القالى جيىنعا قاتىسۋشىلار ەلىمىزدەگى بارلىق مەكتەپتەردىڭ ماڭدايشالارىنا, ولاردىڭ تىلدىك ەرەكشەلىكتەرىنە قاراماستان, ىبىراي اتامىزدىڭ جاستاردى وقۋ مەن بىلىمگە شاقىراتىن «كەل, بالالار, وقىلىق!» دەگەن ۇندەۋىن جازىپ قويۋ كەرەك. مۇنى بيىل ۇلى اعارتۋشىنىڭ 180 جىلدىق تويىنا ورايلاستىرىپ, جۇمىلا جۇزەگە اسىرساق يگى دەگەن باستاما كوتەردى.
ارقالىق پەداگوگيكا ينستيتۋتى ۇيىمداستىرعان عىلىمي كونفەرەنتسيا ۇلى اعارتۋشىنىڭ 180 جىلدىعىنا وراي ۇيىمداستىرىلىپ وتىر. عىلىمي جيىندى اتالمىش جوعارعى وقۋ ورنىنىڭ باسشىسى سەيىتبەك قۋانىشباەۆ اشتى.
كونفەرەنتسيادا ى.ءالتىنساريننىڭ اعارتۋشىلىق-پەداگوگيكالىق قىزمەتىنىڭ ماڭىزى مەن ۇلى پەداگوگتىڭ جاھاندىق سىن-قاتەرلەر مەن وزگەرىستەر داۋىرىندەگى پەداگوگيكالىق يدەيالارىنىڭ بۇگىنگى كۇننىڭ ماسەلەلەرىمەن ساباقتاستىعى تۋرالى تىڭ پىكىرلەر قوزعالدى, دەدى ينستيتۋت رەكتورى.
عىلىمي كونفەرەنتسياعا ىبىرايتانۋ سالاسىندا ەڭبەكتەنىپ جۇرگەن وتاندىق عالىمدار مەن تۇركيا, رەسەي عالىمدارى قاتىستى. ارقپي «رۋحاني جاڭعىرۋ» جوبالىق كەڭسەسىنىڭ ديرەكتورى رومان ايماعامبەت ۇلىنىڭ ايتۋىنشا, ەلباسىنىڭ «رۋحاني جاڭعىرۋ» باعدارلاماسى مەن « ۇلى دالانىڭ جەتى قىرى» اتتى باعدارلامالىق ماقالاسىنىڭ اياسىندا بۇگىندە تاريحىمىزعا قايتا ءۇڭىلىپ, تالاي-تالاي تاريحي مۇرالارىمىزدى زەردەلەپ جاتىرمىز. قازىرگى كەزدە ءالتىنساريننىڭ قىزمەتى مەن ەڭبەگىنە عالىمدار جاڭاشا باعا بەرۋدە. كونفەرەنتسيا بارىسىندا ۇلى اعارتۋشىنىڭ پەداگوگيكالىق مۇراسىنىڭ جاڭاشىلدىعى مەن تاريحي ماڭىزى تۋرالى كوپتەگەن عىلىمي توپشىلاۋلار ايتىلدى, دەدى جوبالىق كەڭسە جەتەكشىسى.
