بەس جىگىتىمىز
جەڭىس تۇعىرىنا كوتەرىلدى
پولشادا بەس جىگىتىمىزگە جەڭىس تۇعىرىنا كوتەرىلۋ باقىتى بۇيىرمادى. تۇساۋكەسەر كەزدەسۋىندە نۇرجان امانكەلدى (69 كيلو) رەسەيلىك شەراف اشالاەۆتان ايلاسىن اسىرا المادى. كۋبالىق برايان لەون سالگادو ەراسىل جاقىپبەكوۆتى (81 كيلو) سان سوقتىرىپ كەتسە, كەنجە مۇرات ۇلى (52 كيلو) مەن امانات سابىرعالي (+91 كيلو) ەكىنشى كەزەڭدە ءسۇرىندى. ەكەۋى دە وزبەكستاننىڭ وكىلدەرىنە ەسە جىبەردى. شيرەك فينالدا ءمادي التىنباەۆتىڭ (91 كيلو) اسىعى الشىسىنان تۇسپەدى. قانداسىمىز ۇندىستاندىق ۆيشال گۋپتاعا جول بەردى.
شيرەك فينالدا 56 كيلو سالماقتا سايىسقا تۇسكەن ەربولات سابىر مەن 64 كيلو سالماقتا كۇش سىناسقان سابىرجان اققالىقوۆتىڭ ونەرى كوپشىلىكتى ءسۇيسىندىردى. ەكەۋى دە كۋبا بوكسشىلارىنا قارسى جەكپە-جەكتە وتە ساۋاتتى تاكتيكا ۇستانىپ, كۇمانسىز جەڭىسكە جەتتى. ەربولات سابىر يۆان رودريگەس حورتادان الدەقايدا الىمدى كورىنسە, سابىرجان داريان حاۆەر كاسترونى قاپى قالدىردى. 75 كيلو سالماقتاعى دياس مولجىگىتوۆتىڭ ليتۆالىق الەكساندر تروفيمچۋكتەن مەرەيى ۇستەم بولدى. 49 سالماقتاعى سانجار تاشكەنباي وزبەكستاندىق يبراگيم يسجونوۆتان ايلاسىن اسىرسا, 60 كيلو سالماقتاعى ەلنۇر ءسۇيىنباي برازيليالىق يۋري دوس رەيەستەن باسىم ءتۇستى. وسىلايشا, بەس جىگىتىمىز جارتىلاي فينالدىق مەجەگە جەتتى.
جارتىلاي فينالدا اسا جەڭىل سالماقتاعى سانجار تاشكەنباي العاشقى بولىپ رينگكە كوتەرىلدى. ول ۇندىستاندىق بيشۆاميترا چونگتامنى جەڭدى. كوماندالىق ارىپتەسىنىڭ جەڭىستى جولىن ەربولات سابىر جالعاستىردى. قانداسىمىز ەۋروپا بىرىنشىلىگىنىڭ جەڭىمپازى, رەسەيلىك الەكسەي شەندريككە شاڭ قاپتىرىپ كەتتى. ەلنۇر ءسۇيىنباي دا ەل سەنىمىن اقتادى. ول كولۋمبيالىق دجون وروبيونى جولىنان ىعىستىردى. سابىرجان اققالىقوۆتىڭ دا ايدارىنان جەل ەستى. جالىندى جاس ۇندىستاندىق انكيت نارۆالدى ەش قينالماي ۇتتى. ال دياس مولجىگىتوۆ پەن رەسەيلىك ميحايل ۋسوۆ اراسىنداعى جەكپە-جەك وتە تارتىستى ءوتتى. العاشقى راۋندتا دياس 1:4 ەسەبىمەن ۇتىلعانىمەن, كەلەسى راۋندا قارقىنىن كۇرت كۇشەيتتى – 5:0. باسەكەنىڭ سوڭعى بولىگىندە دياس الىمدى كورىنگەن ەدى. بىراق ادىلدىكتى بەلدەن باسقان تورەشىلەر ەۋروپا بىرىنشىلىگىندە كۇمىس مەدالدى يەلەنگەن رەسەي بوكسشىسىنىڭ قولىن كوتەردى.
جارىستىڭ سوڭعى كۇنى اقتىق ايقاستاردى تاماشالادىق. سانجار تاشكەنباي رەسەيلىك روبەرت باداليانمەن كەزدەستى. ءبىزدىڭ جىگىت بارلىق جاعىنان باسىم بولدى. ەۋروپا چەمپيونى قانشا جانتالاسقانىمەن, تاشكەنباي وعان ادىم اشتىرماي, ۇنەمى وراپ وتىردى. وڭ قولمەن دە, سول قولمەن دە سىلتەگەن سوققىلارى نىساناعا ءدوپ ءتيىپ جاتتى. ناتيجەسىندە, بارلىق تورەشىلەر سانجاردىڭ مىقتىلىعىن مويىندادى.
كوپ كەشىكپەي ەربولات سابىر رينگكە كوتەرىلدى. ول ساچينمەن سايىسقا ءتۇستى. جاسىراتىنى جوق, قانداسىمىزعا قاراعاندا ءۇندىستاننىڭ وكىلى الىمدى كورىندى. ءوزىنىڭ جىلدام ءارى جيناقى قيمىلىنىڭ ارقاسىندا ساچين الەم چەمپيونى اتاندى. ەربولات كۇمىس مەدالدى قاناعات تۇتتى. سول سەكىلدى ەلنۇر ءسۇيىنباي دا ەكىنشى ورىندا قالىپ قويدى. جاپونيالىق رەيكو تسۋتسۋميگە قارسى جەكپە-جەكتە ول بويى مەن قولىنىڭ ۇزىندىعىن ۇتىمدى پايدالانا المادى. قارسىلاسى ءوزىنىڭ ساۋاتتى تاكتيكاسى مەن جانكەشتىلىگىنىڭ ارقاسىندا جەڭىسكە جەتتى.
ال 64 كيلو سالماقتا كۇش سىناسقان سابىرجان اققالىقوۆتىڭ مەرەيى ۇستەم بولدى. ۋكراينالىق بوزوربوي ماتياكۋبوۆپەن ايقاستى باسىنان اياعىنا دەيىن ءبىر دەممەن وتكىزگەن قازاق بوكسشىسى قارسىلاسىن ابدەن تومپەشتەدى. ناتيجەسىندە, تورەشىلەردىڭ بارلىعى دا اققالىقوۆتى جەڭىسكە لايىق دەپ تاپتى. ءسويتىپ سابىرجان دا الەم چەمپيونى اتاندى.
وسىلايشا, قازاقستاننىڭ جاستار قۇراماسى پولشاداعى جارىستى 2 التىن, 2 كۇمىس جانە 1 قولا مەدالمەن قورىتىندىلادى. وسى ناتيجەمەن جالپىكوماندالىق ەسەپتە ەكىنشى ورىندى يەلەندىك. الدىمىزدا – رەسەي بوكسشىلارى. ولار 2 التىن, 3 كۇمىس جانە 2 قولانى ولجالادى. ءۇشىنشى ورىندا – وزبەكستان قۇراماسى. ولار 2 التىن مەن 2 قولانى قورجىنعا سالدى. سونداي-اق ۋكراينا (1 التىن+2 كۇمىس+2 قولا), ءۇندىستان (1+0+3), جاپونيا (1+0+0), كۋبا (1+0+2), پولشا(0+1+0), ارمەنيا (0+1+0) جانە چەرنوگوريانىڭ (0+1+0) بىلعارى قولعاپ شەبەرلەرى ۇزدىك وندىقتىڭ قاتارىنا قوسىلدى. بارلىعى بۇل جارىستا 17 مەملەكەتتىڭ ورەندەرىنە جەڭىس تۇعىرىنا كوتەرىلۋ باقىتى بۇيىردى.
وسىعان دەيىن ۇيىمداستىرىلعان جاستاردىڭ الەم بىرىنشىلىگىندە قازاقستاننىڭ ءانۇرانى ەكى رەتتەن ارتىق شىرقالعان ەمەس. ەڭ ەلەۋلى تابىسقا ءبىز وسىدان جەتى جىل بۇرىن قول جەتكىزگەن ەدىك. 2014 جىلى سوفيادا وتكەن بايراقتى باسەكەدە شالقار ايقىنباي مەن ابىلايحان ءجۇسىپوۆ باس جۇلدەنى ولجالاپ, بارشا قازاق جانكۇيەرلەرىن قۋانتتى. سول جارىستا سۇلتان زاۋىربەك پەن ۆاديم كازاكوۆ اقتىق سىنعا دەيىن القىنباي جەتكەنىمەن, شەشۋشى تۇستا ۇتىلىپ, كۇمىس مەدالدى مويىندارىنا ءىلدى.
بۇرىمدىلارىمىز
بەس جۇلدە الدى
قىزدار اراسىنداعى جارىستا دا بارلىق 10 سالماق دارەجەسى بويىنشا باق سىنادىق. وكىنىشكە قاراي, ارايلىم مارات (48 كيلو), گۇلنار تۇراپباي (51 كيلو), ايشاگۇل ەلەۋباەۆا (54 كيلو), نازەركە سەرىك (57 كيلو) جانە ميلانا ايۋپوۆا (64 كيلو) جارىستى مەرزىمىنەن بۇرىن اياقتادى. ال قالعاندارى جارتىلاي فينالعا دەيىن جەتىپ, جۇلدەلى ورىندار ءۇشىن تالاسۋ مۇمكىندىگىنە يە بولدى. بۇل مەجەدە 60 كيلو سالماقتاعى جۇلدىز شاياحمەتوۆا وزبەكستاندىق ديلفۋزا بەكوۆادان باسىم تۇسسە, 75 كيلو سالماقتاعى دانا ديداي سول ەلدىڭ تاعى ءبىر وكىلى سوحيبا رۋزمەتوۆادان ايلاسىن اسىردى. وسى كەزدەسۋلەردىڭ ەكەۋىندە دە ءبىزدىڭ قىزداردىڭ ۇستەمدىگى ەش كۇمان تۋعىزعان جوق. ال جاسمين قيزاتوۆا (69 كيلو) پولشالىق باربارا مارچينكوۆسكاعا, اسەل ساعاتوۆا (81 كيلو) رەسەيلىك كسەنيا وليفيرەنكوعا جانە ەلدانا ءتالىپوۆا (+91 كيلو) مولدوۆالىق داريا كوزورەزگە جول بەرىپ, قولا مەدالدى قاناعات تۇتتى.
فينالدا قازاقتىڭ قوس قىزى ءۇندىستاننىڭ وكىلدەرىمەن قولعاپ ءتۇيىستىردى. بايراقتى باسەكەگە ۇندىلەردىڭ كەرەمەت دايارلىقپەن كەلگەنى بىردەن بايقالدى. ءۇندى ەلىنىڭ جەتى قىزى شيرەك فينالعا دەيىن جەتىپ, ولاردىڭ بارلىعى دا ءوز قارسىلاستارىنان باسىم بولدى. جارتىلاي فينالدا دا الگى جەتەۋدىڭ جولى بولدى. اقتىق سايىستا دا ۇندىستاندىقتار مەرەيى ۇستەم بولدى. شەشۋشى تۇستا جۇلدىز شاياحمەتوۆا ۆينكاعا, ال دانا ديداي ساناما چانۋ توكچومعا قارسى شىقتى. وكىنىشكە قاراي, جۇلدىز قارسىلاسىنىڭ قارقىندى شابۋىلىنا توتەپ بەرە المادى. ناتيجەسىندە, ۆينكا التىن السا, شاياحمەتوۆا كۇمىس مەدالدى قاناعات تۇتتى. كوپ كەشىكپەي رينگكە دانا كوتەرىلدى. بۇل باسەكە شيەلەنىسكە تولى بولدى. ەكى جاق تا ايانىپ قالعان جوق. دەسەك تە تورەشىلەر جەڭىسكە توكچومدى لايىق دەپ تاپتى.
جالپىكوماندالىق ەسەپتە ءۇندىستان قۇراماسى الدىنا جان سالمادى. ولار جەتى التىندى ولجالاپ, تورتكۇل دۇنيە جانكۇيەرلەرىن تامساندىردى. ەكىنشى ورىنداعى رەسەيدىڭ قورجىنىندا 1 التىن, 2 كۇمىس جانە 1 قولا مەدال بار. 1 التىن, 1 كۇمىس جانە 4 قولانى ەنشىلەگەن وزبەكستاننىڭ وكىلدەرى ءۇشىنشى ساتىعا جايعاستى. ءتورتىنشى جانە بەسىنشى ورىنداردا – تۇركيا (1+0+0) مەن پولشا (0+2+5). ال قازاقستان قۇراماسى التىنشى ساتىعا تابان تىرەدى. پولشاداعى جارىستى ءبىزدىڭ قىزدار 2 كۇمىس جانە 3 قولا مەدالمەن قورىتىندىلادى.
