الەمگە ايگىلى Coursera پلاتفورماسى قازاقستاندىقتاردى وقىتۋ ءۇشىن 2020 جىلعى 15 قىركۇيەكتەن 2021 جىلعى 14 اقپانعا دەيىنگى كەزەڭگە كۆوتالار ءبولدى. جوبانى ىسكە اسىرۋ قورىتىندىسى بويىنشا 15 مىڭنان استام ازامات الەمنىڭ جەتەكشى ساراپشىلارىنىڭ, وقۋ ۇيىمدارى مەن ۋنيۆەرسيتەتتەرىنىڭ, سونىڭ ىشىندە GOOGLE, IBM, Facebook, Stanford University, Yale University, Johns Hopkins University, Princeton University جانە ت. ب. 500-گە جۋىق كۋرستارىنان ءوتتى. جوباعا قاتىسۋشىلار بارلىعى 335 مىڭ ساعات وقۋدان ءوتتى, 3 مىڭعا جۋىق ادام ەكى جانە ودان دا كوپ كۋرستاردى اياقتاعان.
قازاقستاندىقتار اراسىندا IT جانە كومپيۋتەرلىك عىلىمدار, بيزنەس, تىلدەردى وقىتۋ, گۋمانيتارلىق جانە الەۋمەتتىك عىلىمدار, جەكە جامۋ سياقتى باعىتتار سۇرانىسقا يە بولدى. توپ-5 كۋرسقا «Teach English Now! Technology Enriched Teaching», «Programming for Everybody (Getting Started with Python)», «Business English: Basics», سونىمەن قاتار «جوبالار مەن ونىمدەرمەن جۇمىس جاساۋداعى Agile مەن Scrum» جانە «Python-عا ەنۋ» كىرەدى.
ونلاين وقىتۋ اسىرەسە جاستار اراسىندا تانىمال بولدى: ءبىلىم الۋشىلاردىڭ ەڭ كوپ سانى «26-دان 30 جاسقا دەيىن» جانە «21-دەن 25 جاسقا دەيىن» جاس ساناتىنا جاتادى. ودان كەيىن «31-35 جاس» جانە «20 جاسقا دەيىنگى» توپتار.
جوبا قاتىسۋشىلارى كوممۋنيكاتسيا, كاسىپكەرلىك, كوشباسشىلىق جانە مەنەدجمەنت, كومپيۋتەرلىك باعدارلامالاۋ, سونداي-اق بيزنەس-تالداۋ داعدىلارىن يگەردى جانە دامىتتى.
قاتىسۋشىلاردىڭ قالدىرعان پىكىرلەرىنە سايكەس, كوپشىلىگى Coursera ەڭ تانىمال ونلاين وقىتۋ پلاتفورماسىندا سۇرانىسقا يە داعدىلاردى ۇيرەنۋگە مۇمكىندىك بەرىلگەنىنە قۋانىشتى بولدى.
