قاناتقاقتى جوبا باس پروكۋراتۋرا جانە ىشكى ىستەر مينيسترلىگىمەن بىرلەسكەن بۇيرىق اياسىندا جۇزەگە اسىرىلىپ كەلەدى. قازىرگى تاڭدا نۇر-سۇلتان, الماتى, شىمكەنت قالالارى, قوستاناي جانە پاۆلودار وبلىستارىندا قىلمىستىق ىستەر بويىنشا ساراپتامالاردىڭ جەكەلەگەن تۇرلەرىن باسەكەلەستىك ورتاعا بەرۋ جۇمىسى اتقارىلۋدا. ادىلەت ءمينيسترىنىڭ حابارلاۋىنشا, بۇگىندە اتالعان جوبا وڭ ناتيجەسىن كورسەتە باستاعان. «اتاپ ايتقاندا, ساراپتاما جۇرگىزۋ مەرزىمى ءبىرشاما قىسقارتىلىپ, ساراپشىلاردىڭ جۇكتەمەسى ازايعانىن بايقاۋعا بولادى. الداعى ۋاقىتتا بۇل باعىتتاعى جۇمىس ساراپتاما تۇرلەرىن كوبەيتىپ, جوباعا قاتىستىرىلاتىن ايماقتاردىڭ سانىن ۇلعايتۋ ارقىلى جالعاسا بەرەدى», دەپ اتاپ ءوتتى م.بەكەتاەۆ.
ادىلەت مينيسترلىگىنىڭ جوعارعى سوتپەن بىرگە قولعا العان تاعى ءبىر قاناتقاقتى جوباسى جەكە سوت ساراپشىلارىنىڭ ازاماتتىق ىستەر بويىنشا باستاپقى سوت-قۇرىلىس, تاۋارتانۋ جانە ەكونوميكالىق ساراپتامالاردى تاعايىنداۋىنا قاتىستى. قازىرگى تاڭدا بۇل بىرلەسكەن جوبا نۇر-سۇلتان جانە الماتى قالالارىنىڭ سوت ساراپتاماسى ينستيتۋتتارىندا جۇزەگە اسىرىلىپ كەلەدى. بۇل باستاما جەكە ساراپشىلاردى تارتۋ ارقىلى سوت ءىسىن جۇرگىزۋ پروتسەسىنە قاتىسۋشىلارعا جەكە ساراپشىلار ينستيتۋتىنىڭ كاسىبي قابىلەتتىلىگىن كورسەتۋگە مۇمكىندىك بەرەدى. ء«بىر جاعىنان بۇل جوبا سوت-ساراپتاما سالاسىندا باسەكەلەستىك ورتانى قالىپتاستىرادى», دەيدى مينيستر.
ول بريفينگ بارىسىندا سوت دارىگەرلەرىنىڭ ەڭبەكاقىلارى 45 پايىزعا وسكەنىن دە ايتىپ ءوتتى. وسى ماقساتقا رەسپۋبليكالىق بيۋدجەتتەن جىل سايىن 500 ملن تەڭگەگە جۋىق قاراجات بولىنەدى ەكەن. بۇل جونىندە:
«قازىرگى تاڭدا مەملەكەت باسشىسىنىڭ تاپسىرماسىنا سايكەس مەديتسينا قىزمەتكەرلەرىنە ەڭبەكاقى تولەۋدى ۇلعايتۋ ماقساتىندا دارىگەرلەردىڭ جالاقىسىن 2023 جىلعا قاراي 2,5 ەسەگە دەيىن ۇلعايتۋ ماسەلەسى پىسىقتالۋدا. قىزمەتكەرلەردىڭ جۇمىس قورىتىندىلارىن فاكتورلىق-بالدىق شكالا بويىنشا باعالاۋ جۇيەسى ەنگىزىلدى», دەپ حابارلادى مينيستر. ەڭبەكاقىنى كەزەڭ-كەزەڭىمەن ارتتىرۋ سوت ساراپتاماسى ورگاندارىنىڭ 1166 مەديتسينا قىزمەتكەرىنە قاتىستى بولادى.
مارات بەكەتاەۆ سوت ساراپتامالارى ورگاندارىنىڭ ماتەريال-
دىق-تەحنيكالىق بازاسىن زامان تالابىنا ساي جاڭارتۋ ماسەلەسىن دە ءسوز ەتتى. ءمينيستردىڭ مالىمدەۋىنشە, بۇگىندە بۇل سالانىڭ تەحنيكالىق قۇرال-جابدىقتارى 70 پايىزعا جاڭالانعان. ۋاقىت تالابىنا ساي قىزمەتتەردى تەحنيكالىق جانە تەحنولوگيالىق جاعىنان تولىق قامتاماسىز ەتىلگەن زاماناۋي عيماراتتاردا ورنالاستىرۋ ماسەلەسىن شەشۋ دە كۇن تارتىبىنەن تۇسكەن ەمەس.
«قازىرگى كەزدە نۇر-سۇلتان جانە الماتى قالالارىندا سوت ساراپتامالارى ينستيتۋتىنىڭ ۇلگىلىك عيماراتىنىڭ قۇرىلىسى جۇرگىزىلۋدە. وتكەن جىلى اتىراۋ قالاسىندا وبلىس اكىمى جاڭا عيمارات سالىپ, ادىلەت مينيسترلىگىنە سوت ساراپتامانىڭ ورنىن اۋىستىرۋ ءۇشىن ءوتىنىش بەردى. بۇل جۇمىس الداعى ۋاقىتتا دا جالعاسادى. 2021-2025 جىلدارى رەسپۋبليكانىڭ تاعى 6 وڭىرىندە: شىمكەنت قالاسى, قاراعاندى, جامبىل, قوستاناي, پاۆلودار جانە شىعىس قازاقستان وبلىستارىندا عيماراتتار سالۋ جوسپاردا بار», دەپ حابارلادى م.بەكەتاەۆ.
بۇدان باسقا, سالانى رەفورمالاۋ اياسىندا تسيفرلاندىرۋ جانە اۆتوماتتاندىرۋ جۇمىستارى قارقىندى جۇرگىزىلۋدە. بۇگىندە ە-Saraptama اقپاراتتىق جۇيەسى تولىقتاي ازىرلەنىپ, ونى «تورەلىك», «ە-قىلمىستىق ءىس» جانە «ە-ليتسەنزيالاۋ» اقپاراتتىق جۇيەلەرىمەن شوعىرلاندىرۋ جۇمىسى جۇرگىزىلۋ ۇستىندە. اتالعان جۇيەنى وسى جىلى پايدالانۋعا بەرۋ جوسپارلانعان.
باسەكەگە قابىلەتتى سوت-ساراپتاما ماماندارىن دايارلاۋ – باستى باسىمدىق بولىپ قالاتىنىن جەتكىزگەن مينيستر دۇنيەجۇزىلىك بانكپەن بىرلەسىپ جۇرگىزىلگەن «قازاقستان رەسپۋبليكاسىندا سوت ساراپتاماسىن كۇشەيتۋ» جوباسى اياسىندا 200-دەن استام ساراپشىنىڭ رەسەي, اقش, ءباا, ۇلىبريتانيا, پولشا, تۇركيادا بىلىكتىلىكتەرىن ارتتىرعانىن ايتىپ ءوتتى. ماسەلەن, «بولاشاق» باعدارلاماسى اياسىندا 55 سوت ساراپشىسى ۇلىبريتانيادا تاعىلىمدامادان وتسە, 16-سى ءالى دە وقۋىن جالعاستىرۋدا.
«ساراپشى كادرلاردى دايارلاۋدىڭ قازاقستاندىق مەكتەبى قالىپتاسىپ كەلەدى. ول ءۇشىن سوت ساراپتاماسى ورتالىعىندا وقۋ ورتالىعى جاساقتالىپ, ونىڭ نەگىزگى فۋنكتسياسى مەملەكەتتىك جانە جەكە سوت ساراپشىلارىن جانە سوت-ساراپتاما قىزمەتىمەن اينالىسقىسى كەلەتىن ادامداردى دايارلاۋ, قايتا دايارلاۋ جانە بىلىكتىلىگىن ارتتىرۋ بولىپ تابىلادى. وقۋ ورتالىعىنىڭ بازاسىندا سوت ساراپشىلارى, قۇقىق قورعاۋ ورگاندارىنىڭ قىزمەتكەرلەرى, سونداي-اق شەتەلدەن كەلگەن ساراپشىلار ءبىلىمىن جەتىلدىرە الادى», دەپ اتاپ ءوتتى ۆەدومستۆو باسشىسى.
ەل تاۋەلسىزدىگىنىڭ وتىز جىلى ىشىندە سوت ساراپتاماسى جۇيەسىن رەفورمالاۋعا ماڭىزدى قادامدار جاسالعانىن اتاپ وتكەن مينيستر بريفينگتە بىرىڭعاي قىزمەت – رەسپۋبليكالىق ساراپشىلار پالاتاسى قۇرىلعانىن دا ايتتى. وسى سالانى دامىتۋ بويىنشا قابىلدانىپ جاتقان ءىس-شارالار سوت-ساراپتاما جۇيەسىنىڭ تاۋەلسىزدىگىن قامتاماسىز ەتىپ, تيىمدىلىگى مەن ناتيجەلىلىگىن ارتتىرۋعا ىقپال ەتەرى انىق.
