ءبىلىم جانە عىلىم مينيسترلىگىنىڭ مەكتەپكە دەيىنگى جانە ورتا ءبىلىم بەرۋ كوميتەتىنىڭ ءتورايىمى مايرا مەلدەبەكوۆا, «بوبەك» ورتالىعىنىڭ باس ديرەكتورى ەلەنا ساكەنوۆا, ء«اۇدۇي» كەاق پرەزيدەنتىنىڭ مىندەتىن اتقارۋشى يرينا كالاچەۆا جانە «بوبەك» ورتالىعىنا قاراستى وبسەرۆاتوريانىڭ ديرەكتورى رايسيا كۋدياكوۆا العىسوز سويلەدى.
قازاقستان رەسپۋبليكاسىنىڭ عارىشكەرى, اسكەري-اۋە كۇشتەرىنىڭ گەنەرال-مايورى, حالىق قاھارمانى, «قازاقستان عارىش ساپارى» ۇلتتىق كومپانياسى توراعاسىنىڭ ورىنباسارى ايدىن ايىمبەتوۆ 60 جىل بۇرىن «بايقوڭىر» كوسمودرومىنان يۋري گاگارين «ۆوستوك-1» كەمەسىمەن عارىشقا اتتانعانىن ايتتى. «بۇل ەلىمىز ءۇشىن ەرەكشە مەرەكە بولدى. ياعني يۋري گاگارين العاش رەت عارىشقا قازاق جەرىنەن ۇشتى. ول جەر شەگىنەن شىققان تۇڭعىش ادام بولىپ, ادامزات ءۇشىن جاڭا كەزەڭدى اشتى. بۇل كۇن زور گۋمانيستىك ماڭىزعا تولى», دەدى ول.
عارىشتىق قىزمەتتىڭ دامۋى – قازاقستان ءۇشىن باسەكەگە قابىلەتتىلىگى زور جانە ەلىمىزدىڭ قارقىندى يندۋستريالاندىرۋدىڭ مىقتى فاكتورىنىڭ ءبىرى. قازاقستان-2030 جىلعا عارىشتىق قىزمەت كورسەتۋدىڭ دۇنيەجۇزىلىك نارىعىندا ءوز قولدانىس اياسىن كەڭەيتۋى ءتيىس.
ەلەنا ساكەنوۆا رۋحاني-ادامگەرشىلىك ءبىلىم بەرۋ باعدارلاماسىنىڭ اۆتورى سارا نازارباەۆانىڭ باستاماسىمەن 2009 جىلى «بوبەك» ورتالىعىندا بىرەگەي ءبىلىم بەرۋ وبسەرۆاتورياسىنىڭ اشىلعانىن ايتتى. 2010 جىلدان باستاپ سوڭعى 10 جىل ىشىندە «بوبەك» ورتالىعىنىڭ وبسەرۆاتورياسىندا 79 رەسپۋبليكالىق (6 708 قاتىسۋشى) جانە 50 حالىقارالىق (377 قاتىسۋشى) ءىس-شارا ءوتتى. 2 092 قاتىسۋشى رەسپۋبليكالىق شارالاردىڭ, 148 قاتىسۋشى حالىقارالىق ءىس-شارالاردىڭ جۇلدەگەرى اتاندى.
وبسەرۆاتوريانىڭ «بوبەك» ورتالىعىنىڭ قۇرىلىمدىق بولىمشەسى بولىپ, عارىشتىق باعىت بويىنشا ءبىلىم بەرۋ باعدارلامالارىن جۇزەگە اسىراتىنى تۋرالى رايسيا كۋدياكوۆا مالىمدەدى. ول فورۋمعا قاتىسۋشىلاردى تەلەسكوپ, كومپيۋتەرلەر, روبوت-تەحنيكا سياقتى زاماناۋي قۇرىلعىلارمەن جابدىقتالعان وبسەرۆاتوريا قىزمەتىنىڭ نەگىزگى باعىتتارىمەن تانىستىردى. سونىمەن قاتار كوماندالار قۇرامىندا حالىقارالىق استرونوميالىق وليمپيادالارعا, تۋرنيرلەرگە, بايقاۋلار مەن كونفەرەنتسيالارعا قاتىساتىن رەسپۋبليكا مەكتەپتەرىنىڭ وقۋشىلارى وبسەرۆاتوريادا دايىندىقتان وتەتىنى ايتىلدى.
سونداي-اق وسى جيىندا پەدوگوگيكا عىلىمدارىنىڭ دوكتورى, گ.گرەچكو اتىنداعى نيجەگورود پلانەتاريىنىڭ ديرەكتورى گ.مۋرومتسەۆا (رەسەي), استرونوميا جانە استروفيزيكا بويىنشا حالىقارالىق وليمپيادانىڭ ۇيلەستىرۋشىسى ۆ.زاگاينوۆا (كانادا), تاراس شەۆچەنكو اتىنداعى كيەۆ ۇلتتىق ۋنيۆەرسيتەتى فيزيكا فاكۋلتەتىنىڭ ينجەنەرى ا.سيمون (ۋكراينا) جانە تاعى باسقا مامان بايانداما جاسادى.
الماتى
