جاڭارتىلعان رەيتينگتە ساۋل الۆارەس كوش باستاپ تۇر. «كانەلو» دەگەن بۇركەنشىك ەسىممەن تانىلعان 30 جاستاعى مەكسيكانىڭ مىقتىسى وسى كۇنگە دەيىن 58 جەكپە-جەك وتكىزىپ, 55 رەت جەڭىسكە جەتتى. 37 قارسىلاسىن سۇلاتىپ سالدى. ءبىر مارتە ۇتىلىپ, تاعى ەكى كەزدەسۋدە تەڭ ءتۇستى. ەكىنشى ورتا سالماقتا كۇش سىناسىپ جۇرگەن الۆارەس ۇستىمىزدەگى جىلدىڭ 27 اقپانىندا اقش-تىڭ مايامي قالاسىندا وتكەن جارىستا تۇركيالىق اۆني يىلدىرىمنىڭ تاس-تالقانىن شىعارىپ, ءوزىنىڭ مىقتىلىعىپ تاعى ءبىر مارتە پاش ەتتى.
«كانەلونى» امەريكالىق ەررول سپەنس پەن ۇلىبريتانيالىق تايسون فيۋري وكشەلەپ كەلەدى. قازىرگى كەزدە ەكەۋىنىڭ دە قارقىنى قاتتى. امەريكالىق ورەن جارتىلاي ورتا سالماقا سايىسقا ءتۇسىپ جۇرسە, تۇماندى البيون ەلىنىڭ وكىلى الىپتارمەن ايقاسۋدا.
سونداي-اق, «توپ-10» بوكسشىنىڭ قاتارىندا تەوفيمو لوپەس (اقش), ناويا ينوۋە (جاپونيا), تەرەنس كروۋفورد (اقش), حۋان فرانسيسكو ەسترادا (مەكسيكا), مەنني پاكياو (فيليپپين), الەكساندر ۋسيك (ۋكراينا) جانە كادزۋتو يوكا (جاپونيا) سىندى ساڭلاقتار بار.
كەشەگى كۇنگە دەيىن ۇزدىك وندىقتىڭ قاتارىندا جۇرگەن 38 جاستاعى گەننادي گولوۆكين بۇل جولى 11-ورىنعا سىرعىپ ءتۇستى. وعان سەبەپ, GGG-ءنىڭ ءبىراز ۋاقىتتان بەرى مىقتى بوكسشىلارمەن جۇدىرىقتاسپاعانى. سوڭعى رەت وتانداسىمىز بىلتىرعى جىلدىڭ 18-جەلتوقسانىندا پولشالىق كاميل شەرمەتامەن شەبەرلىك بايقاسىپ, جەتىنشى راۋندتا جەڭىسكە جەتتى.
