سپورتتىڭ بۇل تۇرىنەن الەم چەمپيوناتى 1976 جىلدان بەرى ۇزدىكسىز ۇيىمداستىرلىپ كەلەدى. سول كەزدەن بەرى 45 مارتە جالاۋى جەلبىرەگەن جارىستا ەڭ كوپ ولجاعا كەنەلگەن كوماندا – وڭتۇستىك كورەيا قۇراماسى. سول ەلدىڭ شورتترەكشىلەرى 221 رەت جەڭىس تۇعىرىنا كوتەرىلدى. جۇلدەلەردىڭ 90-ى التىن, 68-ءى كۇمىس جانە 63-ءى قولا. ەكىنشى جانە ءۇشىنشى ورىنداردى قىتاي (64 التىن+43 كۇمىس+40 قولا) مەن كانادا (61+73+61) يەلەنۋدە. ۇيەڭكى جاپىراقتارى ەلى ورەندەرىنىڭ (195 مەدال) جەڭىپ العان جۇلدەلەر سانى اسپاناستى ەلى وكىلدەرىنەن (147 مەدال) الدەقايدا كوپ. الايدا كۇمىس پەن قولاعا قاراعاندا التىننىڭ ساپاسى ارتىق بولعاندىقتان, قىتايلار كانادالىقتاردان وزىپ وتىر.
ال ودان كەيىنگى ساتىلارعا اقش (16+16+30), جاپونيا (13+19+21), نيدەرلاند (9+13+9), ۇلىبريتانيا (7+10+9), يتاليا (5+13+20), رەسەي (3+2+1), اۋستراليا (2+5+3), ماجارستان (1+5+3), بولگاريا (1+2+6), جاڭا زەلانديا (1+1+0), گەرمانيا (0+1+1), كسرو (0+1+0), فرانتسيا (0+0+4) جانە بەلگيا (0+0+4) قۇرامالارى جايعاستى.
جەكەلەگەن سپورتشىلار جايىندا ايتار بولساق, دۇنيە ءجۇزى بويىنشا وسى سپورت ءتۇرىن سەرىك ەتكەن ساڭلاقتاردىڭ ۇشەۋى عانا 18 مارتە جەڭىس تۇعىرىنىڭ ەڭ بيىك ساتىسىنا كوتەرىلگەن ەكەن. ولار – ۆان مەن, ۆيكتور ان جانە يان يان (ا). ەندى وسى مىقتىلاردى ءوز وقىرماندارىمىزبەن جاقىنىراق تانىستىرايىق.
35 جاستاعى ۆان مەن – قىتايدىڭ حەيلۋنتسزيان پروۆينتسياسىنىڭ تۋماسى. ايتۋلى دودادا ول 18 التىننان بولەك, 9 كۇمىس جانە 3 قولا مەدالدى موينىنا ءىلدى. بارلىعى – 30 جۇلدە. ۆان ۇلكەن سپورتتان الدەقاشان قول ۇزگەنىنە قاراماستان ايەلدەر اراسىنداعى سايىستا ونىڭ ورناتقان رەكوردتارىنىڭ ءبىرازى ءالى كۇنگە دەيىن مۇرتى بۇزىلماي تۇر.
سەۋلدە تۋىپ-وسكەن ۆيكتور ان قىتايلىق ۆان مەنمەن تۇيدەي قۇرداس. سپورتتىق كارەراسىنىڭ نەگىزگى بولىگىن ول ءوزىنىڭ وتانى – وڭتۇستىك كورەيادا وتكىزسە, كەيىننەن رەسەيگە قونىس اۋدارىپ, ءبىراز جىلدان بەرى سول ەلدىڭ نامىسىن قورعاۋدا. الەم چەمپيوناتىندا ان 18 التىن, 7 كۇمىس جانە 3 قولانى قانجىعاسىنا بايلادى. بارلىعى – 28 جۇلدە.
44 جاستاعى يان يان (ا) دا قىتايدىڭ حەيلۋنتسزيان پروۆينتسياسىندا دۇنيەگە كەلدى. ول 1994-2005 جىلدار ارالىعىندا ايەلدەر سايىسىندا جاسىنداي جارقىراپ, كوپتەگەن بيىك بەلەستەردى باعىندىردى. بۇل سپورتشىنىڭ قورجىنىندا 18 التىن, 6 كۇمىس جانە 2 قولا مەدال بار. بارلىعى – 26 جۇلدە.
ال جەڭىپ العان جۇلدەلەرىنىڭ جالپى سانى جاعىنان 36 جاستاعى شارل املەننىڭ الدىنا تۇسەتىن ەشكىم جوق. كانادانىڭ كۆەبەك ايماعىنا قاراستى لەۆي قالاشىعىنىڭ تۋماسى 2005-2018 جىلدار ارالىعىندا 32 جۇلدە ولجالادى. ونىڭ 9-ى التىن, 13-ءى كۇمىس جانە 10-ى قولا. سونداي-اق دۇنيەجۇزىلىك دودادا مولىنان ولجاعا كەنەلگەن سپورتشىلار قاتارىندا كانادالىق سيلۆي دەيگل (15+3+1), ناتالي لامبەر (15+2+3), ماريس پەررو (8+2+1), قىتايلىق فان كەسين (10+1+2), لي تسزياتسزيۋن (8+3+8), كورەيالىق لي حو سوك (8+6+3), چحۆە ىن گەن (8+2+3), چين سون يۋ (8+2+1) سىندى شورت-ترەك شەبەرلەرى بار.
سوڭعى الەم چەمپيوناتى 2019 جىلى بولگاريانىڭ باس شاھارى – سوفيادا ۇيىمداستىرىلدى. بۇل جارىستا دا وڭتۇستىك كورەيا قۇراماسى شاشاسىنا شاڭ جۇقتىرماي, كوماندالىق سايىستا جەكە-دارا كوش باستادى. ولار 15 (8+5+2) جۇلدە ولجالادى. ەكىنشى ورىندا – نيدەرلاند. قىزعالداقتار ەلىنىڭ سپورتشىلارى 5 (4+0+1) مارتە جەڭىس تۇعىرىنا كوتەرىلدى. سونداي-اق قىتاي (0+3+1), كانادا (0+2+3), رەسەي (0+2+3), ماجارستان (0+0+1) جانە جاپونيا (0+0+1) وكىلدەرىنىڭ دە قانجىعالارى مايلاندى. جەكەلەگەن شورتترەكشىلەر اراسىندا بولگاريادا ەرلەر اراسىندا كورەيالىق ليم حە دجۋن (5+0+0) جانە ايەلدەر سايىسىندا نيدەرلاندتىق سيۋزاننە سحيۋلتينگتىڭ (3+0+1) باق جۇلدىزدارى جاندى.
قازىرگى كەزدە سپورتتىڭ بۇل ءتۇرى قازاقستاندا جاقسى دامىپ كەلەدى. وليمپيا ويىندارى مەن الەم چەمپيوناتتارىندا جەرلەستەرىمىز جەڭىس تۇعىرىنا سىنىق-سۇيەم قالعاندا ءسۇرىنىپ ءجۇر. ەسەسىنە الەم كۋبوگى جولىنداعى جارىستاردا جاسىنداي جارقىراپ جۇرگەن جىگىتتەرىمىز جەتەرلىك. ەڭ قۋانىشتىسى, بىلىكتى باپكەر مادىعالي قارسىبەكوۆ جاتتىقتىراتىن ۇلتتىق كوماندامىزدىڭ نەگىزىن ءوز قانداستارىمىز قۇرايدى. ەرتەڭ نيدەرلاندتا جالاۋى جەلبىرەيتىن جارىستا قازاقستاننىڭ نامىسىن سەگىز سپورتشى قۇرايدى. ولار – مادينا جانبوسىنوۆا, يانا حان, ابزال اجىعاليەۆ, دەنيس نيكيشا, ءادىل عالياحمەتوۆ, مەرسايد جاقسىباەۆ جانە ەركەبۇلان شامۇحانوۆ. ءبىزدىڭ ورەندەر وسى الەم چەمپيوناتى قارساڭىندا رەسەيدە وقۋ-جاتتىعۋ جيىنىن وتكىزىپ, قىزعالداقتار ەلىنە جاقسى بابىندا جانە كوتەرىڭكى كوڭىل-كۇيمەن اتتاندى. ەندى ءبىز جەرلەستەرىمىزدەن جەڭىس كۇتەمىز.
