بىردەن ايتا كەتەيىك, ءدال قازىرگى كەزدە ارگەنتينا قۇراماسى بىزدەر ءۇشىن الىنبايتىن قامال ەمەس. ويتكەنى بۇل ەلدىڭ ءبىر عانا وكىلى «توپ-100» ويىنشىنىڭ ساناتىندا. ول – ناديا پودوروشكا. 24 جاستاعى روساريو قالاسىنىڭ تۋماسى بىلتىر رولان گارروس تۋرنيرىندە ۇزدىك تورتتىكتىڭ قاتارىنا قوسىلىپ, جانكۇيەرلەر نازارىن وزىنە اۋدارعان ەدى. پاريجدەگى دودادا ول بەلگيالىق گرەتە ميننەندى, قازاقستاندىق يۋليا پۋتينتسەۆا مەن چەحيالىق باربورا كرەيچيكوۆانى جانە ۋكراينالىق ەلينا سۆيتولينانى سان سوقتىرىپ, جارتىلاي فينالدا پولشالىق يگا سۆەنتەككە ەسە جىبەردى. سونىمەن قاتار ول 2019 جىلى ليمادا الاۋى تۇتانعان پانامەريكا ويىندارىندا جەڭىمپاز اتاندى. پودوروشكانىڭ ودان باسقا جەڭىپ العان پالەندەي اتاعى جوق. بۇل كۇندەرى تەننيسشى الەمدىك رەيتينگتە 46-ورىندى يەلەنىپ وتىر.
ارگەنتينانىڭ وزگە تەننيسشىلەرىنىڭ ناتيجەلەرى تىپتەن تومەن. ماسەلەن, پاۋلا ورماەچەا نەبارى 282-ورىندى ەنشىلەۋدە. 28 جاستا بولسا دا, «ۇلكەن دۋلىعا» ساناتىنداعى تۋرنيرلەردە ءۇشىنشى اينالىمنان اسىپ كورگەن ەمەس. ال ماريا لۋردەس كارلە (435), ۆيكتوريا بوزيو (437), ەۆگەنيا گانگا (718), جيۋلەتا لارا ەستەيبل (756), مەلاني سولانگە كرىۆوي (804) سەكىلدى ويىنشىلار قالىڭ توپتىڭ اراسىندا ءجۇر. ولاردان پالەندەي قاۋىپ كەلە قويماس دەپ ويلايمىز.
ارگەنتيناعا قاراعاندا قازاقستاندىقتاردىڭ قارقىنى الدەقايدا شيراق. ەلىمىزدىڭ ءبىرىنشى راكەتكاسى ەلەنا رىباكينا WTA تىزىمىندە 23-ورىندى يەلەنۋدە. ال يۋليا پۋتينتسەۆا 31, زارينا دياس 88-ساتىعا جايعاسقان. بۇل ويىنشىلاردىڭ بارلىعى دا ءار جىلدارى كىل مىقتىلار جينالاتىن «ۇلكەن دۋلىعا» ساناتىنداعى تۋرنيرلەردىڭ بەل ورتاسىنا دەيىن جەتكەن. سونىمەن قاتار قوسالقى قۇرامدا اننا دانيلينا (290), گوزال اينيتدينوۆا (469), جىبەك قۇلامباەۆا (619) جانە ياروسلاۆا شۆەدوۆا (738) سياقتى قىزدارىمىز
بار.
ال بيللي دجين كينگ كۋبوگىنىڭ جەڭىمپازدارى جايىندا ايتار بولساق, بۇل جارىستا ەڭ كوپ ولجاعا كەنەلگەن اقش قۇراماسى. امەريكالىقتار 18 مارتە باس جۇلدەنى ولجالاعان. چەحيا 11 رەت توپ جارسا, اۋستراليا جەتى رەت الدىنا جان سالماپتى. سونداي-اق جەڭىمپازدار قاتارىندا يسپانيا (5 رەت), يتاليا (4 رەت), رەسەي (4 رەت), فرانتسيا (3 رەت), گەرمانيا (2 رەت), بەلگيا (1 رەت), سلوۆاكيا (1 رەت) جانە وار (1 رەت) سەكىلدى قۇرامالار بار.
سوڭعى جارىس 2019 جىلى جاسىل قۇرلىقتاعى پەرت قالاسىندا ۇيىمداستىرىلدى. فينالدىق سايىستا اۋستراليا مەن فرانتسيا شەبەرلىك بايقاستى. بۇل تارتىس 3:2 ەسەبىمەن قوناقتاردىڭ پايداسىنا شەشىلدى. جەڭىمپاز كوماندانىڭ ساپىندا كارولين گارسيا, كريستينا ملادەنوۆيچ جانە پولين پارمانتە ونەر كورسەتتى.
