دەنيسوۆ اۋدانىنىڭ 19 جاستاعى تۇرعىنى ابىلايحان قۋاندىق جول شەتىندە ابدەن السىرەپ, تەڭسەلىپ قۇلاۋعا شاق تۇرعان ەلىكتى قۇتقارىپ قالعانىن ايتتى.
– ءبىز اۋىلدا وستىك. بالا كەزىمىزدە اۋىل ىرگەسىندەگى ورمانعا ءجيى باراتىنبىز. سودان با, جانۋارلاردى جاقسى كورەمىن. 25 اقپان كۇنى, جانىمدا ءىنىم نۇرجان بار, ەكەۋمىز جەكە كولىگىممەن نۇر-سۇلتان قالاسىنان وقۋدان قايتىپ كەلە جاتقانبىز. اتا-انامىز اۋىلدا تۇرادى. كەنەت جول شەتىندە تۇرعان ەلىكتى بايقاپ قالدىق. ابدەن كۇشى كەتىپ السىرەگەنىن بىردەن اڭعاردىق, بىزدەن كومەك سۇراپ تۇرعانداي كورىندى. جانۋاردىڭ تۇمسىعى مەن كوزىنە اينالا قالىڭ قار قاتىپ قالىپتى. باسىن كوتەرە الماي, تۇمسىعى جەر يىسكەپ تۇر. نە اينالاسىن كورە المايدى, نە تەبىندەپ جايىلا المايدى. ابدەن اشىققان. كوزى مەن تۇمسىعىنا قاتقان اپ-اۋىر قاردان موينىن كوتەرە الماي قالعان, – دەدى ابىلايحان.
اعايىندى ەكەۋ كولىكتەن ءتۇسىپ, ەسەڭگىرەپ تۇرعان ەلىككە جايلاپ جاقىنداي باستايدى. انشەيىندە انادايدان ۇركىپ, اتىرىلا جونەلەتىن جۇيرىك جانۋار قاسىنا تاياپ كەلگەن ادامدى سەزۋدەن قالعان, ازداپ قورىققانىمەن, قاشۋعا شاماسى جوق. ابىلايحان ارتقى سيراقتان شاپ بەرىپ ۇستاعاندا ەلىك تە جىعىلادى.
– مەن جىبەرمەي ۇستاپ تۇردىم. نۇرجان الدىمەن مۇز بولىپ قالعان قاتقاق قاردى ۇرىپ سىندىرىپ, ەلىكتىڭ تۇمسىعىن ارشىدى. اۋىرسىندى ما, جانۋار باقىرىپ جىبەردى. ودان كەيىن اقىرىنداپ كوزىن قۇرساپ جاۋىپ قالعان قاتقاقتى الىپ تاستادى. كوزى شايداي اشىلعان جانۋار ءبىر سىلكىنىپ الدى دا, بەتى اۋعان جاققا شابا جونەلدى, – دەدى ابىلايحان.
جولاۋشىلار جانۋاردى قالاي قۇتقارعاندارىن ۆيدەوعا جازىپ الىپ, الەۋمەتتىك جەلىگە سالعان ەكەن, قارالىمى كۇن ساناپ كوبەيە ءتۇسىپتى.
قوستاناي وبلىسى
