قوستاناي وبلىسى جەر قاتىناستارى باسقارماسىنىڭ باسشىسى مەرەكە ديحاەۆتىڭ ۇستىنەن قىلمىستىق ءىس قوزعالدى. بۇل تۋرالى «24 kz» حابارلادى.
م. ديحاەۆ جالعان قۇجات جاساپ, بيۋدجەت قارجىسىن جىمقىردى دەپ ايىپتالۋدا. مەكەمەنىڭ ءبولىم باسشىسى مەن باس بۋحگالتەرى دە كۇدىكتى رەتىندە جاۋاپقا تارتىلماق. ولار ءوزارا ءسوز بايلاسىپ, 2012-2013 جىلدارى كولىك تۇراعىن جالعا الۋ جونىندە جەكە كاسىپكەرمەن كەلىسىم-شارت جاساعان. وسىنىڭ سالدارىنان مەملەكەتكە 700 مىڭ تەڭگە كولەمىندە شىعىن كەلتىرىلدى. «وبلىستىق جەر قاتىناستارى باسقارماسىنىڭ باسشىسى مەرەكە ديحاەۆقا جانە اتالعان مەملەكەتتىك مەكەمەنىڭ ەكى لاۋازىمدى تۇلعاسىنا قاتىستى قىلمىستىق كودەكستىڭ 176 جانە 314-باپتارى بويىنشا قىلمىستىق ءىس قوزعالدى. ولارعا مەملەكەت قارجىسىن جىمقىردى جانە قىزمەتتىك جالعاندىققا باردى دەگەن ايىپتار تاعىلۋدا. قازىرگى ۋاقىتتا تەرگەۋ اياقتالدى. قىلمىستىق ءىس سوتتا قارالۋ ءۇشىن پروكۋراتۋراعا جىبەرىلدى», - دەدى وبلىستىق قارجى پوليتسياسى دەپارتامەنتىنىڭ ءباسپاسوز حاتشىسى رۋستام سادىقوۆ.
باقىتبەك كەنەش ۇلى.
دەرەككوز: «24 kz»
فوتو: Altaynews.kz
