وبلىستىق توتەنشە جاعداي قىزمەتى قىزىل سۋدان كەلەتىن قاۋىپتىڭ الدىن الۋدى قازىردەن باستاپ قولعا الىپ جاتىر. قامدانعان قاپى قالمايدى, بيىل بيۋدجەتتەن توتەنشە جانە شۇعىل شىعىندارعا ارنالعان قورعا 814 ملن 330 مىڭ تەڭگە ءبولىندى. قالالىق, اۋداندىق اكىمدىكتەر 9 مىڭ توننادان استام ينەرتتى ماتەريالدار مەن 52 مىڭنان استام قۇم قاپتارىن دايىنداپ قويدى. توتەنشە جاعداي قىزمەتىنىڭ 162,9 توننادان استام جانار-جاعارماي قورى بار. تاسقىن سۋدىڭ الدىن توسىپ, ارناسىنا قايتا ءتۇسىرۋ ءۇشىن 7 اۋدانداعى وزەندەردە مۇز جارۋ جۇمىستارىن ىسكە اسىرۋ جوسپارلانعان. وبلىستا ناۋرىز ايىنان باستاپ قاردىڭ قالىڭدىعى مەن سۋ تاسقىنى بولۋى ىقتيمال اۋماقتارداعى جاعدايدى باقىلاۋدا ۇستاپ وتىراتىن عارىشتىق مونيتورينگ جۇرگىزىلە باستادى.
«قازگيدرومەت» فيليالىنا قاراستى گيدرومەتەورولوگيالىق باقىلاۋ جانە مونيتورينگ ءبولىمىنىڭ باستىعى نينا ۆيتكالوۆانىڭ ايتۋىنشا, تاياۋدا توبىل, وباعان, قاراسۋ جانە ءتىنتۋىر وزەندەرىنىڭ بويىندا قار قۇرامىنداعى سۋ مولشەرىن انىقتاۋ جۇمىستارى جۇرگىزىلگەن.
– ءتىنتۋىر وزەنىندەگى قاردىڭ قۇرامىندا 45 مم سۋ قورى بار, بۇل قالىپتى نورمانىڭ 72%-ىن قۇرايدى. مەڭدىقارا, اۋليەكول جانە جىتىقارا اۋداندارىنداعى 18 مەتەوستانسادا سۋ مولشەرىنىڭ شامادان ارتىق ەكەنى انىقتالدى. ماسەلەن, مەڭدىقارا اۋدانىنداعى ميحايلوۆ اۋىلىنىڭ ماڭىندا ىلعال مولشەرى 67 مم بولۋ كەرەك. ال ءبىزدىڭ ماماندار بۇل وڭىردەگى ىلعال 130 مم ەكەنىن انىقتاپ وتىر, – دەدى نينا ۆيتكالوۆا.
5 اقپاننان بەرى اۋىل-اۋىلدى ارالاۋعا شىققان تجد قىزمەتكەرلەرى مەن قالا جانە اۋدان اكىمدىكتەرىنىڭ وكىلدەرى تۇرعىندارعا ۋاقتىلى قار شىعارۋ, سۋ ارنالارى مەن ارىقتاردى تازارتۋ جايىن ەسكەرتىپ, سۋ تاسقىنى بولا قالعان جاعدايدا قانداي امال جاساۋ كەرەكتىگىن تۇسىندىرۋدە. قۇتقارۋ قىزمەتى وكىلدەرىنىڭ ايتۋىنشا, قىزىل سۋدان قاۋىپ تونگەن ەلدى مەكەندەردەگى تۇرعىندار ەۆاكۋاتسيالانىپ, قوراداعى مال قاۋىپسىز ايماققا شىعارىلادى.
– ەۆاكۋاتسيالانعان ازاماتتاردى سۋ باسۋ قاۋپى بار ايماقتان تىس جەرلەرگە ورنالاستىرۋ ءۇشىن 192 ۋاقىتشا پۋنكت دايىنداپ قويدىق. قاۋىپتى ايماقتا قالعان ەلدى مەكەندەرگە ازىق-ت ۇلىك جەتكىزۋ جونىندە نيەت-شارتتار جاسالدى. قاجەت بولعان جاعدايدا ەۆاكۋاتسيالانعان تۇرعىندار ورنالاساتىن جايلار, ءۇي جانۋارلارىن ايداپ اپاراتىن ورىندار انىقتالدى. ايماقتا كوكتەمگى سۋ تاسقىنىنا قارسى كۇرەس شارالارىن جۇزەگە اسىراتىن 1085 تەحنيكاسى, 116 قايىعى, 365 سۋ سورعىسى, 269 موتوپومپاسى بار جالپى سانى 2 960 ادامنان تۇراتىن ارنايى قۇتقارۋ توبى جاساقتالدى, – دەدى توتەنشە جاعداي دەپارتامەنتىنىڭ باستىعى ءبىرجان كارىموۆ.
دەپارتامەنت باسشىسىنىڭ ايتۋىنشا, سۋ تاسقىنى كەزەڭىندە توتەنشە جاعداي قىزمەتى مەن بارلىق ازاماتتىق قورعانىس قىزمەتتەرىنىڭ اپاتقا قارسى بىرلەسكەن شتابى جۇمىس ىستەيتىن بولادى.
قوستاناي وبلىسى
