ايتۋلى جارىستا قازاقستان قۇراماسىنىڭ قورجىنىنا العاشقى جۇلدەنى سالعان الماتى وبلىسىنىڭ تۋماسى ەلدانا ءتالىپوۆا ەكەنى بارشاعا ءمالىم. اسا اۋىر سالماق دارەجەسىندە كۇش سىناسقان قازاق قىزى شيرەك فينالدىق سايىستا ۋكراينانىڭ وكىلى ۆيكتوريا لەۆچۋكتى ەكىنشى راۋندتا ەسىنەن تاندىرىپ, جارتىلاي فينالعا جولداما الدى. بىراق بۇل مەجەدە ەلدانانىڭ جولى بولمادى. اسا شيەلەنىستى وتكەن باسەكەدە ول مولدوۆا بوكسشىسى داريا كوزورەزگە ەسە جىبەرىپ, قولا مەدالدى قاناعات تۇتتى. دەسەك تە, ءتالىپوۆانىڭ پولشاداعى ونەرى ماماندار تاراپىنان جوعارى باعالاندى.
كەشە ەلدانا ءتالىپوۆانىڭ العاشقى باپكەرى دارحان قابىلانبەكوۆپەن جولىعىپ, ايتۋلى بىلعارى قولعاپ شەبەرى جايىندا ءبىراز ماعلۇمات الدىق. دارحاننىڭ ءوزى دە كەزىندە وسى سپورت تۇرىمەن شۇعىلدانىپ, ازدى-كوپتى تابىستارعا قول جەتكىزگەن ەكەن. سونىمەن قاتار كيكبوكس جانە قويان-قولتىق ايقاستان دا ءتۇرلى جارىستاردا ونەر كورسەتىپ, ءبىراز جارىستا قانجىعاسى مايلانىپتى. قازىرگى كەزدە دارحان ءوزىنىڭ دوسى, قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى داستان سادۋاقاسوۆپەن «دارىن» پروموۋتەرلىك كومپانياسىن قۇرىپ, وتاندىق كاسىپقوي بوكستى دامىتۋعا بارىنشا اتسالىسۋدا. ايتۋلى پروموۋشەننىڭ ۇيىمداستىرۋىمەن جەتىسۋ وڭىرىندە بىرقاتار ءدۇبىرلى دودانىڭ ۇيىمداستىرىلعانىن جانكۇيەرلەر جاقسى بىلەدى.
– مەن بىرەر جىل الماتى وبلىسىنىڭ ىلە اۋدانىندا باپكەر بولىپ ەڭبەك ەتىپ, بوكس ونەرىنە اڭسارى اۋعان جاستاردى جاتتىقتىردىم. سولاردىڭ قاتارىندا ەلدانا ءتالىپوۆا دا بار. مەن ونى «قازتسيكتەگى» ورتا مەكتەپتىڭ سەگىزىنشى سىنىبىندا وقىپ جۇرگەن كەزىندە بايقادىم. ءوز قۇربىلارىنان بويى ەداۋىر ۇزىن قىزعا بىردەن نازارىم اۋىپ, وعان بوكسپەن اينالىسۋ جايىندا ۇسىنىس ايتتىم. الدىمەن ەلدانانىڭ اپاسى جۇپار وماروۆادان رۇقسات سۇراپ, سول كىسىنىڭ اق باتاسىن الدىم. سودان جاتتىعۋ جۇمىستارىنا كىرىسىپ, شاكىرتىمنىڭ شەبەرلىگىن ابدەن شىڭدادىم. ناتيجەسى جامان بولعان جوق. ەلدانا ءوزى قاتىسقان جارىستاردىڭ بارلىعىندا جۇلدەلى ورىنداردى يەلەنىپ, ۇنەمى جەڭىس تۇعىرىنا كوتەرىلدى. مىنە, ەندى جاستار اراسىنداعى الەم بىرىنشىلىگىندە قولا مەدالدى موينىنا ءىلدى. مەن شاكىرتىمە ءدان ريزامىن. الداعى ۋاقىتتا ەلدانانىڭ باعىندىرعان بەلەستەرى بۇدان دا بيىك بولاتىنىنا ءوز باسىم ەش ءشۇبا كەلتىرمەيمىن, – دەپ دارحان قابىلانبەكوۆ اعىنان جارىلدى.
ايتقانداي-اق ەلدانا ءتالىپوۆا قىسقا عانا مەرزىم ارالىعىندا ءوز قۇربىلارىنىڭ الدى بولدى. ورتا مەكتەپتە وقىپ جۇرگەن كەزىنىڭ وزىندە بىرقاتار رەسپۋبليكالىق جانە حالىقارالىق تۋرنيردە اتوي سالدى. ءالى ەسىمىزدە, 2017 جىلى 15 جاستاعى ەلدانا شۆەتسياعا ساپار شەگىپ, «التىن قىزدار» دەپ اتالاتىن ءدۇبىرلى دودادا التىننان القا تاقتى. فينالدىق سايىستا ول يرلانديالىق لورەن لايوندى 90 سەكۋند ارالىعىندا ۇرىپ جىققانى جايىندا سول كەزدە بارلىق گازەتتەر جارىسا جازعان ەدى. سودان كەيىن ۋكراينا, رەسەي جانە تاعى باسقا مەملەكەتتەردە جالاۋى جەلبىرەگەن جارىستاردا ءتالىپوۆا باس جۇلدەنى ولجالادى.
جاسوسپىرىمدەر مەن جاستار بۋىنى اراسىنداعى قازاقستان بىرىنشىلىگىندە قارسىلاس شاق كەلتىرمەگەن ەلدانا ءتالىپوۆا بيىل پولشادا وتكەن الەمدىك دودادا قازاق ەلىنىڭ نامىسىن قورعادى. جاۋاپتى جارىستا ول جانكۇيەرلەر سەنىمىنە سەلكەۋ تۇسىرمەي, ەلگە قولا مەدالمەن ورالدى. ەلدانانىڭ ەندىگى ماقساتى – قازاقستاننىڭ قىزدار قۇراماسى ساپىنا ەنىپ, بايراقتى باسەكەلەردە ەل نامىسىن ابىرويلى قورعاۋ.
