ايماقتار • 05 ناۋرىز، 2021

باقىتىن «بايان سۇلۋدان» تاپقان

28 رەت كورسەتىلدى

قوستانايداعى «بايان سۇلۋ» كونديتەرلىك فابريكاسىندا بۇگىندە 1 مىڭنان استام قىز-كەلىنشەك ەڭبەك ەتەدى. كومپانيانىڭ وندىرىستىك ءبولىم باستىعى ناتاليا شاپوۆالوۆا – ىرگەلى كاسىپورىننىڭ توقسانىنشى جىلدارداعى توقىراۋ كەزەڭىنە دە، كەيىن مەملەكەتتىڭ قولداۋىمەن كەلگەن فابريكانىڭ جاڭارۋ، جاڭعىرۋ، وركەندەۋ داۋىرىنە دە كۋا بولعان تاجىريبەلى مامان.

بۇگىندە التى بىردەي وندىرىستىك تسەحتىڭ جۇمىسىن باسقاراتىن بىلىكتى ماماننىڭ العاشقى ەڭبەك جولى دا وسى كاسىپورىندا باستالدى. ءتىپتى، ناتاليا نيكولاەۆنانىڭ بۇكىل وتباسىنىڭ تاعدىرى «بايان سۇلۋ­مەن» تىعىز بايلانىستى دەسەك بولادى. ءوزى اتالعان كاسىپورىندا 35 جىلدان بەرى ەڭبەك ەتىپ كەلەدى. جولداسى وسىن­دا­عى جىلۋ قازاندىقتارىنىڭ جۇمىسىن با­قى­لايدى. ۇلكەن ۇلى دا ەڭبەك جولىن وسى جەردە باستادى. ال قىزى بۇگىندە فاب­ري­كانىڭ بىلدەي ءبىر ينجەنەر-تەحنولوگى.

– مەن باقىتىمدى ەڭبەكتەن تاپقان ايەلمىن. 18 جاسىمدا الماتى پوليتەح­نيكا­لىق ينستيتۋتىن تامامداعان سوڭ، مەنى جولدامامەن قوستاناي كونديتەرلىك فابريكاسىنا جۇمىسقا جىبەردى. سودان بەرگى بۇكىل سانالى عۇمىرىم فابريكانىڭ وندىرىستىك جەلىلەرىندە ءوتتى. 1986 جىلدان 2013 جىلعا دەيىن اۋىسىم شەبەرىنىڭ كومەكشىسى بولىپ جۇمىس ىستەدىم. كەيىن اۋىسىم شەبەرى، تسەحتىڭ اعا تەحنولوگى، ساپا جونىندەگى باس مامان، بيسكۆيت تسەحىنىڭ باستىعى قىزمەتتەرىن اتقاردىم. قازىر وندىرىستىك ءبولىمدى باسقارامىن. وسى جەردە ەڭبەك ەتە ءجۇرىپ، جولداسىمدى كەز­دەستىردىم، شاڭىراق قۇرىپ، ءوسىپ-وندىك. ءۇش نەمەرەم بار، – دەدى ناتاليا شاپوۆالوۆا.

كاسىپ­ورىندا وسىدان 2-3 جىل بۇرىن بەس بىردەي تەحنولوگيالىق جەلى ورنا­تىلعان. بىلتىر تاعى بىرەۋى ىسكە قوسىلدى. جاڭا جەلى كارامەل تاتتى­لەرىنىڭ جىلدىق ءونىمىن 4 مىڭ تونناعا دەيىن ارتتىرۋعا مۇمكىندىك بەرىپ وتىر. ءار تسەحتا 300-گە دەيىن جۇمىسشى بار. ءبولىم باسشىسى ەكى اۋىسىمدا جۇمىس ىستەيتىن ءاربىر ادامنىڭ ءتىلىن تاۋىپ، كەرەك كەزىندە كومەك قولىن سوزىپ، ۇلكەن ۇجىم­دى ءبىر وتباسىنداي ۇيىتىپ ۇستاپ، ەڭ­بەككە جۇمىلدىرىپ وتىر. وندىرىستىك ما­سە­لەلەردى شۇعىل شەشىپ تاستايتىن قا­سيە­تى مەن وزگەلەرگە ۇلگى بولارلىق تابان­­دى­لى­عىن، ەڭبەكقورلىعى مەن ۇيىمداستىرۋ­شى­لىق شەبەرلىگىن بىلاي قويعاندا، ناتاليا شاپوۆالوۆانى فابريكا ۇجىمى ءادىل باس­شى، ادامگەرشىلىگى زور ارىپتەس رەتىندە قۇرمەتتەيدى. 

– ناتاليا نيكولاەۆنانىڭ جۇمىستىڭ بارلىق ۋچاسكەسىنە قالاي ۇلگەرەتىنىنە قايران قالامىز. ءبىر اۋىسىم كەتىپ جاتسا، ەكىنشى اۋىسىم كەلىپ جاتادى، ودان ءۇشىنشى اۋىسىم باستالادى. جۇمىسشىلار اۋىسقانىمەن جۇمىس توقتامايدى. بىراق بىزدە اۋىسپايتىن ءبىر-اق مامان بار، ول – وندىرىستىك ءبولىمنىڭ باسشىسى ناتاليا نيكولاەۆنا. كۇنى-ءتۇنى جۇمىس باسىندا جۇرسە دە شارشاۋ­دى بىلمەيتىن ول ۇنەمى اشىق، جايدارى مىنەزىمەن جان-جاعىنا جىگەر بەرىپ، ۇجىمدى جۇمىسقا جۇمىلدىرىپ جۇرەدى. وندىرىستىك جانە باسشىلىق جۇمىستا مول تاجىريبەسى بار، بارىنە سىيلى. ءبىزدىڭ جەلىلەردىڭ دايىن ءونىمدى شىعارۋ جانە تەحنولوگيالىق قۇرىلعىلاردىڭ وندىرىستىك قۋاتىن ارتتىرۋ بارىسىندا جوعارى كورسەتكىشتەرگە قول جەتكىزۋى وسى كىسىنىڭ ارقاسى. ناتاليا شاپوۆالوۆا باسقاراتىن تسەحتاردا ءونىم اسسورتيمەنتى ۇنەمى كەڭەيتىلىپ، جاڭارتىلىپ وتىرادى. مۇنىڭ سىرتىندا، وندىرىسكە قانشاما جاڭا ونىمدەر شىعارىلىپ جاتىر. «بايان سۇلۋ» ونىمدەرىنىڭ نارىقتا جوعارى سۇرانىسقا يە بولۋىنا دا وسى كىسى ەرەكشە ۇلەس قوسىپ كەلەدى، – دەيدى ارىپتەستەرى.

قوستانايلىق كاسىپورىن كونديتەرلىك ونىمدەردىڭ 250-دەن استام ءتۇرىن شىعارادى. «بايان سۇلۋ» بىلتىر تۇتىنۋشىلارىنا ءتاتتىنىڭ بادام، جاڭعاق قوسىلعان بىرنەشە جاڭا ءتۇرىن ۇسىندى. بۇل جوبانىڭ باسى-قاسىندا دا ناتاليا شاپوۆالوۆا ءجۇردى.

– بىلتىر بىزدە شوكولاد ونىمدەرىن شىعاراتىن ەكى بىردەي جاڭا تسەح پايدا­لانۋ­عا بەرىلدى. قازىر قازاقستاننىڭ قاي تۇپكى­رىنە بارساڭ دا، ءبىزدىڭ تاتتىلەردى كەزدەس­تىرە الاسىڭ. «بايان سۇلۋ» تاتتىلەرى سىرتقى نارىقتا دا ءوتىمدى. قوستاناي كامپيتتەرىن نەگىزىنەن رەسەي، قىرعىزستان، وزبەكستان، تاجىكستان سياقتى تمد مەملەكەتتەرى مەن گەرمانيا تۇتىنادى. كەيىن ولاردىڭ قاتارىنا قىتاي قوسىلدى. نەمىستەر بۇرىننان كەلە جاتقان كلاسسيكالىق شوكولادتارىمىزدى، ال قىتايلار كوبىنە كارامەلدەرىمىزدى ۇناتادى. رەسەيدىڭ شەكارالاس ايماقتارى ءبىزدىڭ كارامەلدەرىمىز بەن ۆافلي ونىمدەرىن، شوكولادتارىمىزدى اتتاي قالاپ الىپ كەتىپ جاتادى. قوستاناي ونىمدەرىنىڭ باستى ەرەكشەلىگى، حيميالىق قوس­پاسى از. تابيعي جانە باعاسى دا قول­جەتىم­دى. ءبىزدىڭ باستى ۇستانىمىمىز – نا­رىق­تى ساپالى ونىممەن جاۋلاپ، باسەكە­دە دەس بەرمەۋ. سول ءۇشىن دە جىل سايىن جاڭا جەلىلەر پايدالانۋعا بەرىلىپ، ءونىم تۇرلەنىپ وتىرادى، – دەيدى بىلىكتى مامان.

ءبولىم باسشىسىنىڭ ايتۋىنشا، قوستا­ناي­لىق فابريكا 2020 جىلى 46 مىڭ 300 توننا كونديتەر ءونىمىن شىعارعان. ونىڭ 30 پايىزدان استامى شەتەلگە ساۋدالا­نىپ­تى. «بايان سۇلۋ» بيىل ءوندىرىس اۋقىمىن كەڭەيتىپ، 50 مىڭ توننا ءونىم شىعارۋدى كوزدەپ وتىر. كاسىپورىننىڭ وندىرىسىنە پاندەميا دا كەرى اسەر ەتە العان جوق. مۇنداعى وندىرىستىك جەلىلەردە سانيتارلىق قاۋىپسىزدىك تالاپتارى قاتاڭ ساقتالادى جانە جۇمىسشىلاردىڭ دەنساۋلىعىن ساق­تاۋ ماسەلەسى ەڭ ءبىرىنشى كەزەكتە تۇرا­دى. كاسىپورىنداعى ءاربىر تسەحتا سانيتار­لىق باقىلاۋ پۋنكتتەرى جۇمىس ىستەيدى. كىرە-بەرىستەرگە ساپالى سانيتايزەرلەر ور­نا­تىلعان. تسەحقا كىرگەن-شىققان جۇمىس­شى­لاردىڭ ءبارى سانيتارلىق تەكسەرۋدەن وتەدى.

– ءبىزدىڭ ۇجىمنىڭ باسىم بولىگى – نەگىزى­نەن ايەلدەر. ءتىپتى، ءبىزدىڭ تاتتىلەردىڭ اتاۋلارى دا كوبىنە ايەل تابيعاتىمەن باي­لا­نىس­تى بولىپ كەلەدى. راسىندا، «بايان سۇلۋ» بۇگىن­دە مەنىڭ ءوز وتباسىم سياقتى بولىپ كەتتى، بۇكىل تاعدىرىم وسى كاسىپورىنمەن ساباق­تاسا ءورىلىپ كەلەدى. جولداسىممەن دە، ۇل-قى­زى­ممەن دە ۇيدەن گورى جۇمىس باسىندا ءجيى كەزدەسەمىز. ايەلدىڭ قولىنان شىق­­قان ءدام قاشان دا بەرەكەلى بولادى. ءبىزدىڭ تات­تىلەرىمىز ءار وتباسىنىڭ بەرەكە-ىرىز­دى­عىن اسىرىپ، قۋانىش پەن باقىتتىڭ شاشۋى بولا بەرسىن، – دەيدى ناتاليا شاپوۆالوۆا. 

 

قوستاناي وبلىسى

 

سوڭعى جاڭالىقتار

ەلگە كەرەك ەكى كىتاپ

رۋحانيات • بۇگىن، 08:52

«عارىشقا اپارار جول»

رۋحانيات • بۇگىن، 08:50

العاشقى عارىش ايلاعى

وقيعا • بۇگىن، 08:48

تاريحي جەرلەردىڭ تاعىلىمى بولەك

رۋحانيات • بۇگىن، 08:30

شيرەك فينالدا ءسۇرىندى

تەننيس • بۇگىن، 08:11

ەل-كلاسيكودا جەڭىسكە جەتتى

فۋتبول • بۇگىن، 08:06

رۋحى بيىك ەل ەشقاشان جەڭىلمەيدى

رۋحانيات • بۇگىن، 08:05

يزرايلدەن باسىم ءتۇستى

سپورت • بۇگىن، 08:04

عىلىمنىڭ جاڭا بەلەسى

عىلىم • بۇگىن، 08:01

ۇلتتىق ۇردىستەر ۇزىلمەيدى

قازاقستان • كەشە

ۇقساس جاڭالىقتار