنىڭ باستى سەبەپتەرىنىڭ ءبىرى – جۇرگىزۋشىلەردىڭ كولىك جىل­­­دام­دىعىن شامادان تىس اسىرىپ جىبەرۋى، – دەدى وبلىستىق پد اكىم­شىلىك پوليتسيا باسقارما­سىنىڭ باستىعى اندرەي گريگو­رەۆ­سكي. ونىڭ ايتۋىنشا، سوڭ­عى ەكى جىل ىشىندە ءتارتىپ ساقشىلارى وبلىس جولدارىنداعى قىلمىستىڭ الدىن الۋ شارالارى مەن پاترۋلدىك باقىلاۋدى كۇشەيتكەن. ماسەلەن، تاياۋدا باس­تالعان «ماس جۇرگىزۋشى – قىل­مىسكەر» اكتسياسى بيىل جارتى جىل بويى جالعاساتىن بولادى.

ەستەرىڭىزدە بولسا، بىلتىر قاڭ­­­تار ايىنان باستاپ اكىمشىلىك قۇ­قىق بۇزۋشىلىق تۋرالى كودەكسكە ماس كۇيدە كولىك ايدا­عان جۇر­گىزۋشىلەرگە قاتىستى قول­دا­نى­لاتىن جازانى قاتايتۋ تۋرا­لى وزگەرىس ەنگىزىلدى. قازىرگى زاڭ بو­يىنشا ىشىمدىك ءىشىپ الىپ كو­لىك تىزگىنىنە وتىرعان ادام قا­ۋىپ­تى قىلمىسكەر دەپ تانىلىپ، 7 جىل­عا جۇرگىزۋشى كۋالىگىنەن ايى­رى­لادى. سونداي-اق مۇنداي جۇرگىزۋ­شىلەرگە كەم دەگەندە 5 تاۋ­لىككە قا­ماۋعا الۋ تۇرىندەگى اكىم­شىلىك جازا قاراستىرىلعان.

 

قوستاناي وبلىسى

سوڭعى جاڭالىقتار

دوللار قايتادان قىمباتتادى

قارجى • بۇگىن، 15:00

ۇقساس جاڭالىقتار