ا.بايتۇرسىن ۇلى اتىنداعى قوستاناي وڭىرلىك ۋنيۆەرسيتەتىندە بىلتىر ۆولونتەرلىكپەن اينالىساتىن ستۋدەنت-جاستاردىڭ سانى ەكى ەسەدەن ارتىق وسكەن. بۇعان ەلباسى تاپسىرماسىنا سايكەس اتالمىش ۋنيۆەرسيتەتتە ءتيىمدى جۇزەگە اسىرىلىپ جاتقان «الەۋمەتتىك ستۋدەنتتىك كرەديت» جوباسى جانە قوستانايعا جۇمىس ساپارىمەن كەلگەن مەملەكەت باسشىسى قاسىم-جومارت توقاەۆتىڭ جاستار سارايىندا قوستانايلىق ستۋدەنتتەرمەن كەزدەسىپ, بىلتىرعى جىلدى «ۆولونتەر جىلى» دەپ جاريالاۋى ىقپالىن تيگىزىپ وتىر. اتالمىش جوبا بويىنشا ستۋدەنتتەردىڭ ۆولونتەرلىك قىزمەتىنە اقى تولەنەدى.
جوعارى وقۋ ورنىنداعى ۆولونتەرلەر قوزعالىسىنا «ايالى جاستار» ستۋدەنتتىك كلۋبى جەتەكشىلىك ەتەدى. ازاماتتىق ۇستانىمى قالىپتاسقان, بەلسەندى ەرىكتى جاستار وسى كلۋبتىڭ اينالاسىنا بىرىگىپ, ءتۇرلى قايىرىمدىلىق شارالارىنا قاتىسادى. بىلتىر قاڭتار ايىنان باستاپ ۋنيۆەرسيتەت جاستارى Qazvolunteer.kz ينتەرنەت پورتالىنا تىركەلىپ, ءتۇرلى مەكەمەلەر ۇسىنعان پورتالداعى بوس ۆاكانسيالاردى تاڭداپ الىپ, «الەۋمەتتىك ستۋدەنتتىك كرەديت» جوباسىنا بەلسەندى اتسالىسا باستادى.
اتالعان جوبا اياسىندا ستۋدەنتتەر كوبىنە جەرگىلىكتى ەمحانالارعا بارىپ, قارت كىسىلەر مەن سوزىلمالى دەرتكە شالدىققان ناۋقاستاردىڭ مەكەنجايىنا ءدارى-دارمەكتەر, ازىق-ت ۇلىك پاكەتتەرىن جەتكىزىپ بەرىپ تۇرعان. بىلتىر ىندەت اسقىنىپ كەتكەندە ەمدەۋ مەكەمەلەرىنە جان-جاقتان كەلىپ جاتقان وتتەگى باللوندارى مەن گۋمانيتارلىق كومەك زاتتارىن تۇسىرىسكەن.
– سونىمەن قاتار ءبىزدىڭ ۆولونتەرلەر ينكليۋزيۆتى ءبىلىم بەرۋ, قازاق ءتىلى, اعىلشىن ءتىلى, كومپيۋتەرلىك ساۋاتتىلىقتان قوسىمشا ساباق بەرۋ, وبلىس ورتالىعىندا اعاش كوشەتتەرىن ەگۋ, ەگدە جاستاعى ادامدارعا قولقابىس ەتۋ جۇمىستارىمەن اينالىستى. ءبىز «قارجى ورتالىعى» اكتسيونەرلىك قوعامىنا ءاربىر ەرىكتىنىڭ ناقتى اتقارعان جۇمىسى تۋرالى ەسەپ بەرىپ وتىرامىز. ولار ەسەپتى تەكسەرىپ, ستۋدەنتتەردىڭ جەكە ەسەپشوتىنا تولەماقىسىن جىبەرەدى. ۆولونتەر 20 ساعات جۇمىس ىستەسە, 20 مىڭ تەڭگە, ال 50 ساعات جۇمىس ىستەسە, 50 مىڭ تەڭگە الادى, – دەدى «ايالى جاستار» ستۋدەنتتىك كلۋبىنىڭ جەتەكشىسى ۆيكتوريا گاان.
«الەۋمەتتىك ستۋدەنتتىك كرەديت» جوباسىنا قاتىساتىن ستۋدەنتتەر بالالار ءۇيى مەن قارتتار ۇيىنە, باسقا دا الەۋمەتتىك مەكەمەلەرگە ۆولونتەر رەتىندە بارىپ, كومەك كورسەتىپ تۇرادى.
– بىلتىر ءبىزدىڭ گۋمانيتارلىق ماماندىقتار بويىنشا ءبىلىم الىپ جاتقان جوعارى كۋرس ستۋدەنتتەرى جىل بويى قوستانايداعى وبلىستىق بالالار ءۇيى مەن كامەلەتكە تولماعاندارعا ارنالعان بەيىمدەۋ ورتالىعىنىڭ تاربيەلەنۋشىلەرىنە ونلاين ساباقتار مەن ءتۇرلى ترەنينگتەر وتكىزدى. ولاردىڭ بارىنە «الەۋمەتتىك ستۋدەنتتىك كرەديت» بويىنشا اقى تولەنىپ تۇردى. مىسالى, وتكەن ايدا الەۋمەتتىك مەكەمەلەردە ساباق بەرىپ جۇرگەن 34 ستۋدەنتتىڭ 9-ى 50 ساعات جۇكتەمە ورىنداپ, 50 مىڭ تەڭگەدەن الدى, ال 25 ستۋدەنتكە 20 ساعاتتىق جۇمىسى ءۇشىن 20 مىڭ تەڭگەدەن تولەندى. ءبىز جاستار رەسۋرستىق ورتالىعىمەن تىعىز بايلانىستا جۇمىس ىستەيمىز. ستۋدەنتتەرگە جۇمىستى كوبىنە وسى ورتالىقتىڭ ماماندارى تاۋىپ بەرەدى. قازىر ولار بىرنەشە جاڭا جوبا ۇسىنىپ وتىر, – دەدى ۋنيۆەرسيتەتتىڭ جاستار ءىسى جونىندەگى كوميتەتىنىڭ مامانى اينۇر قاناتقىزى.
ۆولونتەر ستۋدەنتتەر احمەت بايتۇرسىن ۇلى اتىنداعى ۋنيۆەرسيتەتكە قاراستى ينستيتۋتتار مەن كافەدرالاردا ۇيىمداستىرىلاتىن قايىرىمدىلىق شارالارىنا دا اتسالىسىپ تۇرادى. ماسەلەن, قاڭتار ايىندا وتكەن «مەن – دونورمىن» شاراسىنا 50 شاقتى ستۋدەنت قاتىسىپ, قان تاپسىردى. ۋنيۆەرسيتەت جاستارى ء«بىز – بىرگەمىز!» اكتسياسى اياسىندا ۇلى اعارتۋشى ى.التىنسارين كەسەنەسىنىڭ اۋماعىن تازارتىپ تۇرۋدى ءوز مويىندارىنا العان. سونداي-اق تۇراقتى تۇردە جالعىزباستى قارتتاردىڭ ۇيلەرىنە بارىپ, قار كۇرەپ, ازىق-ت ۇلىگىن اكەپ بەرىپ, قولعابىس كورسەتىپ تۇرادى. بۇعان قوسا, ەرىكتى ستۋدەنتتەر سوڭعى ءۇش جىل ىشىندە ءتۋابىتتى دەرتكە شالدىققان 6 بالانىڭ ەمدەلۋىنە قول ۇشىن سوزىپ, قايىرىمدىلىق شارالارىن ۇيىمداستىرۋ ارقىلى قارجى جيناپ بەرگەن.
– قازىر, وكىنىشكە قاراي, پاندەمياعا بايلانىستى ۆولونتەرلەرگە «الەۋمەتتىك ستۋدەنتتىك كرەديت» جوباسى بويىنشا جۇمىس ۇسىناتىن مەكەمەلەر ازايىپ قالدى. سوعان قاراماستان, كوپتەگەن ستۋدەنتتەر ۆولونتەرلىكپەن جوبادان تىس اينالىسىپ ءجۇر. ولارعا ۋنيۆەرسيتەت باسشىلىعى دا بارىنشا قولداۋ كورسەتىپ وتىرادى. تاياۋدا عانا وزىمىزبەن بىرگە ۋنيۆەرسيتەتتە وقيتىن سۇلتانمۇرات تاشەنوۆ قىمبات وتا جاساتتى. ءبىز ءوز تاراپىمىزدان قايىرىمدىلىق اكتسياسىن وتكىزدىك. «تەڭىز تامشىدان قۇرالادى» دەمەكشى, وقىتۋشىلار مەن ستۋدەنتتەر بولىپ سۇلتانمۇراتتىڭ ءارى قاراي تەز بەيىمدەلىپ, اياققا تۇرىپ كەتۋىنە دەمەۋ بولاتىن قارجى جيناپ بەردىك. ءبىز ءتۇرلى قايىرىمدىلىق شارالارىن جىل ون ەكى اي بويى ۇزبەي وتكىزىپ تۇرامىز. قارتتاردىڭ ءۇي شارۋاسىنا كومەكتەسەمىز, ال بالالار ۇيىندەگى بالعىندارعا تاڭەرتەڭگىلىك ويىن-ساۋىق شارالارىن, تانىمدىق ويىندار مەن ترەنينگتەر ۇيىمداستىرامىز, – دەدى ۆيكتوريا گاان.
بىلتىر كۇزدە ا.بايتۇرسىن ۇلى اتىنداعى ۋنيۆەرسيتەت پەن ءو.سۇلتانعازين اتىنداعى پەداگوگيكا ينستيتۋتى قوسىلىپ, وڭىرلىك ۋنيۆەرسيتەت بولىپ قايتا قۇرىلعاندا ەكى ءبىلىم ورداسىنىڭ ۆولونتەرلىك كلۋبتارى دا ءبىر ۇيىمعا بىرىككەن. سودان بەرى ەرىكتىلەر سانى ەداۋىر كوبەيىپ, شاراپاتتى جۇمىستىڭ اۋقىمى دا كەڭەيە تۇسكەن.
قازىر ۆولونتەرلەر كارانتين تالاپتارىنا بايلانىستى بالالار ۇيلەرىنە بارا المايدى. الايدا ولار «ارنايى الەۋمەتتىك قىزمەت كورسەتۋ ورتالىعى» مەن وتباسىلىق ۇلگىدەگى «جانۇيا» بالالار ۇيىندەگى بالعىندارعا اپتا سايىن ZOOM پلاتفورماسى ارقىلى وفلاين رەجىمىندەگى بەينەكونفەرەنتسيالار ۇيىمداستىرىپ, بالالارمەن بىرگە ءتۇرلى ويىندار ويناپ, سۋرەتتەر سالادى, بىرنەشە توپقا ءبولىنىپ, ۆيكتورينالىق ويىندار ويناتادى. ودان قالدى, سەرگىتۋ جاتتىعۋلارىن جاساپ, بي بيلەپ, ءان ايتادى. بالالارعا كەرەگى – ۇلكەندەردىڭ نازارى مەن جىلى قاباعى عوي. ۆولونتەرلەر كوپ بالالى وتباسىلاردا تاربيەلەنىپ جاتقان وقۋشىلارمەن دە ونلاين بايلانىسقا شىعىپ, ولاردىڭ ءۇي تاپسىرماسىن ورىنداۋىنا كومەكتەسىپ, تانىمدىق ءمانى بار دامىتۋ ساباقتارىن وتكىزىپ تۇرادى.
بۇگىندە قوستاناي ۋنيۆەرسيتەتىندە وقيتىن ەرىكتى جاستاردىڭ كوبى قاشىقتان ءبىلىم الىپ جاتىر. ال وبلىس ورتالىعىندا قالعان ۆولونتەرلەر قالالىق ارداگەرلەر كەڭەسىنەن تىل ەڭبەككەرلەرىنىڭ ءتىزىمى مەن تۇرعىلىقتى مەكەنجايىن الىپ, قامكوڭىل قاريالاردىڭ اۋلاسىن سوڭعى كۇندەرى جاۋعان قالىڭ قاردان تازارتۋعا كىرىستى.
قوستاناي وبلىسى
