ايماقتار • 04 ناۋرىز، 2021

قوستاناي وبلىسىندا اقىلى جولدار پايدا بولادى

37 رەت كورسەتىلدى

بيىل «قوستانايدان ەكاتەرينبۋرگ باعىتىنداعى رەسەي شەكاراسىنا دەيىنگى اۆتوجول جۇك كولىكتەرى ءۇشىن اقىلى بولادى. بۇل ماسەلە جونىندە «قازاۆتوجول ۇك» اق-ى «نۇرلى جول» مەملەكەتتىك ينفراقۇرىلىمدىق دامۋ باعدارلاماسى اياسىندا قوعامدىق تىڭداۋ جيىندارىن ۇيىمداستىردى.  قوستاناي قالاسى مەن قارابالىق، فەدوروۆ، قوستاناي، اۋليەكول اۋداندارىندا وتكەن قوعامدىق تىڭداۋلاردا تۇرعىندارعا الداعى ۋاقىتتا تەست رەجىمىندە پايدالانۋعا بەرىلەتىن اقىلى جولدىڭ جۇمىس جۇيەسى، تولەم ادىستەرى مەن اتامىش سالاعا قاتىستى زاڭ تالاپتارى ءتۇسىندىرىلدى.  

اقىلى جول وبلىس ورتالىعى جانە قوستاناي، فەدوروۆ، قارابالىق اۋداندارى ارقىلى وتەدى. بۇل ارالىقتا ءۇش باقىلاۋ اركاسى ورناتىلعان. تولەم جۇيەسى اشىق بولادى. ياعني، شلاگباۋمدار ورناتىلمايدى. كولىكتەردىڭ ءوتۋ ءتارتىبى ارنايى باقىلاۋ اركالارىنا بەكىتىلگەن كامەرالار ارقىلى باقىلانادى.

- جول جۇرگىزۋشىلەردەن تۇسكەن قارجى قورى ەسەبىنەن ءوزىن-ءوزى قامتاماسىز ەتەدى. اقىلى جولداردىڭ كۇتىمىنە مەملەكەتتىك بيۋدجەتتەن قاراجات بولىنبەيدى. بۇل بيۋدجەتتەگى قاراجاتتى باسقا دا الەۋمەتتىك ماڭىزدى قاجەتتىلىكتەرگە جۇمساۋعا مۇمكىندىك بەرەدى، - دەيدى «قازاۆتوجول» ۇك» اق وكىلى تۇرسىن الىمبەكوۆ.

تاعى ءبىر رەسپۋبليكالىق ماڭىزى بار كۇرە جول – قوستانايدان نۇر-سۇلتان قالاسىنا اپاراتىن اۆتوجولدىڭ ەسىل اۋدانى شەكاراسىنا دەيىنگى تۇسى دا اقىلى بولادى. وبلىستا پايدا بولاتىن اقىلى باعىتتاردىڭ ەكەۋى دە 2-ءشى جانە 3-ءشى ساناتتاعى جولدارعا جاتادى. ياعني، جول تەك جۇك كولىگى ءۇشىن عانا اقىلى بولادى. «قازاۆتوجول» ماماندارى جاڭا جولدار جۇرگىزۋشىلەردىڭ قاۋىپسىزدىگى مەن زاماناۋي تالاپتارعا جاۋاپ بەرەتىندىگىن ايتادى. بارلىق اقىلى اۆتوجولدا مىندەتتى تۇردە تۇنگى جارىقتاندىرۋ جانە جاۋاپتى ۋچاسكەلەردە مالدىڭ وتۋىنە توسقاۋىل بولاتىن قورشاۋلار، سونداي-اق تۇنگى ۋاقىتتا جول باعدارىن انىق كورۋگە كومەكتەسەتىن جارىق شاعىلىستىرعىشتار مەن كاتافوتتار بولادى.

مامانداردىڭ ايتۋىنشا، اقىلى جولدى ەنگىزۋ  جول بويىنداعى ينفراقۇرىلىمدى دامىتۋعا ايرىقشا اسەر ەتپەك. ماسەلەن، جولبويىندا دەمالاتىن ورىن، كولىك تۇراعى، قوناق ۇيلەر، سۋپەرماركەتتەر، دارەتحانالار، ءدارىحانالار بوي كوتەرەدى. بۇل جاڭا جۇمىس ورىندارىن اشۋعا مۇمكىندىك بەرەدى. اقىلى جولدار پوليتسيا باقىلاۋىندا بولادى. جول قىزمەتى كولىك جۇرەتىن بولىكتىڭ جاي-كۇيىن قاداعالاپ، قىسى-جازى كولىك جولىننىڭ تازا بولۋىن قامتاماسىز ەتەدى جانە توتەنشە جاعداي كەزىندە جەدەل كومەك كورسەتەدى.

 

قوستاناي وبلىسى

سوڭعى جاڭالىقتار

اراق ساتىلمايتىن اۋدان

ايماقتار • كەشە

ۇقساس جاڭالىقتار