ايماقتار • 16 ناۋرىز، 2021

ەلدى ەلگە، جولدى جولعا جالعاعان

135 رەت كورسەتىلدى

ءبىر جۇرگەن جان ازابىن وڭايلىقپەن ۇمىتا قويمايتىن «قىزىلوردا – جەزقازعان» جولى ەلىمىزدىڭ وڭتۇستىك ايماقتارىن ورتالىقپەن بايلانىستىرىپ تۇرعان ۇلى سوراپ. رەسپۋبليكالىق ماڭىزى بار تراسسا دەگەن اتى عانا، كوپ جىلدان بەرى جوندەۋ كورمەگەن جولدىڭ كەيبىر ۇزىكتەرىندە ەرتەدە توسەلگەن اسفالتتىڭ جۇقاناسى عانا قالعان. جەزقازعانعا دەيىنگى 400 شاقىرىمنىڭ ءار بۇرىلىسىن جاتتاپ العان جۇرگىزۋشىلەردىڭ ايتۋىنشا، كۇرە جولدىڭ قىزىلوردا وبلىسىنا قاراستى بولىگىنىڭ جاعدايى جامان ەمەس. ال 120 شاقىرىمدىق اۋماققا ءتىپتى قيىرشىق تاس تا توسەلمەگەن، كوكتەم مەن كۇزدە جول تابانى مي باتپاققا اينالىپ شىعا كەلەدى.

ەل ەكونوميكاسىنداعى ماڭىزى جوعارى جول وسىدان جارتى عاسىر بۇرىن تۇسكەن. سەكسەنىنشى جىلدارى قىزىلوردا بولىگىندەگى 127 شاقىرىمعا ماڭعىستاۋ وڭىرىنەن اكەلىنگەن بيتۋم توسەلدى. بىراق سودان بەرى تالاي مارتە ماسەلە رەتىندە كوتەرىلگەنىمەن دە، اگرارلى ايماق پەن مىستى ءوڭىردى جالعاعان جول ەلەۋسىز قالىپ كەلدى. سوعان قاراماستان، مىڭداعان كولىك جۇرگىزۋشى وسى باعىتپەن جۇرگەندى دۇرىس كورەدى. شۋ باعىتىنا قاراعاندا بۇل جول قىزىلوردا مەن نۇر-سۇلتاننىڭ اراسىن 700 شاقىرىمعا جاقىنداتا تۇسەدى. سوندىقتان قىستىڭ كۇندەرى بۇل جولمەن جولاۋشى تاسىمالداعاندار جۇرسە، كۇن جىلىنا وڭتۇستىكتەن ورتالىققا اۋىل شارۋاشىلىعى مەن باقشا ونىمدەرىن، قۇرىلىس ماتەريالدارىن تاسىعان كولىكتەر كەرۋەنى جولعا شىعادى. مامانداردىڭ ايتۋىنشا، كۇرە جولمەن تاۋلىگىنە 1 مىڭنان استام كولىك قاتىنايدى.

سىردىڭ باس قالاسى مەن كەنشىلەر شاھارىنىڭ ارالىعى «قىزىلوردا – پاۆلودار – ۋسپەنكا – رف شەكاراسى» دەپ اتالاتىن كۇرە جولدىڭ ءبىر بولىگى. وسىعان دەيىن جىل ارالاتىپ «جوندەۋگە قارجى بولىنەتىن بولدى» دەگەن جاقسى حابار دۇركىن-دۇركىن ەستىلگەنىمەن، كۇرە جول كەيپى وزگەرە قويعان جوق. كولىگى بۇزىلىپ جولدا قالعانداردى قينايتىنى – ۇيالى بايلانىستىڭ جوقتىعى. جولاي وتكەن بىرەۋ جاردەم بەرمەسە، ەسكى جىرداعى ەر تولەگەنگە ۇقساپ اسپانداپ ۇشقان التى قازدان سالەم ايتۋدان باسقا امال جوق. بۇل قۇتقارۋشىلار ءۇشىن دە قيىن ءتيىپ وتىر.

 – بىزگە كوبىنە جولدا قالعان كولىكتەر جايلى حاباردى جۇرگىزۋشىلەر جەتكىزەدى، – دەيدى قىزىلوردا وبلىستىق تجد باستىعىنىڭ ورىنباسارى، پولكوۆنيك سايد مولداقاراەۆ. – ەگەر بايلانىس بولسا، جولاۋشىنىڭ قانداي جاعدايعا دۋشار بولعانى تەز انىقتالار ەدى. جولدا قالعاندارعا كومەك كورسەتۋدە ۋاقىتتان دا ۇتىلماس ەدىك.

جولداعى مەديتسينالىق قۇتقارۋ پۋنكتتەرىنىڭ جوقتىعى دا وقىس جاعدايعا ۇشىراعاندارعا جەدەل كومەك كورسەتۋگە قولبايلاۋ بولىپ وتىر. مامانداردىڭ دەرەگىنشە، قىزىلوردا مەن جەزقازعان اراسىندا 2018 جىلى 2 جول-كولىك وقيعاسى بولىپ، 2 ادام زارداپ شەككەن، 2019 جىلى ەكى اپاتتان ءبىر جولاۋشى قايتىس بولىپ، ەكەۋى جاراقات العان. بىلتىرعى 3 وقيعادان 4 ادام زارداپ شەگىپ وتىر. جالپى، «قىزىلوردا – پاۆلودار – ۋسپەنكا – رف شەكاراسى» بويىندا سوڭعى 5 جىلدا جۇزدەگەن اپات بولعان.

ءسوز باسىندا ايتتىق، جولدىڭ قىزىلوردا وبلىسىنا قاراستى بولىگىنىڭ جاعدايى جاقسى. 127 شاقىرىمىندا اسفالت بار، قالعان 60 شاقىرىمىنا قيىرشىق تاس توسەلگەن. «قازاۆتوجول» ۇك» اق وبلىستىق فيليالى ماماندارى وسى اۋماقتى ءىشىنارا جوندەپ، قوقىس پەن قاردان تازارتىپ، جول بەلگىلەرىن ورناتىپ، كۇتىپ ۇستاپ وتىر.

جۋىردا فيليال ۇجىمى ۇزاق جىلدان بەرى ايتىلىپ كەلە جاتقان ماسەلەنىڭ شەشىمى جاقىن قالعانىن حابارلادى. فيليال ديرەكتورىنىڭ ورىنباسارى شانجارحان مىرزاباي «قىزىلوردا – پاۆلودار – ۋسپەنكو – رف شەكاراسى» اۆتوموبيل جولىنىڭ قىزىلوردا – جەزقازعان بولىگىندەگى 12-215 شاقىرىمى ارالىعىن قايتا جاڭعىرتۋدىڭ جوبالىق-سمەتالىق قۇجاتتارى دايىندالعانىن ايتىپ وتىر.

«قازجولجوبا» مەن «سەمجولجوبا» جاۋاپكەرشىلىگى شەكتەۋلى سەرىكتەستىكتەرى جوبالاعان جۇمىستار اياسىندا بۇرىن وبلىستا قوعامدىق تىڭداۋلار وتكىزىلگەن. ماماندار ۇسىنىسى مەن تۇرعىنداردىڭ پىكىر-پايىمى ەكشەلگەن جوبا بويىنشا جولدىڭ ەنى ۇزارىپ، 9 مەترگە جەتەدى.

– سونىمەن قاتار، قىزىلوردا قالاسىنا تولىعىمەن جارىقتاندىرىلعان اينالما جول سالىپ، «قىزىلوردا – جەزقازعان» كۇرە جولىنىڭ ۇزىندىعى 204 شاقىرىمدىق قايتا جاڭعىرتىلاتىن بولىگىندە اۋىل شارۋاشىلىعى تەحنيكالارى مەن ءۇي جانۋارلارىنا ارنالعان وتكەلدەر، 3 كوپىر، 2 ارالىق باقىلاۋ اركاسىن، دەمالىس الاڭدارى مەن مال وتكەلدەرىن سالۋ قاراستىرىلعان. قۇنى 106 ملرد تەڭگە بولاتىن جوبا 3 جىلعا جوسپارلانعان، – دەيدى «قازاۆتوجول» ۇك» اق وبلىستىق فيليالى ديرەكتورىنىڭ ورىنباسارى ش.مىرزاباي.

قازىر 204 شاقىرىم بويىندا جاسالاتىن جۇمىس 6 لوتقا ءبولىنىپ، ساراپتامادان ءوتىپ، دايىن تۇر. جاقىن ارادا وبلىسقا جوبانى قارجىلاندىراتىن ەۋرازيالىق دامۋ بانكىنىڭ وكىلدەرى كەلىپ، ايماق باسشىلىعىمەن كەزدەسۋ وتكىزەدى. وسىلايشا، ءوڭىر جۇرتى ءۇشىن اسا ءبىر وزەكتى ماسەلە ءوز شەشىمىن تاپقالى تۇر.

 ماماندار جولدىڭ جاڭعىرۋى ايماق دامۋىنا ەرەكشە ءبىر سەرپىلىس بەرەتىنىنە سەنىمدى. اۆتوماگيسترال ەلدىڭ وڭتۇستىگى مەن ورتالىعىن، رەسەي فەدەراتسياسىن تىكەلەي بايلانىستىرىپ، سىر وڭىرىنە ينۆەستيتسيا تارتۋدىڭ اياسىن كەڭەيتەدى، تۋريستىك الەۋەتىن ارتتىرا تۇسەدى. جۇك تاسىمالى كولەمىنىڭ ارتۋى وڭىردە كاسىپكەرلىكتىڭ ورىستەۋىنە سەپ بولادى.

«ارقان بويى سوقپاقتىڭ تۇساۋ بويى توتەلىگى بار» دەگەن. قازىر بۇل جولمەن كورشىلەس تۇركىستان وبلىسىنىڭ ازاماتتارى كوپ قاتىنايدى، ارا-تۇرا جولاۋشىلار اراسىنان وزبەكستان ەلىنىڭ ازاماتتارى دا بوي كورسەتىپ قالادى. ەگەر جول دۇرىستالسا، كورشى مەملەكەتتەن اعىلاتىندار قاتارى از بولمايىن دەپ تۇر. بۇل دا – وبلىس ءۇشىن ۇلكەن مۇمكىندىكتىڭ كوزى. ماماندار وسى باستاما جۇزەگە اسىپ جاتسا، قازاقستان مەن وزبەكستان اراسىنداعى كەزدەسۋلەردە ايتىلىپ قالىپ جۇرگەن قىزىلوردا – بۇقارا باعىتىنداعى حالىقارالىق جول قۇرىلىسى تۋرالى ماسەلەنى كوتەرۋدى ءجون سانايدى. ارينە، ول – ەرتەڭگى كۇننىڭ ەنشىسىندەگى ءىس. تۇيىندەي ايتقاندا، سىر جۇرتى ەلدى ەلگە، جولدى جولعا جالعاعان جوبانىڭ كەلەشەگىنەن كوپ ءۇمىت كۇتەدى.

سوڭعى جاڭالىقتار

شاپپا شوت پەن «قۇيرىقتى» پىشاق

ايماقتار • بۇگىن، 08:32

جاڭاوزەندەگى جىلىجاي

ايماقتار • بۇگىن، 08:30

تاۋار اينالىمىندا ءوسىم بار

ەكونوميكا • بۇگىن، 08:12

قۇبىجىق ءمۇسىن

ونەر • كەشە

كابۋلدان باستالعان كوش قازاق ەلىنە قالاي كەلدى؟

تاۋەلسىزدىكتىڭ 30 جىلدىعى • كەشە

ىندەت ءورشىپ بارادى

كوروناۆيرۋس • كەشە

التىنمەن پارا-پار تاۋەكەل

ەكونوميكا • كەشە

كوكپار تارتقان قىز

تانىم • كەشە

ۇقساس جاڭالىقتار