اتالعان جارىستا قازاقستاننىڭ 10 بالۋانى كۇش سىناسىپ, سولاردىڭ التاۋى جەڭىس تۇعىرىنا كوتەرىلدى. تارقاتىپ ايتساق, جەرلەستەرىمىز 2 التىن, 2 كۇمىس جانە 2 قولا مەدالدى يەلەندى. وسى ناتيجەنىڭ ارقاسىندا ءبىزدىڭ بالۋاندار جالپىكوماندالىق ەسەپتە ەكىنشى ورىنعا تابان تىرەدى. الدىمىزدا –تەك يران قۇراماسى.
وتكەنگە زەر سالساق, 1983-2020 جىلدار ارالىعىندا گرەك-ريم كۇرەسىنەن ازيا چەمپيوناتتارىنىڭ جالاۋى 30 مارتە جەلبىرەگەنىن بايقايمىز. سول ارالىقتا جالپىكوماندالىق ەسەپتە يران قۇراماسى 12 مارتە (1983, 2001, 2007-2009, 2011-2012, 2015-2017, 2019-2020) توپ جارسا, وڭتۇستىك كورەيانىڭ بالۋاندارى 10 رەت (1989, 1991-1993, 1996-97, 2000, 2005, 2010, 2013) قارسىلاس شاق كەلتىرمەپتى. قازاقستاندىقتار التى جارىستا (1995, 2003-2004, 2006, 20014, 2018) الدارىنا جان سالماعان. جاپونيا (1987) مەن وزبەكستاننىڭ (1999) ورەندەرى ءبىر-ءبىر رەتتەن دارا شىعىپتى. مىنە, كوماندالىق سايىستا باس جۇلدەنى ولجالاۋ قۇرمەتىنە نەبارى بەس مەملەكەتتىڭ بالۋاندارى عانا بولەنگەن ەكەن.
بيىلعى سارى قۇرلىقتىڭ باستى دوداسى ءوز ەلىمىزدە ءوتىپ جاتقاندىقتان, قازاقستاندىقتار جالپى ەسەپتە الدىنا جان سالمايتىن شىعار دەپ ۇمىتتەندىك. سەبەبى بۇعان دەيىن دە ازيا چەمپيوناتتارىنىڭ جالاۋى قازاقستاندا ءۇش مارتە جەلبىرەگەنىن جاقسى بىلەمىز. بۇل باسەكەلەر 2004 جانە 2006 جىلدارى الماتىدا جانە 2014 جىلى استانادا ۇيىمداستىرىلدى. ايتۋلى دودالاردىڭ بارلىعىندا وتاندىق گرەك-ريم كۇرەسى شەبەرلەرى كوماندالىق سايىستا ەشكىمگە ەسە جىبەرگەن جوق. جارىس كەستەسىندە ءار كەز جەكە-دارا كوش باستادى. بىراق بۇل جولى ونداي باق بىزگە بۇيىرمادى. الماتىداعى دوداعا يراننىڭ اپايتوستەرى كەرەمەت دايارلىقپەن كەلگەنىن بايقاتتى. پارسى ەلىنىڭ وكىلدەرى 4 التىن, 2 كۇمىس جانە 2 قولانى ولجالاپ, جەكە-دارا كوش باستادى. قازاقستان ەكىنشى ورىندى قاناعات تۇتسا, ءۇشىنشى ساتىعا جاپونيا جايعاستى. كۇنشىعىس ەلىنىڭ بالۋاندارى 2 التىن مەن 4 قولانى قورجىنعا سالدى. سونداي-اق جۇلدەلى ورىنداردى ەنشىلەگەندەر قاتارىندا وڭتۇستىك كورەيا (1 التىن, 1 كۇمىس, 4 قولا), وزبەكستان (1 التىن, 1 كۇمىس, 1 قولا), تاجىكستان (1 كۇمىس), قىرعىزستان (3 كۇمىس, 5 قولا) جانە تايپەي (1 قولا) سىندى ەلدەردىڭ وكىلدەرى بار.
قازاقستاننىڭ بالۋاندارى اراسىندا سۇلتان اسەت ۇلى مەن ايدوس سۇلتانعاليدىڭ اسقان شەبەرلىگىنە ءتانتى بولدىق. 63 كيلو سالماقتا سايىسقا تۇسكەن سۇلتان ءۇشىن بۇل ەرەسەكتەر اراسىنداعى نەبارى ءۇشىنشى جارىس ەدى. بيىل ول ەل چەمپيوناتىندا توپ جارىپ, ريمدە وتكەن حالىقارالىق ءتۋرنيردىڭ اقتىق سىنىنا دەيىن القىنباي جەتتى. الايدا جاراقات الۋىنا بايلانىستى فينالدىق باسەكەگە شىقپاي, كۇمىس مەدالدى موينىنا ءىلدى. جامبىل وبلىسى تۇلەگىنىڭ ازيا چەمپيوناتىنداعى ونەرى تىپتەن كەرەمەت بولدى. جالىندى جاس تايپەيلىك چجۋ چي حۋان, سيريالىق مۇحاممەد فۋاز جانە يراندىق مەيسام ءدالحانيدى ويسىراتا ۇتىپ, باس جۇلدەنى قانجىعاسىنا بايلادى. ءبىر عاجابى, سۇلتان اسەت ۇلى وسى قارسىلاستارىنىڭ بارلىعىن الىپ ۇرىپ, تۋشەگە ءتۇسىردى.
60 كيلو سالماقتا كۇرەسكەن ايدوس سۇلتانعالي – 25 جاستا. ناعىز جالىنداپ تۇرعان شاعى. وسىدان ءۇش جىل بۇرىن ول بۋداپەشتتە وتكەن الەم چەمپيوناتىندا قولا مەدالدى يەلەنىپ, كوپشىلىك نازارىن وزىنە اۋدارعان ەدى. ايدوس الماتىدا دا اتوي سالدى. وڭتۇستىك كورەيانىڭ وكىلى كيم سەۋنگحاك پەن يراكتىق كاررار اباس البەەدحاندى سان سوقتىرعان قانداسىمىز فينالدا يراندىق مەحدي موحسەن نەدجادپەن كۇش سىناستى. بۇل باسەكەنىڭ العاشقى جارتىسى پارسى ەلى وكىلىنىڭ پايداسىنا شەشىلدى – 0:4. ال ۇزىلىستەن كەيىن «قاھارىنا» مىنگەن قانداسىمىز ەكى بىردەي كەسەك ءادىس جاساپ, 8:4 ەسەبىمەن العا شىقتى. نەدجات قانشا تىرىسقانىمەن, قازاق سپورتشىسىن قۋىپ جەتە المادى. بۇل ەسەپ كەزدەسۋدىڭ سوڭىنا دەيىن ساقتالدى. سىر بويىنىڭ سايىپقىرانى ايدوس سۇلتانعالي – ازيا چەمپيونى!
67 كيلو سالماق دارەجەسىندە بەلدەسكەن المات كەبىسباەۆتىڭ دا باس جۇلدەنى ولجالايتىنداي تاماشا مۇمكىندىگى بولدى. باستاپقى باسەكەلەردە وزبەكستاندىق ميرزوبەك راحماتوۆ پەن كورەيالىق كيم دوحەنگتى جانە جارتىلاي فينالدا قىرعىزستاندىق امانتۇر يسمايلوۆتى جولىنان ىعىستىرعان ساقا سپورتشى شەشۋشى تۇستا جاپونيالىق تسۋچيكا شيمويامادامەن شەبەرلىك بايقاستى. باسەكە بارىسىندا قازاق جىگىتى قارسىلاسىنان باقانداي جەتى ۇپاي وزىپ تۇردى. ەندى ءبىر ۇپاي السا, جەڭىس الماتتىڭ ەنشىسىنە جازىلاتىن ەدى. بىراق سىن ساعاتتا المات بىلگەنىنەن جاڭىلىپ, قارسىلاسىنا تىزگىندى ءاپ-ساتتە بەرىپ قويدى. جانۇشىرا العا ۇمتىلعان جاپون جىگىتى بىردەن 12 ۇپاي ولجالاپ, بۇل تارتىستى ءوز پايداسىنا شەشتى. ءسويتىپ قازاق سپورتشىسىنا كۇمىس مەدالدى قاناعات تۇتۋدان باسقا امال قالمادى.
130 كيلو سالماقتاعى ءالىمحان سىزدىقوۆتىڭ الىپتارمەن ايقاسىپ جۇرگەنىنە اسا كوپ ۋاقىت بولا قويعان جوق. سوعان قاراماستان ول ازيا چەمپيوناتىندا ءوزىن جاقسى قىرىنان كورسەتىپ, كۇمىس مەدالدى موينىنا ءىلدى. ول جاپونيالىق سوتا ناكامۋرا مەن كورەيالىق مينجون كيمدى قاپى قالدىرعانىمەن, شەشۋشى تۇستا يراننىڭ الىبى الياقپار يۋسۋپاحمادچاليگە ءالى جەتپەدى.
كەزىندە پاريجدە الەم چەمپيوناتىنىڭ كۇمىس مەدالىن كەۋدەسىندە جارقىراتىپ, بارشا جانكۇيەردىڭ قوشەمەتىنە بولەنگەن دەمەۋ جادىراەۆتىڭ دا الماتىدا باس جۇلدەنى ولجالايتىنىنا كۇمانىمىز بولعان جوق. جارىستى جاپ-جاقسى باستاعان قانداسىمىز جارتىلاي فينالدا ويدا-جوقتا تاجىكستاندىق دالەر رەزازادەگە ەسە جىبەردى. ودان كەيىن ونىڭ تۇرىكمەنستاندىق مۇحاممەدبەردى مامەدوۆتەن مەرەيى ۇستەم بولدى. الايدا جادىراەۆتان ءبىز قولا ەمەس, التىن مەدال كۇتكەنىمىزدى نەسىنە جاسىرايىق. سول سەكىلدى 97 كيلو سالماقتاعى ەرۇلان ىسقاقوۆ تا بۇل جارىستى قولا مەدالمەن قورىتىندىلادى.
ال جانسەرىك سارسەنبيەۆ (55 كيلو), ازات سادىقوۆ (72 كيلو), ەۆگەني پوليۆادوۆ (82 كيلو) جانە نۇرسۇلتان تۇرسىنوۆ (87 كيلو) جەڭىس تۇعىرىنا كوتەرىلە المادى. وسى بالۋانداردىڭ اراسىنان تەك نۇرسۇلتانعا عانا ەش وكپە ايتا المايمىز. ويتكەنى ول جۋىردا عانا الماتىدا وتكەن ليتسەنزيالىق تۋرنيردە كۇرەسىپ, توكيو وليمپياداسىنىڭ جولداماسىنا يەلىك ەتتى. بۇل جارىس ونىڭ كوپ كۇش-قۋاتىن سارقىپ العانى ازيا چەمپيوناتى بارىسىندا انىق بايقالدى. تۇرسىنوۆ قانشا تالپىنسا دا, كوزدەگەن ماقساتىنا قول جەتكىزە المادى.
جالپى, وسى ورايدا ۇلتتىق قۇراما باپكەرلەرىنەن دە اعاتتىق كەتكەنى انىق. كۇنى كەشە عانا ءدۇبىرلى دودادا جانىن سالىپ ايقاسقان بالۋاندى ارادا ءۇش-ءتورت كۇن وتكەننەن كەيىن جارىس جولىنا شىعارماي-اق قويۋعا دا بولاتىن ەدى عوي. بۇل رەتتە ولار نۇرسۇلتاندى دەمالدىرىپ, ونىڭ ورنىنا جاس بۋىن وكىلدەرىنىڭ بىرىنە سەنىم ارتۋى قاجەت ەدى.
