«ەلىمىز الەۋمەتتىك-ەكونوميكالىق دامۋدا, حالىقتىڭ ءال-اۋقىتىنىڭ ارتۋىندا ايتارلىقتاي جەتىستىكتەرگە جەتتى. نارىقتىق ەكونوميكا باسىنان باستاپ قۇرىلدى. تۇبەگەيلى رەفورمالار تابىستى جۇرگىزىلدى. بۇل سوڭعى 30 جىلدا ءوسىپ-ونگەن جاس ۇرپاقتىڭ ەسىندە بولماۋى مۇمكىن. دەگەنمەن ءبىزدىڭ ەسىمىزدە. وتكەندى ءبىلىپ, بولاشاققا نىق قاراۋ ءۇشىن وسى نارسەنى جاستارعا ايتىپ, قايتالاپ وتىرۋ – ءبىزدىڭ مىندەتىمىز. وسىنىڭ ارقاسىندا قازاقستان قازىر الەمدە باسەكەگە قابىلەتتى 50 ەلدىڭ جانە ورتاشا تابىسى جوعارى ەلدەر قاتارىنا قوسىلىپ وتىر. تاۋەلسىزدىك جىلدارى حالىقتىڭ جان باسىنا شاققانداعى ىشكى جالپى ءونىم دەڭگەيى 13 ەسە كوتەرىلدى. بۇل – ءبىزدىڭ ورتاق جۇمىسىمىزدىڭ جەمىسى. 1991-1992 جىلدارى كەڭەس وكىمەتى قۇلاعاننان كەيىن ەلىمىزدە 1500 ءوندىرىستىڭ توقتاپ قالعانى ەسىمدە. جۇمىسسىز قالعاندار سانى 2 ملن-عا جەتتى. حالقىمىزدىڭ 47,5 پايىزى كەدەيلىك شەگىنەن تومەن ءومىر ءسۇردى. بۇگىن وسى كورسەتكىش – 10 پايىز. جۇمىسسىزدىق 3 ەسە تومەندەدى. وسى ۋاقىت ارالىعىندا حالىق سانى 2,5 ملن ادامعا ارتتى», دەدى ن.نازارباەۆ.
وتىرىسقا سونداي-اق مەملەكەت باسشىسى قاسىم-جومارت توقاەۆ قاتىسىپ وتىر. كۇن ءتارتىبى «بىرلىكتىڭ, بەيبىتشىلىك پەن كەلىسىمنىڭ 30 جىلى» تاقىرىبىنا ارنالعان.
سەسسيا جۇمىسىنا ونلاين فورماتتا 550-دەن استام ادام قاتىسىپ وتىر. ولاردىڭ قاتارىندا بارلىق وڭىرلەردەن كەلگەن اسسامبلەيا مۇشەلەرى, رەسپۋبليكالىق جانە وڭىرلىك ەتنومادەني بىرلەستىكتەردىڭ توراعالارى, پارلامەنت دەپۋتاتتارى, ورتالىق اتقارۋشى ورگانداردىڭ, ساياسي پارتيالاردىڭ, ءدىني بىرلەستىكتەردىڭ باسشىلارى, ۇەۇ, عىلىمي, شىعارماشىلىق زيالى قاۋىم جانە باق وكىلدەرى بار.
