سولاردىڭ ەكەۋى ۇزدىكتەر تىزىمىندە كوش باستاپ تۇر. ولار – بەكزات نۇرداۋلەتوۆ پەن ۆاسيلي لەۆيت. ارينە, وعان ەش تاڭدانبايمىز. سەبەبى 81 جانە 91 كيلو سالماق دارەجەلەرىندە ونەر كورسەتەتىن ەكى وتانداسىمىز بىرەر جىلدان بەرى اسا ءىرى ءدۇبىرلى دودالاردا تولاعاي تابىستارعا قول جەتكىزىپ ءجۇر.
الەم چەمپيونى بەكزات نۇرداۋلەتوۆ پەن وليمپيادانىڭ كۇمىس جۇلدەگەرى ۆاسيلي لەۆيتتەن كەيىنگى ەڭ ۇزدىك ناتيجە قامشىبەك قوڭقاباەۆقا تيەسىلى. الىپتارمەن ايقاسىپ جۇرگەن قازاقتىڭ نار تۇلعالى ازاماتى ەكىنشى ورىندا تۇر. الەم جانە ازيا بىرىنشىلىكتەرىندە كۇمىس مەدالدى ەكى رەت موينىنا ىلگەن قامشىبەكتىڭ الدىن تەك وزبەك باحودير جالولوۆ وراپ تۇر. 75 كيلو سالماقتا كۇش سىناسىپ جۇرگەن بوكسشىلار اراسىندا ءابىلحان امانقۇل ءۇشىنشى ساتىعا جايعاسقان. ونىڭ الەمدىك دودا مەن ازيا ويىندارىنىڭ كۇمىس جۇلدەگەرى دەگەن اتاعى بار. ەسىمدەرى جوعارىدا اتالعان جۋان جۇدىرىقتى جىگىتتەرىمىزدەن بولەك, «توپ-10» بوكسشىنىڭ قاتارىندا زاكىر سافيۋللين (63 كيلو, 4-ورىن), ابىلايحان ءجۇسىپوۆ (69 كيلو, 5-ورىن), تۇرسىنباي قۇلاحمەت (75 كيلو, 6-ورىن), ساكەن بيبوسىنوۆ (52 كيلو, 7-ورىن) جانە قايرات ەراليەۆ (57 كيلو, 10-ورىن) سىندى ساڭلاقتار بار.
بۇگىنگى تاڭدا ايبا مۇشەلىگىندە 195 مەملەكەتتىڭ بارىن ەسكەرسەك, جوعارىداعى كورسەتكىش كوڭىل مارقايتادى دەپ ايتۋعا تولىق نەگىز بار. ويتكەنى كوش باستاپ تۇرعان بوكسشىلاردىڭ سانى جاعىنان قازاقستان مەن وزبەكستان ۇزەڭگى قاعىستىرىپ قاتار كەلەدى. ولاردىڭ دا قوس ءدۇلد ۇلى دارالانىپ تۇر. ياعني قازىرگى كەزدە كورشىلەس ەكى ەل ورەندەرىنىڭ الدىنا تۇسكەن ەشكىم جوق. سونىمەن قاتار ءۇندىستان, كۋبا, يوردانيا جانە ءفيليپپيننىڭ ءبىر-ءبىر وكىلى توپ باسىندا. ەندى سول الەمدىك رەيتينگتىڭ الدىڭعى لەگىندە تۇرعان ساڭلاقتاردىڭ ارقايسىسى جايىندا قىسقاشا ماعلۇمات بەرە كەتەيىك.
52 كيلو سالماق دارەجەسىندە 25 جاستاعى اميت پانگال الدىنا جان سالار ەمەس. ۇندىستاندىق بوكسشى 2018 جىلى دجاكارتادا الاۋى تۇتانعان ازيا ويىندارىندا جارق ەتىپ كوزگە ءتۇستى. ايتۋلى دودادا باس جۇلدەنى ولجالاعان اميت فينالدا ريو وليمپياداسىنىڭ جەڭىمپازى, ۆەل باركەر كۋبوگىنىڭ يەگەرى وزبەكستاندىق حاسانبوي دۋسماتوۆتىڭ ءوزىن سان سوقتىرىپ كەتتى. 2019 جىلى بانگكوكتا قۇرلىق چەمپيونى اتانىپ, ەكاتەرينبۋرگتە وتكەن الەم چەمپيوناتىندا كۇمىس مەدالدى يەلەندى. رەسەيدەگى جارىستىڭ اقتىق سايىسىندا ول وزبەكستاننىڭ تاعى ءبىر وكىلى شاحوبيددين زايروۆقا ەسە جىبەردى. بۇل سالماقتا الجيرلىك مۇحاممەد فليسسي مەن قىتايلىق حۋ تسزيانگۋان ەكىنشى جانە ءۇشىنشى ورىنداردى يەلەنۋدە.
57 كيلو سالماقتا وزبەكستاندىق ميرازيزبەك ءميرزاحاليلوۆتىڭ مەرەيى ۇستەم. 26 جاستاعى فەرعانا بوكس مەكتەبىنىڭ تۇلەگى سوڭعى جىلدارى ءوزى قاتىسقان جارىستاردىڭ بارلىعىندا جەڭىمپاز اتاندى. 2018 جىلى ول ازيا ويىندارىندا جانە 2019 جىلى الەم جانە قۇرلىق بىرىنشىلىكتەرىندە قارسىلاس شاق كەلتىرمەدى. ودان كەيىنگى ساتىلارعا زامبيالىق ەۆەريستو مۋلەنگا مەن كۋبالىق لاسارو الۆارەس جايعاسقان. ءيا, بوستاندىق ارالى وكىلىنىڭ ۇزدىكتەر ساناتىنا قوسىلۋى زاڭدى. ول – الەمنىڭ ءۇش دۇركىن چەمپيونى, وليمپيا ويىندارىنىڭ ەكى دۇركىن قولا جۇلدەگەرى جانە پانامەريكا ويىندارىنىڭ ەكى دۇركىن جەڭىمپازى. ال قارا قۇرلىق وكىلىنە وسىنداي قۇرمەت نە ءۇشىن كورسەتىلگەنى تۇسىنىكسىز.
63 كيلو سالماقتا ەندي كرۋستىڭ شوقتىعى بيىك. 25 جاستاعى كۋبا قابىلانى سوڭعى كەزدەرى قارسى كەلگەندەردى قوعاداي جاپىرۋدا. 2005 جىلدان بەرى ول الەم چەمپيوناتى مەن پانامەريكا ويىندارىن ەكى رەتتەن ۇتتى. ءبىر قىزىعى, سول جارىستاردىڭ فينالىندا كرۋستىڭ جولى ۇنەمى امەريكالىق كەيشون دەۆيسپەن قيىسۋدا. بۇل باسەكەلەردىڭ بارلىعى دا كۋبالىقتىڭ جەڭىسىمەن اياقتالدى. ەكىنشى ورىندا – ەلنۇر ابدۋرايموۆ. ول – وزبەكستاندا تۋىپ-وسكەن قازاقتىڭ ءور مىنەزدى ۇلى. ءۇشىنشى ورىندا – ناميبيالىق يوناس جۋنياس يوناس.
69 كيلو سالماق دارەجەسىندەگى جاعداي تىم قىزىق. الەمدىك رەيتينگتىڭ ۇزدىك ۇشتىگىندەگى ەكى ەسىم كوپشىلىككە مۇلدە تانىس ەمەس. ءبىرىنشى ورىندى يوردانيالىق زەياد ەاسناش ەنشىلەۋدە. ونىڭ قانداي ەرلىك ىستەگەنى, قانداي ءدۇبىرلى جارىستى ۇتقانى بىزگە بەيمالىم. ءۇشىنشى ساتىعا جايعاسقان البەرت ءايسسيدىڭ دە ءومىر جولى جانكۇيەرلەر ءۇشىن جۇمباق. ءارى كەتسە, افريكا قۇرلىعىندا وتكەن دودالاردا دارالانعان بولار. ايتپەسە, ەسىمدەرى اتالعان قوس بوكسشىنىڭ اسا ءىرى جارىستاردا جاسىنداي جارقىلداعان كەزى ەسىمىزدە جوق. ولارعا قاراعاندا ەكىنشى ورىنداعى وزبەكستاندىق بوبو-ۋسمون باتۋروۆتىڭ حالىقارالىق ارەنادا قول جەتكىزگەن تابىسى الدەقايدا قوماقتى.
75 كيلو سالماقتا ەۋمير ءمارسيالدىڭ وزگەلەردەن كوشى ىلگەرى. ءفيليپپيننىڭ 25 جاستاعى وكىلى – 2019 جىلعى الەم چەمپيوناتىنىڭ كۇمىس جۇلدەگەرى. سول جارىستىڭ جارتىلاي فينالىندا ول ءبىزدىڭ تۇرسىنباي قۇلاحمەتتى جولىنان ىعىستىرعانىن كوزىمىز كوردى. ودان بولەك, ءمارسيالدىڭ قورجىنىندا ازيا ويىندارى مەن قۇرلىق بىرىنشىلىگىنىڭ جۇلدەلەرى بار. ەكىنشى جانە ءۇشىنشى ورىنداردى الجيرلىك يونەس نەمۋچي مەن قازاقستاندىق ءابىلحان امانقۇل ءوزارا بولىسۋدە.
81 كيلو سالماقتا 22 جاستاعى قازاقتىڭ ماقتان تۇتار ۇلى, الەم چەمپيونى بەكزات نۇرداۋلەتوۆتىڭ (سۋرەتتە) كوش باستاپ تۇرعانىن جوعارىدا ايتتىق. ەكىنشى ورىندا مىسىرلىق ابدەلراحمان ابدەلگاۆۆاد پەن الجيرلىك مۇحاممەد حومري.
91 كيلو سالماق دارەجەسىندە دە قازاقستاننىڭ بوكسشىسى الەمدىك رەيتينگتە ءبىرىنشى ورىندا تۇر. ول – ريو وليمپياداسىنىڭ كۇمىس جۇلدەگەرى, الەم چەمپيوناتىنىڭ ەكى دۇركىن قولا جۇلدەگەرى, ازيانىڭ ءۇش دۇركىن چەمپيونى 33 جاستاعى ۆاسيلي لەۆيت. ەكىنشى جانە ءۇشىنشى ورىنداردا جاڭا زەلانديانىڭ جامپوزى داۆيد نيكا مەن ماروككونىڭ مىقتىسى يۋنەس باالا تۇر.
+91 كيلو سالماقتا 26 جاستاعى باحودير جالولوۆ الدىنا جان سالار ەمەس. 2005 جىلى دوحاداعى دۇنيەجۇزىلىك دودادا قولا مەدالدى يەلەنگەن وزبەكستاننىڭ الىبى ارادا ءتورت جىل وتكەن سوڭ ەكاتەرينبۋرگتە التىنعا قول سوزدى. ازيا چەمپيوناتىندا ەكى رەت توپ جاردى. كاسىپقويلار اراسىندا سەگىز جەكپە-جەك وتكىزىپ, بارلىق قارسىلاسىن نوكاۋتقا جىبەردى. ەكىنشى ورىنعا قامشىبەك قوڭقاباەۆ تۇراقتاسا, ءۇشىنشى ساتىعا اۋستراليالىق يۋستيس حۋني تابان تىرەپ تۇر.
