الەۋمەتتىك جەلىدە ءبىر كوشەدە كوپتەگەن پاترۋلدىك كولىكتىڭ تۇرعان ۆيدەوسى جاريالاندى. كۋاگەرلەردىڭ ايتۋىنشا مۇندا شامامەن 20-عا جۋىق ماشينا كەلگەن.
قالالىق پوليتسيا دەپارتامەنتىنىڭ وكىلدەرى بۇگىن تاڭەرتەڭ ءال-فارابي داڭعىلى مەن ع.مۇستافين كوشەسىنىڭ قيىلىسىندا «Mercedes» كولىگىنىڭ جۇرگىزۋشى قاتتى جىلدامدىقپەن قاۋىپتى مانەۆرلەر جاساعانىن ايتتى.
«جۇرگىزۋشى پوليتسيا قىزمەتكەرلەرىنىڭ كولىكتى توقتاتۋ جونىندەگى ەسكەرتۋىن ەلەمەي, كەرىسىنشە, جىلدامدىقتى قوسا تۇسكەن. وسىعان بايلانىستى ونىڭ سوڭىنا بىرنەشە پوليتسيا كولىگى ءتۇسىپ, كولىكتى قورشاۋعا الىپ, ونىڭ ودان ءارى قوزعالىسىنا جول بەرمەدى. رۋلدە 1992 جىلى تۋعان ازامات بولدى.
ونىمەن قوسا, 2020 جىلى قىركۇيەكتە ماس كۇيىندە كولىك جۇرگىزگەنى ءۇشىن سوت جۇرگىزۋشى كۋالىگىنەن ءبىر جارىم جىلعا ايىرعانى بەلگىلى بولعان. بۇگىن دارىگەرلەر ونىڭ ەسىرتكىگە ماساڭ كۇيدە بولعانىن راستادى.
اتالعان دەرەك بويىنشا قر قىلمىستىق كودەكسىنىڭ 346-بابى بويىنشا سوتقا دەيىنگى تەرگەۋ باستالدى. كۇدىكتى ۇستالىپ, ۋاقىتشا ۇستاۋ يزولياتورىنا قامالدى», دەدى الماتى قالاسى ءىىد تەرگەۋ باسقارماسىنىڭ باستىعى ولجاس ءشارىپوۆ.
سونىمەن قاتار, جەرگىلىكتى پوليتسيا باسقارماسىنىڭ باستىعى ماناپ ساتتاروۆ وعان قاتىستى 15 اكىمشىلىك حاتتاما تولتىرىلعانىن مالىمدەدى.
