قاي سالادا جالاقى ءوستى؟

ەكونوميكا • 27 اقپان، 2021

قاي سالادا جالاقى ءوستى؟

45 رەت كورسەتىلدى

2020 جىلدىڭ ءتورتىنشى توقسانىندا دەنساۋلىق ساقتاۋ جانە الەۋمەتتىك قىزمەتتەر سالاسىندا جالاقى ايتارلىقتاي ءوسىم كورسەتكەن. ناقتىراق ايتقاندا، ءبىر جىلدا 32 پايىزعا ارتقان.

اباي قازبەك ۇلى

اتالعان سالالاردا جىلدىڭ سوڭعى توقسانىنداعى ورتاشا جالاقى 197،4 مىڭ تەڭگە، الدىڭعى جىلمەن سالىستىرعاندا 32،1 پايىزعا جوعارى بولعان. بۇل 2015 جىلدان بەرى تىركەلگەن ەڭ جوعارعى جىلدىق ءوسىم. ينفلياتسيانى ەسەپتەگەندە تولەم قابىلەتىنىڭ شىنايى ءوسىمى 23،1 پايىزدى قۇراعان.

Ranking.kz اگەنتتىگى ەلىمىزدە ورتاشا ايلىق جالاقىنىڭ 14،3 پايىز نەمەسە 233،1 مىڭ تەڭگەگە وسكەنىن حابارلايدى. دەنساۋلىق ساقتاۋ جانە الەۋمەتتىك قىزمەتتەر سالاسىنداعى ايلىق جالاقى ەلدەگى ورتاشا جالاقىدان 15 پايىزعا از.

دەنساۋلىق ساقتاۋ مينيسترلىگى مەن قازاقستان سالالىق كاسىپوداق ۇيىمى اراسىندا قول قويىلعان كەلىسىمگە سايكەس 2020 جىلدىڭ 1 قاڭتارىنان باستاپ دارىگەرلەردىڭ ورتاشا ايلىق جالاقىسى 30، مەديتسينالىق قىزمەتكەرلەر جالاقىسى 20 پايىزعا كوبەيۋى ءتيىس بولعان. 2021-2023 جىلدارى الەۋمەتتىك سالا جۇمىسشىلارىنىڭ جالاقىسى ەكى ەسە كوبەيمەك: 2021 جىلدىڭ 1 قاڭتارىنان باستاپ – 50، 2022 جىلدان باستاپ – 25، 2023 جىلدان باستاپ تاعى 25 پايىزعا. مينيستر الەكسەي تسويدىڭ ايتۋىنشا، 2023 جىلى دارىگەرلەردىڭ ورتاشا جالاقىسى ەلدەگى ورتاشا جالاقىدان 2 ەسە جوعارى بولادى.

وڭىرلەر ءبولىنىسى بويىنشا، ەڭ كوپ جالاقىنى ماڭعىستاۋ وبلىسى (207،2 مىڭ تەڭگە)، الماتى قالاسى (209،9 مىڭ تەڭگە)، جامبىل وبلىسى (156،2 مىڭ تەڭگە) جانە نۇر-سۇلتان قالاسىنىڭ (281،7 مىڭ تەڭگە) دارىگەرلەرى الادى. 2021 جىلدىڭ قاڭتار ايىنداعى جاعداي بويىنشا، قازاقستاندا دەنساۋلىق ساقتاۋ جانە الەۋمەتتىك قىزمەت سالاسىندا 8،2 مىڭ كومپانيا تىركەلگەن. ونىڭ 6،8 مىڭى شىن مانىندە جۇمىس ىستەپ تۇرعان مەكەمەلەر. ولاردىڭ 6 مىڭعا جۋىعى شاعىن كومپانيالار، ءىرى كاسىپورىندار سانى 549 بولسا، ورتا دەڭگەيدەگى كاسىپورىندار سانى – 395.

وسى ەكى سالادا ەڭبەك ەتەتىن جۇمىسشىلار سانى شامامەن 426،4 مىڭ ادام. ولار ەلدەگى بارلىق جۇمىسشىلاردىڭ 12،1 پايىزىن قۇرايدى.