بۇل جايىندا «برەندتى ۇندى بيرجادا ساتۋعا قارسى» دەگەن تاقىرىپپەن «Egemen Qazaqstan» گازەتىنىڭ بيىل 9 اقپانداعى سانىندا جاريالانعان ماقالادا جان-جاقتى ماسەلە قوزعالعان ەدى. ەستەرىڭىزدە بولسا, ساۋدا جانە ينتەگراتسيا مينيسترلىگى بىلتىر 2021 جىلدىڭ شىلدە ايىنان باستاپ 1-سۇرىپتى ۇندى بيرجالىق تاۋارلاردىڭ ساناتىنا ەنگىزۋ تۋرالى ۇيعارىمعا كەلگەن. ارتىنشا مينيسترلىكتىڭ بۇل شەشىمىنە شەتەلگە ۇن ەكسپورتتاپ وتىرعان ءىرى ديىرمەندەر نارازىلىق ءبىلدىردى. ويتكەنى قازاق ۇنىنىڭ بىردەن-ءبىر باستى يمپورتەرى – اۋعانستان تاراپى بيرجا ساۋداسىنا تەحنيكالىق تۇرعىدان دايىن ەمەس. ال ۇن بيرجا ارقىلى ساۋدالانا باستاسا, قازاقستان ەكسپورتتاعى قوماقتى ۇلەسىنەن ايىرىلىپ قالۋى مۇمكىن.
مەملەكەت باسشىسىنىڭ شەشىمىنە, اسىرەسە بيىل سىرتقا ساۋدالاناتىن ۇن كولەمىن ۇلعايتۋدى كوزدەپ وتىرعان قوستاناي وبلىسىنىڭ ۇن ءوندىرۋشى كاسىپكەرلەرى قاتتى قۋاندى.
– بۇل – ءبىزدىڭ وڭىردەگى عانا ەمەس, جالپى بۇكىل ەلىمىزدەگى ءدۇيىم ديىرمەن كاسىپورىندارى تاعاتسىزدانا كۇتكەن ءسۇيىنشى جاڭالىق. بۇعان دەيىن بۇل ماسەلەنى ءبىز وبلىستىق كاسىپكەرلەر پالاتاسىندا بىرنەشە رەت كوتەرىپ, ۇننىڭ بيرجا ارقىلى ساتىلۋى سالانى توقىراۋعا اكەلەتىنىن ايتقان بولاتىنبىز. ناقتىراق ايتساق, ۇن بيرجا ارقىلى ساتىلا باستاسا, وتاندىق ۇن ەكسپورتى ۇلەسىنىڭ 65 پايىزىن الىپ وتىرعان اۋعانستانعا شىعاتىن جول جابىلادى. ويتكەنى بۇل ەلدە بىزدەگىدەي ەمەس, جاعداي تۇراقسىز, ولار بيرجالىق ساۋدا قاتىناستارىنا دايىن ەمەس. سونىمەن قاتار ءبىرىنشى سۇرىپتى ۇن قازاقستاندىق برەند بولىپ سانالادى. ياعني ءار كاسىپورىننىڭ كوپ جىلدان بەرى قالىپتاسىپ قالعان سەنىمدى كليەنتتەرى بار. تاعى ءبىر ماسەلە, بيرجالىق ساۋدا تالاپتارى بويىنشا ۇندى ساقتاۋ مەرزىمى وتە قىسقا. بۇل – كاسىپكەرلەر ءۇشىن قولايسىز. كاسىپكەرلەر پالاتاسىنىڭ ساراپتاما قورىتىندىسىندا وسىنىڭ ءبارىن ءتىزىپ كورسەتتىك. مەملەكەت باسشىسى جاعدايدى دۇرىس باعامداپ, ماسەلەنى كاسىپكەرلەردىڭ پايداسىنا شەشىپ بەرىپ وتىر. بۇل – ءبىز ءۇشىن ۇلكەن قۋانىش, – دەدى قوستاناي وبلىسى كاسىپكەرلەر پالاتاسىنىڭ ديرەكتورى مۇرات ابەنوۆ.
قوستاناي وبلىسى
