مەملەكەت باسشىسى ءوز قۇقىعىن پايدالانىپ, جەردى شەتەلدىكتەرگە ساتۋعا جانە جالعا بەرۋگە ءبىرجولا تىيىم سالۋدى كوزدەيتىن زاڭ جوباسىن ماجىلىسكە جولداعانى ءجون بولدى. وسىنداي باستامانىڭ ماڭىزدىلىعى سول – پرەزيدەنت ۇسىنعان زاڭ جوبالارى كەزەك كۇتتىرمەي, جىلدام ءارى تەز قارالادى.
وسى ماسەلە تۋرالى قاسىم-جومارت توقاەۆ ۇلتتىق سەنىم كەڭەسىندە دە ايتقان بولاتىن. الايدا ءوز باسىم جەردى جالعا بەرۋ ەمەس, ساتۋ ماسەلەسىنە عانا شەكتەۋ قويىلاتىن شىعار دەپ ويلاپ ەدىم. دەگەنمەن, پرەزيدەنتتىڭ بۇل ۇسىنىسى تۋرالى ەستىگەندە تىپتەن رازى بولدىم. سەبەبى, ساتۋعا عانا شەكتەۋ قويىلعان جاعدايدا لوببيستەر جالعا الۋ ماسەلەسىن دە ءوز پايدالارىنا شەشىپ الۋى ابدەن مۇمكىن ەدى.
تۇپتەپ كەلگەندە, مەملەكەت باسشىسىنىڭ بۇل شەشىمى ۇلتتىق قاۋىپسىزدىك ماسەلەلەرىمەن تىكەلەي بايلانىستى. جەر شەتەلدىكتەرگە ساتىلعان, ءتىپتى جالعا بەرىلگەن جاعدايدىڭ وزىندە تەرريتوريامىزدىڭ تۇتاستىعىنا قاۋىپ تونەتىن ەدى. ويتكەنى, وسىعان دەيىن كەيبىر شەتەلدىك فيرمالار مەن كومپانيالار بيزنەس جۇرگىزەمىز دەگەن جەلەۋمەن الدىمەن ەلىمىزگە كىرىپ الىپ, كەيىن بىرتىندەپ جالعان تۇلعالاردىڭ اتىن جامىلىپ جەرگە دە, م ۇلىككە دە ايلا-شارعىسىن جۇرگىزۋگە تىرىسقانى جايلى دەرەكتەر بار. زاڭگەر رەتىندە وسىنداي جاعىمسىز جاعدايلاردان دا حاباردار بولۋشى ەدىم.
سوندىقتان پرەزيدەنتتىڭ جەردى شەتەلدىكتەرگە ساتۋعا جانە جالعا بەرۋگە ءبىرجولا تىيىم سالۋدى كوزدەيتىن زاڭ جوباسىن ۇسىنۋى تاۋەلسىزدىكتى تۇعىرلى ەتۋ مەن تەرريتوريامىزدىڭ تۇتاستىعىن ساقتاپ قالۋ ءۇشىن اسا ماڭىزدى. وسى ماسەلە زاڭ جۇزىندە شەشىمىن تاپقاننان كەيىن سان سوقتىراتىن سالدار مەن ءتۇرلى قاۋىپ بىردەن سەيىلەتىنىنە سەنىمدىمىن. مەملەكەت باسشىسى وسىنداي قادام ارقىلى قوعامنىڭ كوكەيىندە جۇرگەن ماسەلەگە ءبىرجولاتا نۇكتە قويدى دەۋگە دە بولادى.
ياعني زاڭ جوباسى قابىلدانعاننان كەيىن مۇنداي ماسەلە مۇلدە تۋىنداماۋعا, ءتىپتى تالقىعا سالىپ كوتەرىلمەۋى ءتيىس. ارينە, وسىنداي قادامعا بارۋ وڭاي بولماعانىن تۇسىنەمىن. الايدا پرەزيدەنتتىڭ مۇنداي شەشىمگە كەلگەنىن – «حالىق ۇنىنە قۇلاق اساتىن مەملەكەت» تۇجىرىمداماسىنىڭ جۇيەلى جۇزەگە اسىپ جاتقانىنىڭ جارقىن كورىنىسى دەپ باعالاۋعا بولادى. مەملەكەت باسشىسى ايتقانداي, ءار ۋاقىتتا ادىلدىك, اشىقتىق, مەملەكەتتىڭ جاۋاپكەرشىلىگى بولۋى كەرەك.
مارات ءباشىموۆ,
ەۋروپالىق قۇقىق جانە ادام قۇقىقتارى ينستيتۋتىنىڭ ديرەكتورى
