قازىر وتباسى ماسەلەلەرىن رەتتەۋدىڭ بالامالى ادىستەرىنە باسىمدىق بەرىلىپ وتىرعاندىقتان, سوت ورىندارىنىڭ وكىلدەرى وتباسىلىق تەراپيا اياسىندا جۇمىس ىستەيتىن مۇنداي ورتالىقتاردىڭ ءار شاڭىراقتاعى تاتۋلىقتىڭ ساقتالىپ قالۋىنا تيگىزەتىن ىقپالى مول دەپ بىلەدى.
قوستاناي قالالىق سوتىنىڭ توراعاسى قانات شاقاروۆتىڭ ايتۋىنشا, سوڭعى جىلدارى جەرگىلىكتى سوت ورگاندارىنىڭ جۇمىسىندا اجىراسقان وتباسىلارعا قاتىستى سوت وتىرىستارى جيىلەپ كەتكەن. ماسەلەن, قالالىق سوتقا 2019 جىلى نەكە شارتىن بۇزۋ تۋرالى – 1400, ال 2020 جىلى 1100 ارىز كەلىپ تۇسكەن. سوت توراعاسى «وتباسى help» فرونت-كەڭسەسىنىڭ ىسكە قوسىلۋى مۇنداي ارىزداردى ازايتادى دەگەن سەنىم ءبىلدىردى.
– ءبىز قيىن جاعدايعا دۋشار بولعان وتباسىلارعا پسيحولوگيالىق كومەك كورسەتەمىز. ەرلى-زايىپتىلاردىڭ اراسىنداعى ءوزارا سۇيىسپەنشىلىك پەن سىيلاستىقتى قالپىنا كەلتىرۋگە تىرىسامىز. مۇنداي وتباسى مۇشەلەرى كوبىنە كۇيزەلىس ۇستىندە جۇرەدى. سوندىقتان ولارعا پسيحوتەراپەۆت مامانداردىڭ, دارىگەر-ناركولوگتاردىڭ, زاڭگەرلەردىڭ كومەگىن ۇسىنامىز. جاس وتباسىلارعا, جاس اكەلەرگە, كەلىندەرگە ارنالعان ءتۇرلى ترەنينگتەر ۇيىمداستىرىپ, ولاردىڭ جۇمىسقا ورنالاسۋىنا دا كومەكتەسەمىز, – دەدى فرونت-وفيس جەتەكشىسى نەسىبەلى بيكەنوۆا.
«وتباسى help» فرونت-كەڭسەسى ءوزارا ارىپتەستىك تۋرالى مەموراندۋم اياسىندا قازىر قوستاناي قالالىق سوتىمەن تىزە قوسىپ جۇمىس ىستەپ جاتىر. فرونت-كەڭسە جەتەكشىسىنىڭ سوزىنە قاراعاندا, «وتباسى help» كەلەشەكتە وتباسىلىق ماسەلەلەرگە قاتىسى بار وزگە دە مەملەكەتتىك ورگاندارمەن جانە قوعامدىق بىرلەستىكتەرمەن ىنتىماقتاستىق ورناتپاق.
قوستاناي وبلىسى
