مەملەكەت باسشىسى قاسىم-جومارت توقاەۆ 2025 جىلعا قاراي وڭىرلەردەگى ەلدى مەكەندەردى سپورت نىساندارىمەن تولىقتاي قامتاماسىز ەتىپ, كەمىندە حالىقتىڭ 35%-ى بۇقارالىق سپورتپەن شۇعىلداناتىنداي دەڭگەيگە جەتكىزۋ مىندەتىن تاپسىرعان بولاتىن. سپورتتىق ينفراقۇرىلىمدى دامىتۋ ماقساتىندا بوي كوتەرگەن جاڭا نىساننىڭ اشىلۋى ەل تاۋەلسىزدىگىنىڭ 30 جىلدىعى مەن ليساكوۆ قالاسىنىڭ 50 جىلدىعىنا ورايلاس كەلىپ وتىر.
تەننيس ورتالىعىنىڭ اشىلۋ راسىمىنە قالا تۇرعىندارى, سپورت ارداگەرلەرى, وبلىستىق سپورت باسقارماسىنىڭ وكىلدەرى مەن وڭىرگە بەلگىلى جاتتىقتىرۋشىلار, سونداي-اق جاس سپورتشىلاردىڭ اتا-انالارى قاتىستى. سالتاناتتى جيىندا ءسوز الىپ, تۇرعىنداردى قۇتتىقتاعان قالا اكىمى المات يسماعۇلوۆ جاڭا سپورت كەشەنى جاستاردى سپورتقا ىنتالاندىرۋعا, بۇقارالىق-كوپشىلىك سپورتتىڭ دامۋىنا, قالا تۇرعىندارىنىڭ سپورتقا دەگەن قۇلشىنىسىن ارتتىرۋعا, جاستاردىڭ بوس ۋاقىتتارىن ءتيىمدى ۇيىمداستىرۋعا, تۇپتەپ كەلگەندە, سالاماتتى قوعام قالىپتاستىرۋعا ۇلكەن سەرپىن بەرەتىنىن, ودان قالدى قالا جاستارىن تەننيس سپورتىنا باۋلىپ, حالىقارالىق ارەنالاردا ەل نامىسىن قورعايتىن ساڭلاق سپورتشىلاردى دايارلاۋعا مۇمكىندىك بەرەتىنىن اتاپ ءوتتى.
جاڭا نىسان كاسىبي سپورتشىلاردى دايارلايتىن زاماناۋي ورتالىق قانا ەمەس, قالا تۇرعىندارى تۇراقتى جاتتىعىپ, دەنساۋلىعىن شىنىقتىراتىن سپورت الاڭىنا اينالماق. قالا باسشىسى سپورتتىق ينفراقۇرىلىمدى دامىتۋ حالىق تىلەگىمەن ساباقتاسىپ جاتقان پرەزيدەنت جولداۋىنىڭ باسىم باعىتتارىنىڭ ءبىرى ەكەنىنە توقتالدى.
– بيىل بۇكىل ەل بولىپ تاۋەلسىزدىگىمىزدىڭ 30 جىلدىعىن اتاپ وتكەلى وتىرمىز. بۇگىندە ءبىزدى بۇكىل الەم كەمەل بولاشاققا نىق قادام باسىپ, قارىشتاپ دامىپ كەلە جاتقان مىقتى مەملەكەت, سپورتتىڭ سان الۋان ءتۇرى دامىعان قۋاتتى ەل دەپ تانيدى. تاۋەلسىزدىگىمىزدىڭ مەرەيتويى ليساكوۆ قالاسىنىڭ 50 جىلدىعىمەن تۇسپا-تۇس كەلىپ وتىر. جارتى عاسىرلىق بەلەستى باعىندىرعان كەنشىلەر قالاسى سوڭعى شيرەك عاسىر كولەمىندە قارقىندى دامىپ كەلەدى. شاھارىمىز كۇننەن كۇنگە كوركەيىپ, جاڭا نىساندار بوي كوتەرىپ جاتىر. بۇگىن ەسىگىن ايقارا اشقان قالامىزداعى تۇڭعىش تەننيس ورتالىعى وسىنىڭ دالەلى. ليساكوۆتا قازىرگى تاڭدا 99 سپورت عيماراتى بار. قالانىڭ بارلىق شاعىن اۋداندارىندا, وكتيابر كەنتىندە جانە كراسنوگور اۋىلىندا تارتان توسەلگەن 14 امبەباپ اشىق سپورت الاڭى, شاعىن فۋتبول, باسكەتبول, ۆولەيبول ويناۋعا ارنالعان جاساندى كوگالدار بار. بۇل سپورت الاڭدارىنا قالانىڭ كەز كەلگەن تۇرعىنى ەركىن كىرىپ, قالاۋىنشا سپورتپەن شۇعىلدانا الادى. جاڭا پايدالانۋعا بەرىلگەن تەننيس ورتالىعىنان زور ءۇمىت كۇتەمىز. بۇگىن بۇل ورتالىقتىڭ تابالدىرىعىن العاش اتتاعان بالعىندار ەرتەڭ بەرىسى وبلىس, ءارىسى رەسپۋبليكاعا, ءتىپتى الەمگە تانىمال تەننيسشى بولىپ شىقپاسىنا كىم كەپىل؟ بۇگىنگى كۇننەن باستاپ قالا تۇرعىندارىنا جايلى كورتتاردا تەننيس ويناپ, ۋاقىت وتكىزۋگە مۇمكىندىك بار. ەلباسى جولداۋىندا بۇقارالىق سپورتتى دامىتۋعا كوڭىل ءبولۋ كەرەكتىگى باسا ايتىلعان. بۇل نىسان سول تاپسىرمانى جۇزەگە اسىرۋ باعىتىندا ورىندالىپ جاتقان كوپ جۇمىستىڭ ءبىرى عانا, – دەدى المات ەرىك ۇلى.
بيىل سونداي-اق تەننيس ورتالىعىنا جاپسارلاس اۋماقتى اباتتاندىرىپ, ول جەرگە مۇمكىندىگى شەكتەۋلىلەرگە ارنالعان دەنە شىنىقتىرۋ ورتالىعىن سالۋ جوسپاردا بار ەكەن. بۇل جوبا پاراليمپياداشى الەكسەي ليپۋتين تاراپىنان تۇسكەن ۇسىنىستان كەيىن قولعا الىنا باستاپتى. الداعى ۋاقىتتا بۇل اۋماقتا 12 كاسىبي ترەناجەر ورناتىلىپ, ساكىلەر, ورىندىقتار قويىلادى. سونداي-اق, الاڭعا جۇمساق تارتان جابىندىسى توسەلىپ, ماڭايىنا اعاش كوشەتتەرى وتىرعىزىلماق. جوبانى جۇزەگە اسىرۋعا 30,5 ملن تەڭگەگە جۋىق قاراجات قاراستىرىلىپ قويعان.
سالتاناتتى شارا بارىسىندا تەننيس جاتتىقتىرۋشىسى كونستانتين مودوگوروۆ پەن ليساكوۆ قالالىق بالالار جانە جاسوسپىرىمدەر مەكتەبىنىڭ جاتتىقتىرۋشى-وقىتۋشىسى پاۆەل سالاماحا جاڭا نىساننىڭ تۇساۋىن كەسكەن سوڭ, كوپشىلىكتىڭ قۋانىشى كوبەيسىن دەگەن نيەتپەن شاشۋ شاشىلدى. ودان كەيىن سپورت نىسانىنىڭ اشىلۋ راسىمىنە قوستاناي قالاسىنان ارنايى كەلگەن وبلىستىق دەنە شىنىقتىرۋ جانە سپورت باسقارماسى باسشىسىنىڭ ورىنباسارى ەلەنا كيرەەۆا مەن سپورت شەبەرى, پرەزيدەنتتىك كوپسايىس جانە شاڭعى جارىسىنان 2021 جىلعى قازاقستان چەمپيونى نيكولاي حريپۋنوۆ قۇتتىقتاۋ تىلەكتەرىن جەتكىزدى.
– ءبىز بۇگىنگىدەي ليساكوۆ تۇرعىندارى ءۇشىن ماڭىزى زور وقيعانىڭ كۋاسى بولعانىمىزعا قۋانىشتىمىز. جاڭا سپورت ورتالىعىندا كاسىبي سپورتشىلار عانا جاتتىعىپ قويمايدى, بۇل – قالا تۇرعىندارىنىڭ بارىنە ورتاق بۇقارالىق كەشەن. قۇتتى بولسىن! – دەدى نيكولاي حريپۋنوۆ.
قالا تۇرعىندارى اسىعا كۇتكەن تەننيس ورتالىعى اشىق دەپ جاريالانعان سوڭ شاراعا قاتىسۋشىلار ەستەلىك سۋرەتكە ءتۇسىپ, ءبىر-ءبىرىن قۇتتىقتاپ, ىزگى تىلەكتەرىن ارناپ جاتتى. ال وبلىس ورتالىعىنان كەلگەن سپورت ماماندارى جابىق كورتتاعى جاس سپورتشىلاردىڭ ويىنىن سىرتتاي تاماشالاپ كورىپ, كەيىن ۇلكەن تەننيس ويناۋدان شەبەرلىك ساباقتارىن وتكىزدى. جاتتىقتىرۋشىلار بالالارعا راكەتكانى قالاي ۇستاپ, قالاي سىلتەۋ كەرەكتىگىن, دوپتى ويىنعا قوسۋ ادىستەرىن, كورتتا ءوزىن-ءوزى قالاي ۇستاۋ كەرەك ەكەندىگىن ءتۇسىندىردى.
– بالالار بۇگىن كورتقا العاش رەت شىعىپ, دوپ ۇرىپ كوردى, قۋانىشتارىندا شەك جوق. ءسوز جوق, بۇل تەننيس ورتالىعى زاماناۋي ۇلگىدە سالىنعان. كەشەن بارلىق حالىقارالىق ستاندارتقا ساي كەلەدى. مۇنداعى جاتتىعۋ ساباقتارى تەگىن جۇرەتىن بولادى. ورتالىقتىڭ مىندەتى – ەڭ ءبىرىنشى كەزەكتە, بالالاردى بەس جاستان باستاپ وقىتۋ جانە رەسپۋبليكالىق تۋرنيرلەرگە قاتىساتىن قالا قۇراماسىن قالىپتاستىرۋ. ءبىز رەسپۋبليكالىق تەننيس فەدەراتسياسىنىڭ باسشىلىعىمەن سويلەستىك. ليساكوۆ – تەننيس ورتالىعىن سالعان العاشقى مونوقالا ەكەنىن ماقتان تۇتامىز. سپورتقا قىزىعۋشى بالالار مەن ولاردىڭ اتا-انالارى ءدان ريزا. ءبىز بۇعان دەيىن دە وسى سپورت تۇرىنەن وڭ كورسەتكىشتەر كورسەتىپ كەلگەن ەدىك. ەندى ودان دا جاقسى ناتيجە كورسەتەمىز دەگەن ۇمىتتەمىز, – دەيدى ليساكوۆ قالالىق بالالار جانە جاسوسپىرىمدەر مەكتەبىنىڭ جاتتىقتىرۋشىسى پاۆەل سالاماحا.
جەرگىلىكتى تەننيس مەكتەبى تاربيەلەنۋشىلەرىنىڭ قۋانىشتى ەكەندەرى ايتپاسا دا تۇسىنىكتى. بۇعان دەيىن تەننيس تالاپتارىنا ساي كەلە قويمايتىن سپورت نىساندارىندا جاتتىعۋ وتكىزىپ كەلگەن بالالار مەن جاسوسپىرىمدەر ەندى ءۇر جاڭا جابىق كەشەندەگى قالىپتى تەمپەراتۋرادا, جۇمساق توسەنىش ۇستىندە جاتتىعاتىن بولادى.
اتالعان سپورت كەشەنىنىڭ قۇرىلىسىنا 312 ملن تەڭگەنىڭ ۇستىندە قارجى جۇمسالدى. تەننيس ورتالىعى قالالىق ستاديوننىڭ جانىندا ورنالاسقان. زاماناۋي ەكى قاباتتى كەشەندە ەكى جابىق كورت, كورەرمەنگە ارنالعان تريبۋنا بار. جوبانىڭ جالپى اۋدانى – 2 مىڭ 16 شارشى مەتر بولادى.
جاڭا سپورت كەشەنىندە كاسىبي جانە اۋەسقوي تەننيسپەن اينالىسۋ ءۇشىن بارلىق جاعداي جاسالعان: ەكى الاڭى بار, جاتتىعۋ زالى, كۇزەت جانە بەينەباقىلاۋ بولمەسى, مەديتسينالىق كابينەت, جاتتىقتىرۋشىلار بولمەسى, سەرۆەرلىك, جەكە جىلۋ پۋنكتى بار. ۇلدار مەن قىزدارعا ارنالعان كيىم اۋىستىراتىن جەكە بولمەلەر مەن ونداعى سانيتارلىق تالاپتاردىڭ ساقتالۋ جايى دا قاراستىرىلعان. مۇنان بولەك, كەلۋشىلەرگە ارنالعان كۇتۋ زالى تاعى بار. وتكەن جىلى تەننيس ورتالىعىنا قاجەتتى جيھاز, سپورت جابدىقتارى, ەدەن جۋ ماشيناسى ساتىپ الىنىپتى.
شاعىن قالادا وبلىستىق, رەسپۋبليكالىق جارىستاردا جوعارى كورسەتكىشتەرگە جەتكەن سپورتشىلار از ەمەس. ماسەلەن, ا.يسماعۇلوۆا بىلتىر سپورت شەبەرى ءنورماتيۆىن ورىنداپ, جاسوسپىرىمدەر اراسىنداعى رەسپۋبليكالىق بىرىنشىلىكتىڭ كۇمىس جۇلدەگەرى اتاندى. ال لەونيد جانە ۆالەري پاپەرتنىيلار ەرەسەكتەر اراسىندا وبلىستىق, رەسپۋبليكالىق جەكە جانە جۇپتىق سايىستاردا جۇلدەلى ورىنداردان كورىنىپ ءجۇر.
تەننيس ورتالىعىنىڭ اشىلعانىنا, اسىرەسە, بالا كەزىنەن ۇلكەن تەننيسپەن اينالىسىپ كەلە جاتقان 17 جاستاعى ليساكوۆ تۇرعىنى ءدامىر تۇرلىبەكوۆ ايرىقشا قۋانىشتى. بۇگىندە وبلىستىڭ بىرنەشە دۇركىن جەڭىمپازى, رەسپۋبليكا چەمپيونى اتانىپ ۇلگەرگەن جاس سپورتشى ەندى حالىقارالىق جارىستاردا توپ جارۋدى كوزدەيدى.
– قازىرگى تەننيس كورتى اشىلىپ ويناۋعا وتە قولايلى. سەبەبى بۇرىنعى ويىن-جاتتىعۋ زالىمىز تار بولدى, ستاندارتقا ساي كەلمەيتىن ءارى ەدەنى تاقتاي ەدى. قازىرگى تەننيس كورتى بارلىق تالاپتارعا جاۋاپ بەرە الادى, جابىندىسى دا كاسىبي دەڭگەيدە توسەلگەن. جاڭا ورتالىقتى بۇرىنعى زالمەن سالىستىرۋعا بولمايدى. اراسى جەر مەن كوكتەي. بارلىق جاعداي جاسالعان. ەندى وسى جەردە ۇنەمى دايىندالىپ, ءوزىمنىڭ شەبەرلىگىمدى ودان ءارى دە شىڭداي تۇسەمىن, – دەدى د.تۇرلىبەكوۆ.
قالاداعى اۋەسقوي سپورتشىلار الدىن الا كەلىسىلگەن كەستە بويىنشا تەننيس ورتالىعىنا تەگىن كىرىپ, وزدەرىنە بەرىلگەن ۋاقىت ارالىعىندا جاتتىعۋ وتكىزە الادى. ال ۇلكەن تەننيس ويناپ كورگىسى كەلەتىن ەرەسەك تۇرعىندار وزدەرىمەن بىرگە تورلى تاياقتارى مەن دوپتارىن الا كەلۋى كەرەك.
قوستاناي وبلىسى,
ليساكوۆ قالاسى
