قازاقستاننىڭ تەننيسشىلەرى اراسىنان ايتۋلى جارىستا 23 جاستاعى الەكساندر بۋبليك ءساتتى ونەر كورسەتۋدە. العاشقى كەزەڭدە بوس بولعان ول ەكىنشى جانە ءۇشىنشى اينالىمداردا سەربيالىق لاسلو دجەرە مەن اۋستراليالىق دجەسسي داكۆورتتان ايلاسىن اسىردى.
بۇگىن جەرلەسىمىزدىڭ جولى تەيلور فريتتسپەن قيىستى. الەمدىك رەيتينگتە 32 ورىندا تۇرعان 23 جاستاعى امەريكالىق سايىپقىراننىڭ بۇعان دەيىنگى ەڭ ۇزدىك كورسەتكىشى – رولان گارروس جانە اقش پەن اۋستراليانىڭ اشىق بىرىنشىلىكتەرىندە ءۇشىنشى كەزەڭگە دەيىن جەتۋى. ال بۋبليك ۇزدىكتەر تىزىمىندە ءوز قارسىلاسىنان ون ساتى تومەن تۇر. كوپشىلىك بولجاعانداي قوس قۇرداس اراسىنداعى باسەكە وتە شيەلەنىستى ءوتتى. ءبىرىنشى سەتتە كورەرمەندەر ناعىز «جان الىسىپ, جان بەرىسكەن» ايقاستىڭ كۋاسى بولدى. تاي-برەيككە دەيىن ۇلاسقان تارتىس ءفريتتستىڭ پايداسىنا شەشىلدى. ەسەسىنە ودان كەيىنگە سەتتەردە الەكساندر الدىمدى كورىندى. قورىتىندى ەسەپ – 7:6, 3:6, 4:6. ەندى وتانداسىمىز شيرەك فينالدا الەمنىڭ 31 راكەتكاسى اتانىپ وتىرعان يتاليالىق ياننيك سيننەرمەن كۇش سىناسادى.
ەستەرىڭىزگە سالا كەتەيىك, ماياميدەگى ءتۋرنيردى ياروسلاۆا شۆەدوۆا – ءبىرىنشى, ميحايل كۋكۋشكين, زارينا دياس جانە يۋليا پۋتينتسەۆا – ەكىنشى, ال ەلەنا رىباكينا – ءۇشىنشى اينالىمدا اياقتاعان بولاتىن.
