مەملەكەتتىڭ قورعانىس قابىلەتى جۇيەسىن جوسپارلاۋ جانە دامىتۋ جونىندەگى تۇراقتى جۇمىس شەڭبەرىندە اسكەري ۆەدومستۆو مينيسترلىكتەر مەن ۆەدومستۆولاردىڭ لاۋازىمدى تۇلعالارى ءۇشىن مامانداندىرىلعان وقىتۋ كۋرسىن ۇيىمداستىردى.
كۋرستى قورعانىس ءمينيسترى گەنەرال-لەيتەنانت نۇرلان ەرمەكباەۆ اسكەري قاۋىپسىزدىكتىڭ قازىرگى زامانعى قاۋىپ-قاتەرلەرى اياسىندا قارۋلى كۇشتەردى دامىتۋدىڭ نەگىزگى باعىتتارى تۋرالى لەكتسيامەن اشتى.
ساباق بارىسىندا ەلىمىزدىڭ قورعانىس قابىلەتىن قامتاماسىز ەتۋ بويىنشا ءاربىر مينيسترلىك پەن ۆەدومستۆونىڭ وكىلەتتەرى مەن قۇزىرەتتەرىن قاراۋعا باسا نازار اۋدارىلدى. اسكەري ۆەدومستۆونىڭ باسشىسى قورعانىس سالاسىنداعى ورتالىق اتقارۋشى ورگانداردىڭ فۋنكتسيالارى رەگلامەنتتەلگەن قولدانىستاعى زاڭنامانىڭ ەرەجەلەرىنە ناقتى توقتالدى.
– اسكەري جانە اسكەري ەمەس ءار ءتۇرلى سيپاتتاعى تاۋەكەلدەر جاعدايىندا مەملەكەتتىك تەتىك بىرىڭعاي تۇتاستىق رەتىندە ۇيلەسىمدى ارەكەت ەتۋگە ءتيىس, – دەپ اتاپ ءوتتى گەنەرال-لەيتەنانت نۇرلان ەرمەكباەۆ.
ءدارىس سوڭىندا ورتالىق مەملەكەتتىك ورگانداردىڭ اسكەري قاۋىپسىزدىكتى قامتاماسىز ەتۋ ماسەلەلەرى بويىنشا ءوزارا ءىس-قيمىلىنىڭ تاجىريبە جۇزىندەگى اسپەكتىلەرى تالقىلاندى.
ءۇش كۇنگە سوزىلاتىن كۋرس ساباقتارى قازاقستان رەسپۋبليكاسىنىڭ تۇڭعىش پرەزيدەنتى – ەلباسى اتىنداعى ۇلتتىق قورعانىس ۋنيۆەرسيتەتىنىڭ بازاسىندا وتەدى.
