وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى انجەلا بەكسۇلتانوۆانىڭ ايتۋىنشا, مۇنداي كابينەتتەر ەرىكتى تۇردە ۆاكتسينا قابىلداعىسى كەلەتىن تۇرعىندارعا قولايلى جاعداي جاساۋ ءۇشىن جانە ىندەتتىڭ تارالۋ قاۋپىن ازايتۋ ماقساتىندا اشىلىپ وتىر.
– قالا تۇرعىندارى ەمحاناعا بارىپ كەزەك كۇتپەي-اق, وسىندا كەلىپ ۆاكتسينا سالدىرتا الادى. قازىرشە رەسەيدىڭ سپۋتنيك V ۆاكتسيناسىن ەگىپ جاتىرمىز. تاياۋدا قوستانايعا ۆاكتسينانىڭ ءبىرىنشى كومپونەنتىنەن 24 مىڭ, ەكىنشى كومپونەنتىنەن 12 مىڭ دوزا جەتكىزىلدى. ەكپە سالدىرتقىسى كەلەتىن تۇرعىندار ەڭ الدىمەن تىركەۋدەن ءوتىپ, ساۋالداما تولتىرادى. دارىگەردىڭ قاراۋىنان ءوتىپ, ەگۋگە ءوزىنىڭ جازباشا كەلىسىمىن بەرگەننەن كەيىن عانا ۆاكتسينا ەگۋگە جىبەرىلەدى. ۆاكتسينا ەگىلگەن سوڭ جارتى ساعات بويى دارىگەردىڭ باقىلاۋىندا بولادى. ودان كەيىن ۆاكتسينانىڭ ەكىنشى دوزاسىن الۋ ءۇشىن قايدا جانە قاي ۋاقىتتا كەلۋ كەرەكتىگى جازىلعان جادىناما بەرىلەدى.
ەكپە سالدىرۋ ءۇشىن ەلەكتروندى ۇكىمەت پورتالى جانە №3 ەمحانانىڭ رەسمي سايتى ارقىلى كەزەككە تۇرۋعا بولادى. ءسىزدىڭ ءوتىنىشىڭىز قابىلدانعان سوڭ مەديتسينا قىزمەتكەرلەرىنىڭ وزدەرى حابارلاسىپ, ەكپە الۋعا شاقىرادى, – دەدى ا.بەكسۇلتانوۆا.
قوستانايداعى ەڭ ءىرى ساۋدا ورتالىعىندا ورنالاسقان ۆاكتسينا كابينەتى جىل سوڭىنا دەيىن جۇمىس ىستەيتىن بولادى جانە دەمالىس پەن مەرەكە كۇندەرى تۇسكى ءۇزىلىسسىز تاڭعى ساعات 10.00-دەن 20.00-گە دەيىن اشىق تۇرادى.
ا.بەكسۇلتانوۆانىڭ ايتۋىنشا, الداعى ۋاقىتتا قالا ورتالىعىنداعى وبلىستىق فيلارمونيا عيماراتىندا ەكىنشى ۆاكتسينا كابينەتىن اشۋ جوسپارلانىپ وتىر.
قوستاناي وبلىسى
