وتكەن جىلى پوليتسيا قىزمەتكەرلەرى وتباسىنىڭ ويرانى شىعىپ, بارار جەر, باسار تاۋى قالماعان 11 مىڭنان استام ايەلدى داعدارىس ورتالىقتارىنا ورنالاستىرۋعا ءماجبۇر بولعان. بۇگىندە ەلىمىز بويىنشا مۇنداي ورتالىقتاردىڭ سانى 40-قا جۋىقتاپ قالعان. تۇرمىستىق زورلىق-زومبىلىقتان زارداپ شەككەندەرگە الەۋمەتتىك وڭالتۋ ورتالىقتارىنىڭ 30-ىندا ارنايى باسپانا دا جاساقتالعان.
بريفينگتە ا.ميليۋك سوڭعى 5 جىلدا ايەلدەر قۇقىعىنا قول سۇعاتىن قىلمىستاردىڭ ەكى ەسەگە, ال بالالارعا قاتىستى قىلمىستاردىڭ سانى ۇشتەن بىرگە قىسقارعانىمەن كارانتين جانە قاتاڭ وقشاۋلاۋ كەزىندە تۇرمىستىق زورلىق-زومبىلىقتىڭ تىم شيەلەنىسىپ كەتكەنىن جەتكىزدى.
زورلىقشىلارمەن كۇرەس جۇرگىزۋدە سالدارىنان گورى سەبەبىن انىقتاپ, الدىن الۋدىڭ ءجون ەكەنىن العا تارتقان ءىىم وكىلى وتباسىلىق جانجالداردى بولدىرماۋدىڭ بىرنەشە تەتىكتەرىنە توقتالدى. «ەڭ الدىمەن وتباسى تيراندارىمەن جەكە-جەكە جۇمىس جۇرگىزگەن دۇرىس. قازىرگى تاڭدا ەلىمىزدە قورعانىس ەرەجەسى كوپتەپ قولدانىلىپ ءجۇر. بۇل ەرەجە وتباسىندا زورلىق-زومبىلىق جاساۋعا بەيىم ادامنىڭ قۇرباندارمەن 1 ايعا دەيىن بايلانىسۋىنا تىيىم سالادى. شەكتەۋلەردى بۇزعان قۇقىق بۇزۋشى 5 تاۋلىككە دەيىن قاماققا الىنادى», دەدى سپيكەر.
سونداي-اق سوت تارتىبىمەن وتباسى تيراندارىنا تىيىم سالۋلار مەن شەكتەۋلەردىڭ كەڭەيتىلگەن تىزبەسى كورسەتىلگەن مىنەز-ق ۇلىققا ەرەكشە تالاپتار بەلگىلەنۋى دە مۇمكىن. مۇنداي شەشىمدەر ادەتتە 3 ايدان باستاپ 1 جىلعا دەيىن قولدانىلادى. ماسەلەن, شاڭىراعىنىڭ شىرقىن بۇزىپ جۇرگەن ەركەككە قارۋ ساقتاۋعا, ءتىپتى ۇيدە ىشىمدىك ىشۋگە تىيىم سالىنۋى مۇمكىن. ال جاعداي تىم كۇردەلى بولىپ, ءبىر باسپانا استىندا تۇرۋ مۇمكىن بولماعان جاعدايدا سوت زورلىقشىل وتاعاسىنىڭ باسقا ءۇيى بولسا, پاتەردەن 10 كۇنگە شىعارىپ تاستاۋعا دا قۇقىلى.
ا.ميليۋك وتباسىنداعى زورلىق-زومبىلىقتان زارداپ شەككەن كەز كەلگەن ادام قۇقىق قورعاۋ ورگاندارىنا تاۋلىك بويى جۇمىس ىستەيتىن «102» پوليتسيا تەلەفونى نەمەسە ارنايى ءموبيلدى قوسىمشا ارقىلى حابارلاسا الاتىنىن ەسكەرتتى. بۇدان بولەك, ءىىم وكىلى تۇرمىستىق زورلىق-زومبىلىق فاكتىسى تۋرالى دابىل بەرەتىن قۇپيا ءسوزدى پايدالانا وتىرىپ, پوليتسياعا ۋاقتىلى حابارلاسۋعا مۇمكىندىگى جوق زورلىق-زومبىلىق قۇرباندارىن انىقتاۋ بويىنشا ارنايى الگوريتم ازىرلەنگەنىن دە ايتتى.
مەملەكەت باسشىسى جاقىندا وتكەن ۇلتتىق قوعامدىق سەنىم كەڭەسىنىڭ وتىرىسىندا ايەلدەردى زورلىق-زومبىلىقتان قورعاۋ جونىندەگى ارنايى پوليتسيا ينسپەكتورلارىنىڭ شتات سانىن كوبەيتۋدى ءسوز ەتكەن. ايەلدەردىڭ قۇقىقتارىن قورعاۋدا بۇل ينسپەكتورلاردىڭ الار ورنى ەرەكشە ەكەنى داۋسىز. وسىعان وراي جاقىندا عانا مينيسترلىك ىشكى رەزەرۆتەر ەسەبىنەن ارنايى پوليتسيا ينسپەكتورلارىنىڭ سانىن ەكى ەسەگە ارتتىرىپ, بەلگىلەنگەن ستاندارتقا دەيىن جەتكىزگەن. بۇگىندە ەلىمىزدە 17 مىڭنان استام ادام پوليتسيا ەسەبىندە تۇرسا, ونىڭ 11 مىڭنان استامى وتباسىنىڭ بەرەكەتىن الاتىن زورلىقشىل رەتىندە ءجىتى باقىلاۋعا الىنعان ەكەن. پاندەميا كەزىندە 8 مىڭنان استام ايەل سەنىم تەلەفوندارىنا قوڭىراۋ شالىپ, قۇقىقتىق كومەك سۇراعان. سوڭعى ءبىر جىلدا پوليتسيا قىزمەتكەرلەرى 78 مىڭعا جۋىق قورعاۋ نۇسقاماسىن شىعارسا, وتباسىنىڭ بەرەكەتىن العان 10 مىڭعا جۋىق قۇقىق بۇزۋشىعا سوت ارقىلى ەرەكشە تالاپتار قويىلعان.
