ال ناۋرىز ايىنىڭ 3-ىنەن ءوڭىردىڭ مۇعالىمدەرى ۆاكتسينالاۋدان وتە باستادى. ەسكەرتە كەتەتىن ءبىر جايت, بۇل ءىس-شارا ەرىكتى جانە تەگىن تۇردە جۇزەگە اسىرىلىپ جاتىر.
قاراعاندى وبلىستىق قوعامدىق دەنساۋلىق ساقتاۋ قىزمەتىنىڭ باسشىسى بيبىگۇل تولەگەنوۆانىڭ ايتۋىنا قاراعاندا, وڭىردە ۆاكتسينا ەككىزگىسى كەلەتىن مۇعالىمدەردىڭ سانى 6 200 ادامدى قۇرايدى. ەكپە سالۋ بارىسىندا پەداگوگتەردى قولدانىستاعى ۆاكتسينالاۋ ورتالىقتارىنا ءتىزىم بويىنشا ءبولىپ, ءىس-شارا ارنايى قۇرىلعان كەستە بويىنشا جۇزەگە اسىرىلادى. العاشقىلاردىڭ ءبىرى بولىپ ەكپە سالدىرعان مۇعالىم ۆارۆارا دىدىشكو قانىش ساتباەۆ اتىنداعى گيمنازيادا جۇمىس ىستەيدى. ول ۆاكتسينالاۋدى پاندەميانى توقتاتاتىن بىردەن-ءبىر پرەپارات سانايتىندىقتان, مۇنداي قادامعا سانالى تۇردە جانە ەش كۇمانسىز بارعانىن ايتادى.
– ءبىز, مۇعالىمدەر, بۇل شارانى قاجەت دەپ سانايمىز. ءوز باسىم رەسەيلىك «سپۋتنيك V» ۆاكتسيناسىنا سەنەمىن. نوۆوسىبىردە جاقىن دوسىم عىلىم سالاسىندا جۇمىس ىستەيدى. ول ۆاكتسينالاۋدان العاشقىلاردىڭ ءبىرى بولىپ ءوتتى جانە ونىڭ بويىنان اسقىنۋلار بايقالعان جوق, – دەيدى قاراعاندىلىق مۇعالىم.
پەداگوگ مامانداردان كەيىن ءساۋىر ايىندا كۇشتىك قۇرىلىمداردىڭ قىزمەتكەرلەرى ۆاكتسينا الۋدى باستايدى. ال مامىردان باستاپ ەكپە الۋعا ەرىكتى تۇردە نيەت بىلدىرگەن تۇرعىنداردى جاپپاي ۆاكتسينالاۋ جوسپاردا بار.
قاراعاندى وبلىسى
