ايماقتار • 07 ناۋرىز، 2021

قوستاناي قازاق تەاترى كورەرمەندەرىمەن قايتا قاۋىشتى

33 رەت كورسەتىلدى

ءى.وماروۆ اتىنداعى قوستاناي قازاق دراما تەاترى ۇزاق ۇزىلىستەن كەيىن قايتا شىمىلدىعىن ءتۇردى.

كارانتيننىڭ قۇرساۋى ءجىبىپ، مادەني نىساندار  ۇزىن ارقان، كەڭ تۇساۋ تىرشىلىككە كوشكەلى تىنىمسىز دايىندىققا كىرىسكەن تەاتر ۇجىمى ناۋرىزدىڭ باسىندا كورەرمەندەرىنە «وتەلمەگەن پارىز»، «سىعان سەرەناداسى»، «كىشكەنتاي ادامنىڭ ۇلكەن تراگەدياسى» اتتى ءۇش بىردەي جاڭا قويىلىمدى ۇسىنىپ وتىر.

قازاق تەاترى 4-5 ناۋرىز كۇندەرى قاۋىپتى ىندەتكەقارسى الدىڭعى شەپتە كۇرەسكەن دارىگەرلەر مەن پوليتسيا قىزمەتكەرلەرىن، ۆولونتەرلاردى تەاترعا شاقىرىپ تەگىن سپەكتاكل كورسەتتى.

- مەملەكەت باسشىسى قاسىم-جومارت توقاەۆ ەل تاۋەلسىزدىگىنىڭ 30 جىلدىعىنا وراي «قايىرىمدى ىستەر جالپىۇلتتىق مارافونىن»  ۇسىنعان بولاتىن. ءبىز وسى جوبا اياسىندا ەكى كۇن بويى «سىعان سەرەناداسى» مۋزىكالىق دراماسىن قايىرىمدىلىقسپەكتاكلءى رەتىندە تەگىن قويىپ، پاندەمياعا قارسى كۇرەسكەن قاھارماندارعا دەگەن ءوز سىي-قۇرمەتىمىزدى بىلدىردىك، - دەدى تەاتر باسشىسى ءالىمحان مىرزاحان.

6-ناۋرىز كۇنى تەاتردا تولەن ابدىكتىڭ «قىزءباتىش پەن ەرسەيىت» پوۆەسىنىڭ جەلىسىمەن قويىلعان «وتەلمەگەن پارىز» دراماسىنىڭ تۇساۋى كەسىلدى.

- جازۋشىنىڭ بۇل پوۆەسى وتكەن عاسىردىڭ 60-شى جىلدارى جازىلعان.

سوعان قاراماستان كۇنى بۇگىنگە دەيىن وزەكتىلىگىن جوعالتپاعان شىعارما. قازاق پايىمىندا قىزدىڭ ابىرويى  - ەلدىڭ ابىرويى. ال بۇگىنگى قوعامدا كوپتەگەن قاراكوزدەرىمىزدىڭ ار-ابىرويى تابان استىندا تاپتالىپ قالىپ جاتاتىنى جاسىرىن ەمەس. وسى ماسەلە كوپتەن بەرى جانىمدى جەگىدەي جەپ مازا بەرمەي جۇرگەن. ب ۇلىنگەن تاعدىردىڭ وبالىن ارقالاعان بولاتجاننىڭ مەزگىلسىز ءولىمى، جالعىز ۇلىنان ايىرىلىپ اڭىراپ قالعان قوجابەك قاريانىڭ تراگەدياسىن اشىپ كورسەتەتىن تولەن ابدىكوۆتىڭ پوۆەسىن وقىعان سوڭ،  بۇل درامانى قويا الماي تۇرا المادىم، - دەدى تەاتردىڭ كوركەمدىك جەتەكشىسى بااتىربەك مىرزاحان.

ەڭ باستىسى، قويىلىم كورەرمەن كوڭىلىنەن شىقتى. راسىمەن دە، ساحنادا ءوتىپ جاتقان ءومىر كورىنىستەرى شىنايى ءارى اسەرلى. ەڭ ارتقى قاتاردا وتىرعان سوڭ بايقاپ وتىردىق، اق جاۋلىقتى انالاردىڭ كوبى ءالسىن-ءالسىن كوز جاسىن سۇرتە بەردى. ارتىستەردىڭ بەينە سومداۋ شەبەرلىگى دە ەرەكشە. وقيعالار جەلىسى دە سونشالىقتى جيناقى، ۇيلەسىمدى. قويىلىم اياقتالعان سوڭ كوپشىلىك ارتىستەردى ساحنادان جىبەرمەي ۇزاق قول شاپالاقتاپ تۇرىپ الدى.    

پرەمەراعا كەلگەن كورەرمەندەردىڭ قاتارىندا وبلىستىق مادەنيەت باسقارماسىنىڭ باسشىسى ەرلان قالماقوۆ تا وتىردى.

- بىرىنشىدەن، ءبىزدىڭ جەرلەسىمىز، قازىرگى قازاق ادەبيەتىنىڭ تورىندە

وتىرعان ابىزى تولەن ابدىك سىندى قالامگەردىڭ وسى ءبىر شىعارماسى قوستاناي تەاترىندا ساحنالانۋىنىڭ ءوزى ءبىز ءۇشىن ۇلكەن مارتەبە دەپ بىلەمىز. ارتىستەردىڭ ۇلكەن جۇمىس اتقارعانىن وزدەرىڭىز كورىپ وتىرسىزدار. بۇل قويىلىمنىڭ تولىق نۇسقاسى الداعى ۋاقىتتا وبلىستىق تەلەارنا ەفيرىنەن بەرىلەدى. قويىلىمنىڭ تۇساۋكەسەرى حالىقارالىق ايەلدەر مەرەكەسىمەن تۇستاس كەلىپ وتىر. سوندىقتان وسىنداعى اق جاۋلىقتى انالارىمىزدى، اپا-قارىنداستارىمىزدى مەرەكەلەرىمەن قۇتتىقتايمىن! – دەدى باسقارما باسشىسى.

قوستاناي قازاق تەاترى 7-8 ناۋرىز كۇندەرى، حالىقارالىق ايەلدەر كۇنى مەرەكەسىنە وراي، كورەرمەندەرىنە يسرايل ساپاربايدىڭ «سىعان سەرەناداسى» مۋزىكالىق دراماسىن تارتۋ ەتپەك. ال 12-ناۋرىزدا «كىشكەنتاي ادامنىڭ ۇلكەن تراگەدياسى» دراماسىنىڭ تۇساۋكەسەرى وتەدى.

 

قوستاناي وبلىسى

سوڭعى جاڭالىقتار

ءسوزدىڭ جەتى بوياۋى

تانىم • كەشە

ورازانىڭ ءار ءساتى ساۋاپ

رۋحانيات • كەشە

ۇقساس جاڭالىقتار