تۇركيا پوليتسياسى پرەمەر-مينيستر تايپ ەردوگاننىڭ وتستاۆكاعا كەتۋىن تالاپ ەتكەن جۇزدەگەن ەرەۋىلشىنى ىستامبۇلداعى تاكسيم الاڭىنان ىعىستىرىپ شىعاردى. بۇل تۋرالى يتار-تاسس حابارلادى.
«ال-مايادين» تەلەارناسىنىڭ اقپارى بويىنشا, ءتارتىپ ساقشىلارى ەرەۋىلشىلەرگە قارسى سۋ اتقىش پەن پلاستيكالىق وقتار قولدانعان. ەرەۋىلشىلەر تاكسيم الاڭىنا 27 جەلتوقسان كۇنى ساعات 19:00-دەن باستاپ جينالا باستاعان ەكەن. پوليتسيا قىزمەتكەرلەرى ۇيىمداسقان ەرەۋىلدى بولدىرماي, پرەمەر قارسىلاستارىن بىردەن تاراتىپ جىبەرگەن.
نارازىلىق اكتسياسى تۇركيا بيلىگىندە ورىن الىپ جاتقان جانجالعا ورايلاستىرىلىپ وتىر. مۇنداعى جەمقورلىققا قارسى اۋقىمدى ءىس-شارا بارىسىندا 50 كۇدىكتى قاماۋعا الىنعان. ولاردىڭ اراسىندا بۇرىنعى ۇكىمەتتە قىزمەت ەتكەن ءۇش ءمينيستردىڭ ۇلدارى بار. ەندى تۇركيا باس پروكۋراتۋراسى مينيسترلەردىڭ وزدەرىنە دە قاتىستى قىلمىستىق ءىس قوزعايتىن كورىنەدى.
وتكەن سارسەنبىدە تايپ ەردوگان ۇكىمەتتە ءبىراز وزگەرىستەر ەنگىزىلىپ جاتقانىن مالىمدەدى.
ايدار ورىسباەۆ.
دەرەككوز: Itar-tass.com
فوتو: Itar-tass.com
