قىزىلورداداعى كاسىپكەرلەر پالاتاسى وسى سالاداعى ىسكەرلەر اراسىندا ساۋالناما جۇرگىزىپ, ءىستىڭ العا باسۋىنا كەدەرگى بولىپ وتىرعان بىرقاتار ماسەلەنى انىقتادى. پروبلەمانىڭ كوبى پاندەمياعا بايلانىستى شەكتەۋ شارالارىنان تۋىپ وتىر.
– دەگەنمەن, مۇنىڭ ءبىز ءۇشىن ءتيىمدى تۇستارى دا بار. قازىر شەت مەملەكەتتەردىڭ كوبى شەكتەۋ شارالارىن قاتاڭداتۋدا. بۇل بىزگە ىشكى ءتۋريزمدى كوتەرۋگە جاقسى مۇمكىندىك بەرەدى, – دەيدى وبلىستىق كاسىپكەرلەر پالاتاسىنىڭ ديرەكتورى عالىمبەك جاقسىلىقوۆ. – بۇل ءۇشىن, ارينە, شەتەلدىڭ سەرۆيسىنە جەتپەسە دە جۇرت كوڭىلىنەن شىعارداي جاعداي جاساۋىمىز كەرەك. جاسىراتىنى جوق, قولى قالت ەتە قالسا قىزىلوردالىقتار دەمالۋعا كورشى وبلىستارعا كەتىپ جاتادى. بۇل جەردە ولاردى كىنالاۋدىڭ قاجەتى جوق. تەك نەگىزگى پروبلەمانى انىقتاۋ كەرەك. بىزدە ينفراقۇرىلىمدى جەتىلدىرۋ, ناسيحات جۇمىستارىن جانداندىرۋ ءالى جولعا قويىلماي كەلەدى. ءتىپتى 2020-2021 جىلدارعا ءتۋريزمدى دامىتۋعا وبلىستا قارجى قاراستىرىلماعانى دا وسى سالاعا دەگەن كوزقاراسىمىزدى تانىتسا كەرەك.
كاسىپكەرلەر پالاتاسىنىڭ ديرەكتورى وزگە وڭىرلەردەگى جاعدايدى سارالاپ, كورشىلەس شىمكەنت قالاسىندا بىلتىر ءتۋريزمدى دامىتۋعا – 125,7, ال الماتىدا – 51,3, الماتى وبلىسىندا 29,4 ملن تەڭگە بولىنگەنىن اتاپ ءوتتى. بۇل باعىتتاعى مەملەكەتتىك ساتىپ الۋ تۋريزم باسقارمالارى ارقىلى جۇزەگە اسىرىلعان. قاراجاتتىڭ دەنى اقپاراتتىق-يميدجدىك قولداۋ, بەينەروليكتەر مەن جارنامالىق روليكتەر, كادەسىيلار, اتريبۋتتار, پوليگرافيا ونىمدەرىن شىعارۋ, اقپاراتتىق دۇڭگىرشەك ساتىپ الۋ, ەكسكۋرسيالىق قىزمەتتەردى ۇيىمداستىرۋعا جۇمسالىپتى. مۇنان وزگە, جىل باسىنان بەرى شىمكەنت قالاسىندا ءتۋريزمدى ناسيحاتتاۋعا ارنالعان قىزمەتتەرگە مەملەكەتتىك تاپسىرىس جاريالانىپ, بۇل باعىتتا جۇمىس باستالىپ كەتكەن.
سىر ءوڭىرىنىڭ گەوگرافيالىق جاعدايى, كليماتى دا تۋريزمگە قولايلى. تالاي تاريحتى قويناۋىنا جاسىرعان ايماقتاعى مادەني-تاريحي مۇرالار دا سالانى دامىتۋعا سۇرانىپ-اق تۇر. وسى كۇنى رەسپۋبليكالىق تۋريستىك كارتاعا وبلىستان قامىستىباس كولى, جاڭاقورعان شيپاجايى جانە بايقوڭىر تۋريستىك ايماعى ەنىپ وتىر. نيەت بولسا, مۇنداي نىساندار قاتارىن كوبەيتە تۇسۋگە بولادى. پالاتا ديرەكتورى بۇل ۇسىنىستارىن ايماق باسشىلىعىنا دا جەتكىزىپتى.
– ەڭ اۋەلى بيىلعا ارنالعان جۇمىسپەن قامتۋدىڭ جول كارتاسى اياسىندا اتقارىلاتىن جۇمىستار تىزىمىنە تۋريستىك نىسانداردى ينفراقۇرىلىممەن قامتاماسىز ەتۋ جوباسىن قوسۋدى سۇراپ وتىرمىز. بىلتىر وسى باعدارلاما شەڭبەرىندە وبلىس بويىنشا قۇنى 40 ملرد تەڭگە بولاتىن 291 جوبا جۇزەگە اسىرىلىپتى. الايدا ىشىندە تۋريزم ينفراقۇرىلىمىنا قاتىستى بىردە-ءبىر جوبا جوق, – دەيدى ع.جاقسىلىقوۆ.
پالاتا ءتۋريزمدى دامىتۋ ءىس-شارالارىن قارجىلاندىرۋعا جەرگىلىكتى بيۋدجەتتەن قاراجات قاراستىرۋدى, ۇكىمەتتىك ەمەس ۇيىمداردى تارتا وتىرىپ, مەملەكەتتىك الەۋمەتتىك تاپسىرىس ارقىلى سالانى دامىتاتىن جوبالاردى جۇزەگە اسىرۋدى, «قىزىلوردا» وڭىرلىك ينۆەستيتسيالىق ورتالىعى ارقىلى جوبالاردى نەسيەلەندىرۋگە ارنايى قاراجات ءبولۋدى ۇسىنىپ وتىر.
كاسىپكەرلەر اراسىندا وبلىس ورتالىعى ماڭىنداعى ساياجايلاردا, كولدەر جاعالاۋىندا دەمالىس ايماقتارىن اشۋعا تالاپ قىلعاندار از ەمەس. بىراق كوپشىلىگى تاڭداعان جەرىنىڭ ورنالاسۋىنا بايلانىستى نەسيە الا الماي وتىر. ال پالاتا ۇسىنىسى جۇزەگە اسىپ جاتسا, ەڭ الدىمەن, وسىلاردىڭ ءىسى العا باسپاق.
قىزىلوردا وبلىسى
