– ىندەتكە قارسى ۆاكتسينا ەكى مارتە سالىنۋى ءتيىس. اقپان ايىنىڭ باسىندا وبلىستىڭ 1 200 مەديتسينا قىزمەتكەرى ءبىرىنشى ۆاكتسينانى الدى. ەندى ولار اراعا 21 كۇن سالىپ, ەكىنشى رەت ەكپە قابىلداپ جاتىر, – دەدى وبلىستىق دەنساۋلىق ساقتاۋ باسقارماسىنىڭ ءباسپاسوز حاتشىسى كسەنيا جىلقىباەۆا.
وڭىردە Covid-19-عا قارسى ەكپە جۇمىستارى كەزەڭ-كەزەڭىمەن جۇزەگە اسىرىلادى. مەديتسينا قىزمەتكەرلەرىنەن كەيىن كەزەك ۆيرۋس جۇقتىرۋ قاۋپى جوعارى ساناتقا جاتاتىن مۇعالىمدەرگە كەلەدى. ودان كەيىن جاپپاي تەگىن ەكپە باستالادى. بۇل كەزەڭدە ەكپەنى اركىم ءوز قالاۋى بويىنشا قابىلداي الادى.
وبلىستىق دەنساۋلىق ساقتاۋ باسقارماسى وكىلدەرىنىڭ ايتۋىنشا, الداعى اپتادا قوستانايعا 4 500 ۆاكتسينا قۇتىسى كەلەدى. ونى باسقارمانىڭ جاۋاپتى ءبولىمى قابىلداپ الىپ, ارنايى توڭازىتقىشتارعا سالىپ وبلىس ەمحانالارىنا جونەلتەدى.
كوروناۆيرۋسقا قارسى كۇرەس جونىندەگى شتابتىڭ مالىمەتىنشە, 20 اقپاندا وڭىردە COVID-19-دىڭ 69 جاعدايى تىركەلگەن. ىندەت جۇقتىرعانداردىڭ كوبى – وبلىس ورتالىعىنىڭ تۇرعىندارى. ودان كەيىنگى ورىندا رۋدنىي, جىتىقارا, ليساكوۆ قالالارى تۇر. التىنسارين, دەنيسوۆ اۋداندارىندا دا ىندەت جۇقتىرعان ءبىرلى-ەكىلى ناۋقاس تىركەلگەن. جالپى, ايماقتا بىلتىرعى 3 ساۋىردەن بەرى 11 851 ادام ىندەت جۇقتىرىپ, 10 325 ناۋقاس ەمدەلىپ شىققان.
قوستاناي وبلىسى
