تۇساۋكەسەر كەزدەسۋىندە جەرلەسىمىز الەمنىڭ جەتىنشى راكەتكاسى الەكساندر زۆەرەۆپەن كۇش سىناسقان ەدى. نەمىس تەننيسىشىسى بىلتىر اقش-تىڭ اشىق بىرىنشىلىگىنىڭ فينالىندا ويناپ, اۋستراليانىڭ اشىق بىرىنشىلىگىندە جارتىلاي فينالعا دەيىن جەتتى. اتر تۋرنيرلەرىندە 13 مارتە توپ جاردى. الەكساندر بۋبليكتە ونداي تابىستىڭ ءبىرى دە جوق. سوعان قاراماستان ول ايگىلى قارسىلاسىن 7:5, 6:3 ەسەبىمەن قاپى قالدىردى.
1/8 فينالدا بۋبليكتىڭ جولى امەريكالىق توممي پولمەن قيىستى. العاشقى سەت تاي-برەيككە دەيىن جەتكەنمەن جەرلەسىمىز 7:6 ەسەبىمەن جەڭىسكە جەتتى. الايدا ودان كەيىنگى ەكى سەتتە 3:6, 1:6 ەسەبىمەن اقش-تىڭ وكىلىنە ەسە جىبەرىپ, جارىستى اياقتادى.
