جەرگىلىكتى قوعامدىق ۇيىمدار مەن مەكەمەلەر, ونەركاسىپ ورىندارى مەن شارۋاشىلىقتار, ەرىكتىلەر, جەكە كاسىپكەرلەر جۇمىلا كىرىسكەن ىزگىلىك جوباسى بارىسىندا قارتتار مەن كوپ بالالى انالارعا قولداۋ-قۇرمەت, مۇمكىندىگى شەكتەۋلىلەر مەن جەتىمدەرگە قامقورلىق كورسەتىلىپ, ەلدى مەكەندەردىڭ ماڭىنداعى تابيعي سۋ كوزدەرى قار مەن قوقىستان تازارتىلۋدا.
يگى شارانى العاش بولىپ مادەني ۇيىمدار مەن ونەر ۇجىمدارى باستادى. كورىسۋ كۇنى قارساڭىندا وبلىستىق فيلارمونيا ارتىستەرى دارىگەرلەر مەن پوليتسيا قىزمەتكەرلەرىنە, ەرىكتىلەرگە ارناپ العىس كونتسەرتىن وتكىزدى. ودان كەيىن وبلىستىق ىسكەر ايەلدەر قاۋىمداستىعى اۋىر دەرتكە شالدىققان ياسمين قابەنوۆانىڭ ەمىنە قارجىلاي كومەك كورسەتۋ ماقساتىندا «جان جىلۋى» اتتى قايىرىمدىلىق كونتسەرت ۇيىمداستىردى. زارەچنىي اۋىلىندا تۇراتىن ياسمين ميكروتيا جانە اترەزيامەن اۋىرادى. 3 جاسار ءسابيدىڭ بىلتىر ءبىر قۇلاعىنا وتا جاسالعان, ەندى ەكىنشى قۇلاعىن ەمدەتۋگە 6 ميلليون تەڭگەگە جۋىق قارجى كەرەك. اتالمىش شارا بارىسىندا وڭىرگە بەلگىلى كاسىپكەرلەر, دەپۋتاتتار, مەملەكەتتىك قىزمەتشىلەر مەن قوعام بەلسەندىلەرى ساحناعا شىعىپ, ءان ايتىپ, كۇي تارتتى. كونتسەرتتە ونەر كورسەتكەندەر دە, تاماشالاعاندار دا بيلەت ساتىپ الدى. قايىرىمدىلىق بيلەتتەرىنىڭ باعاسى 1000 تەڭگەدەن باستالىپ, 50 مىڭ تەڭگەگە دەيىن باردى. «تەڭىز تامشىدان قۇرالادى دەگەندەي, بارلىق كونتسەرتتەن 2 ملن تەڭگە تۇسكەن. بۇل قارجى ءسابيدىڭ اناسىنىڭ ەسەپشوتىنا اۋدارىلدى.
جاناشىرلىق شارالارىنان جەكەلەگەن كاسىپكەرلەر دە قالىس قالىپ جاتقان جوق. ماسەلەن, جەرگىلىكتى كولىك كومپانياسىنىڭ باسشىسى كوپ بالالى انا – مايرا ەسىمجانوۆانىڭ بانكتىك نەسيەسىن جاۋىپ بەردى. جومارت جۇرەك كاسىپكەر اتى-ءجونىمدى اتاپ كورسەتپەي-اق قويىڭىز دەپ ءوتىندى.
– بەس بالام بار. ءبارى مەكتەپ جاسىندا. جولداسىم – كولىك جۇرگىزۋشى. مەملەكەت قامقورلىعىنان كەندە قالىپ جاتقانىمىز جوق. 14 ناۋرىز كۇنى جولداسىم باستىعىنا كىرىپ: «مەرەكەڭىزبەن! ءبىر جاسىڭىز قۇتتى بولسىن!», – دەپتى. ورىسشا وقىعان كىسى ەدى, تۇسىنبەي قالىپتى. مەرەكەنىڭ ءمانىسىن سۇراعان ەكەن, كۇيەۋىم تاپىشتەپ ءتۇسىندىرىپ بەرىپتى. باستىعىنىڭ رازى بولعانى سونشالىق, ەكەۋى قۇشاقتاسىپ كورىسىپ, تابان استىندا نە كومەك كەرەك دەپ سۇراعان ەكەن, ءبىزدىڭ ۇيدەگى كىسى ء«بارى بار, راحمەت!» دەپ باس تارتىپتى. ءنومىرىمدى كىمنەن العانىن بىلمەيمىن, ارتىنشا ماعان تەلەفون شالىپ تۇر. 2 جىل بۇرىن ءۇيدى جوندەپ الۋ ءۇشىن, نەسيە الىپ ەدىك, سونى ايتتىم. 1 ملن تەڭگەدەن اسار-اسپاس قالىپتى». – «ەشتەمە ويلاماڭىز, ەش ۋايىمداماڭىز» دەدى دە, قارىزىمىزدى سول كۇنى جاۋىپ بەردى, – دەدى كوپ بالالى انا.
ال رۋدنىي مەشىتى تۇرمىسى تومەن وتباسىلارعا الەۋمەتتىك كومەك كورسەتتى. ءۇي-ءۇيدى ارالاپ, ۇلىستىڭ ۇلى كۇنىمەن قۇتتىقتاعان ءدىني قىزمەتكەرلەر 10 وتباسىعا ازىق-ت ۇلىك سەبەتتەرىن تاراتتى.
– باستى ماقسات قايىرىمدىلىققا عانا تىرەلىپ تۇرعان جوق, ءتول مەرەكەمىز ءاز-ناۋرىز قارساڭىندا تۇرعىنداردى قۇتتىقتاي بارىپ, ءبىز وتباسىلىق تاربيەگە قاتىستى اڭگىمە قوزعادىق. ۇل-قىزدىڭ تاربيەسىندە وتباسىنىڭ جىلۋى ماڭىزدى ورىن الادى. قازىرگى قوعامعا مەيىرىمدىلىك, جاناشىرلىق, باۋىرمالدىق دەگەن نارسەلەر اسا قاجەت-اق. بۇل – وتە ماڭىزدى قۇندىلىق, – دەدى قالالىق مەشىتتىڭ باس يمامى بەكتۇرسىن قاجى ۋاليەۆ.
ناۋرىز مەرەكەسى قارساڭىندا قورشاعان ورتاعا جاناشىرلىق بىلدىرۋشىلەر دە ءتۇرلى شارالاردى قولعا الدى. ماسەلەن, ليساكوۆ قالاسى ماڭىندا جەر استىنان اعىپ جاتقان تابيعي اۋىز سۋ كوزى بار. شاعىن قالاداعى جاستار رەسۋرستىق ورتالىعىنىڭ ەرىكتىلەرى «تازا بۇلاق» اكتسياسىن ۇيىمداستىرىپ, بۇلاق كوزىن اشۋ, اينالاسىن تازارتۋ جۇمىستارىن جۇرگىزدى. بەلسەندىلەر قولدارىنا كۇرەك الىپ, بۇلاق اينالاسىن قالىڭ قاردان تازالادى. «بۇل باستاما ەل تاۋەلسىزدىگىنىڭ 30 جىلدىعى اياسىندا ۇلىستىڭ ۇلى كۇنىنە وراي ۇيىمداستىرىلىپ وتىر», دەيدى ەرىكتىلەر.
ساۋاپتى ىستەن قوستاناي وبلىسى اكىمدىگىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسى دا شەت قالمادى. مەكەمە توبىل وزەنىنىڭ ارناسىن تازارتىپ, جاعالاۋلاردى تازارتتى.
– ءبىز بۇل شاراعا ۆولونتەرلاردى دا تارتىپ وتىرمىز. ونداعى ماقساتىمىز – جاس ۇرپاقتى تۋعان جەر تابيعاتىن ايالاپ, تابيعات بايلىعىن, بۇلاق كوزدەرىن قورعاي بىلۋگە, ەلجاندىلىققا تاربيەلەۋ. ءبىز بۇل شارانى جىلدا ناۋرىز كەلگەندە قولعا الامىز. توبىل جاعالاۋىنداعى قامىس پەن بۇتالاردى شاۋىپ, وزەننىڭ ءتۇبىن تەرەڭدەتتىك. وزەن ارناسى كەڭەيسە, سۋدىڭ مول جينالۋىنا سەپتىگىن تيگىزەدى. سۋ اعىنى ۇلعايادى. بۇل وتە ماڭىزدى شارا, – دەدى باسقارما باسشىسىنىڭ ورىنباسارى امانكەلدى يسمايلوۆ.
ناۋرىز مەرەكەسىنە تۇسىندا وبلىستىق اسسامبلەياداعى ەتنو-مادەني بىرلەستىكتەردىڭ دە كوپتەگەن يگى ىستەرگە مۇرىندىق بولىپ, قايىرىمدىلىق شارالارىن جۇزەگە اسىرىپ جاتقانىن ايتا كەتكەن ءجون. ماسەلەن, ۇلتتىق ورتالىقتاردىڭ وكىلدەرى قوساعىنان قولداۋ تاپپاي, تاعدىرى تىعىرىققا تىرەلگەن جالعىز باستى جاس انالار پانالايتىن «انالار ۇيىنە» باردى. جاس بوسانعان ايەلدەر 1 جارىم جىل بويى وسى ۇيدە تۇرىپ, ومىرگە بەيىمدەلەدى. اسسامبلەيا مۇشەلەرى ءۇيدىڭ اۋلاسىنداعى قاردى تازالاپ, مۇندا تۇرىپ جاتقان انالار مەن سابيلەرگە ءتاتتى تاعامدار مەن جورگەك-جايالىقتار, ناۋرىز-بازارلىقتار تارتۋ ەتتى.
قوستاناي وبلىسى
