سالتاناتتى راسىمگە وبلىس اكىمىنىڭ ورىنباسارى باقىت ەسىموۆا, ۋنيۆەرسيتەت رەكتورىنىڭ م.ا. الما دوسجانوۆا, جەرگىلىكتى كاسىپكەر قايرات مايشەۆ, ءبىلىم ورداسىنىڭ عالىمدارى, جۋرناليستيكا كافەدراسىنىڭ ستۋدەنتتەرى مەن ماگيسترانتتارى قاتىستى.
اتالمىش جۋرنال قازاق جانە ورىس تىلدەرىندە شىعىپ تۇرادى جانە الەۋمەتتىك جەلىدە ەلەكتروندى نۇسقاسى جاريالانادى. ۋنيۆەرسيتەت باسشىسى جينالعانداردى قۇتتىقتاپ, جۋرنال رەداكتسياسى مەن اۆتورلارىنىڭ جۇمىسىنا ساتتىلىك تىلەدى.
«جاڭا جۋرنالدىڭ مازمۇنى ءارى قىزىقتى بولۋى ەڭ الدىمەن وزىمىزگە بايلانىستى. الداعى ۋاقىتتا جۋرنالدىڭ ءاربىر سانى شىققان سايىن سىزدەر ۇسىنعان تاقىرىپتار بويىنشا الەۋمەتتىك جەلىدەگى ءوز پاراقشامدا وي-پىكىرىمدى ءبىلدىرىپ وتىرامىن. ۋنيۆەرسيتەت بىلتىر پەداگوگيكا ۋنيۆەرسيتەتىمەن قوسىلعانىن جاقسى بىلەسىزدەر. قازىر بىزدە 7 مىڭنان استام ستۋدەنت ءبىلىم الادى, وقىتۋشىلار مەن قىزمەتكەرلەرىمىزدىڭ سانى ءبىر جارىم مىڭنان اسىپ جىعىلادى. جاڭا جۋرنال شىعارۋ تۋرالى باستاما وسىدان ءبىر جىل بۇرىن كوتەرىلگەن. بۇگىن ءساتى ءتۇسىپ, سىزدەردى باسىلىمنىڭ العاشقى سانىمەن تانىستىرىپ وتىرمىز. ءبىز 25 جىل بويى جۋرناليست مامانداردى دايىنداپ كەلەمىز. بۇگىندە ءبىزدىڭ تۇلەكتەرىمىز ەلىمىزدىڭ كوپتەگەن بۇقارالىق اقپارات قۇرالدارىندا جەمىستى قىزمەت ەتىپ ءجۇر» دەدى ا.دوسجانوۆا.
احاڭ ۋنيۆەرسيتەتىندە العاش جۋرناليستيكا كافەدراسى اشىلعان سوڭ, ءبىر جىلدان كەيىن, ناقتىراق ايتساق, 1997 جىلى بولاشاق جۋرناليستەردىڭ تەوريالىق ءبىلىمىن تاجىريبەمەن ۇشتاستىرۋ ماقساتىندا ء«بىلىم جارىسى» گازەتى شىعا باستادى. ودان كەيىن 2003 جىلى بەلگىلى جۋرناليست بايتۇرسىن ءىلياس اعامىز رەسپۋبليكالىق «قوستاناي – جاس وركەن» جۋرنالىن شىعاردى.
«بۇگىن, مىنە, سول باسىلىمداردىڭ قاتارىنا جاڭا فورماتتاعى, قازىرگى زامانعا لايىقتى «Univer Life» جۋرنالى قوسىلدى. بۇل باسىلىمنىڭ شىعۋىنا نەگىزىنەن جۋرناليستيكا فاكۋلتەتىنىڭ وقىتۋشىلارى مەن ستۋدەنتتەرى, عالىمدارى اتسالىسادى. ءبىز تەك قانا ۋنيۆەرسيتەت جاڭالىقتارىن عانا ەمەس جالپى ءوڭىر تىنىسىن قامتۋدى كوزدەپ وتىرمىز» دەدى جۋرناليستيكا كافەدراسىنىڭ مەڭگەرۋشىسى امانگەلدى شورەنتاەۆ.
ستۋدەنتتەردىڭ جاڭا باسىلىمى جىلىنا ءتورت رەت شىعىپ تۇرادى جانە وقىرماندارعا تەگىن تاراتىلادى. جۋرنالدا ۋنيۆەرسيتەت تىنىسى عانا ەمەس, سونىمەن قاتار وتاندىق عىلىمداعى جاڭالىقتار مەن تۇلەكتەرگە جۇمىس بەرەتىن كاسىپورىندار, وبلىستاعى سۇرانىسقا يە ماماندىقتار تۋرالى مازمۇندى ماتەريالدار جارىق كورەتىن بولادى.
