اتىراۋ وبلىسىنىڭ اۋەجايىندا 80 جولاۋشى سەرگەلدەڭگە ءتۇستى. بۇل تۋرالى «24 kz» حابارلادى.
Bek Air اۋە كومپانياسىنىڭ ۇشاعى اتىراۋدان الماتى قالاسىنا تاڭعى ساعات 10-دا ۇشۋى ءتيىس بولاتىن. الايدا, بەلگىلەنگەن مەرزىمدە ۇشاق كوككە كوتەرىلمەگەن. مۇنىڭ سەبەبىن جەرگىلىكتى اۋە كومپانياسى جولاۋشىلارعا تۇسىندىرمەگەن دە ەكەن. شىدامى تاۋسىلعانداردىڭ ءبىرسىپىراسى ۇيلەرىنە كەتىپ قالىپتى. «مەن نە ىستەرىمدى بىلمەي تۇرمىن. اقشام دا قالمادى. جولاۋشىلاردىڭ اراسىندا ەرتەڭ الماتى ارقىلى رەسەي, وزبەكستان مەن قىتاي ەلىنە ۇشاتىن ازاماتتار دا بار»,-دەيدى التىن زيابدينوۆا.
قازىر بارار جەرى جوق جولاۋشىلار اۋەجايدا ۇشاقتى سارعايا كۇتىپ وتىر. ارالارىندا بۇلدىرشىندەر دە بار ەكەن. اقشاسى بارلارى قىمبات رەيستەرگە بيلەت ساتىپ العان كورىنەدى. جولاۋشىلاردىڭ ايتۋى بويىنشا, اۋە كومپانياسى وسى ۋاقىتقا دەيىن ولارعا مەديتسينالىق كومەك كورسەتپەگەن.
بىزگە كەلىپ تۇسكەن سوڭعى اقپاراتتا اۋە كومپانياسىنىڭ تاڭعا دەيىن جولاۋشىلارعا جاتىن تاۋىپ بەرۋگە ۋادە بەرگەنى جازىلعان. بىراق, ونداعى داۋ-دامايدىڭ ازىرگە باسىلار ءتۇرى جوق.
باقىتبەك كەنەش ۇلى.
دەرەككوز: «24 kz».
فوتو: Wikipedia.org
