قاشارلىق كەنشىلەر تاياۋدا تاعى دا ولجالى بولىپ وتىر. بۇل جولى كەنىشتىڭ تەڭىز دەڭگەيىنەن 30 مەتر بيىكتىكتە ورنالاسقان سولتۇستىك-شىعىس بەتكەيىندەگى كەنجاردان الىپ اعاشتىڭ قالدىقتارى تابىلدى.
– اعاشتى ەكسكاۆاتور ءماشينيسى اناتولي بەزبابنىي جۇمىس كەزىندە بايقاپ, بىردەن باسشىلىققا حابارلادى. ناتيجەسىندە, جالپى سالماعى ەكى توننا بولاتىن الىپ اعاشتىڭ بىرنەشە بولشەگىن قازىپ الدىق. ونىڭ ىشىندەگى ەڭ ۇلكەنىنىڭ ۇزىندىعى – 7 مەتر. اعاشتى قازىپ الۋ جۇمىستارىنا جۇك تيەگىش, بۋلدوزەر سياقتى ارنايى تەحنيكا مەن 5 ادام جۇمىلدىرىلدى, – دەيدى «قاشار كەن» اق تاۋ-كەن شەبەرى يۆان گولوۆانوۆ.
گەولوگ ماماندار ەجەلگى اعاشتىڭ شامامەن وسىدان 30-35 ميلليون جىل بۇرىن وسكەنىن ايتىپ وتىر. بۇگىنگە دەيىن ب ۇلىنبەي ساقتالۋىنا ءدىڭىنىڭ تاسقا اينالۋى سەبەپ بولعان. ويتكەنى قۇرامىنىڭ 50 پايىزدان استامى كۆارتس-كاربوناتتى تسەمەنتتەن تۇرادى. تاعى ءبىر تاڭعالارلىعى, كەنىشتى بويلاي قالىڭدىعى جارتى مەتردەن 3 مەترگە دەيىن جەتەتىن كومىر قاباتى تۇزىلگەن. دەمەك ەجەلگى اعاش مەزوزوي فلوراسىنا جاتادى جانە رەليكتىك گينكگو نەمەسە بيىكتىگى 110 مەترگە جەتەتىن الەمدەگى ەڭ بيىك اعاش كيپاريستىك سەكۆويانىڭ قالدىعى بولۋى مۇمكىن.
قازىر جەر قويناۋىنان تابىلعان الىپ اعاش قاشار كەنىشىنە كىرەبەرىستەگى ستەلاعا قويىلدى. كەنىش ماماندارى اعاشتىڭ ءبىر بولىگىن رۋدنىيداعى كاسىپورىن باسقارماسىنىڭ مۋزەيىنە جەتكىزۋدى جوسپارلاپ وتىر.
قوستاناي وبلىسى
