ۆ توبىنداعى كەزدەسۋلەردىڭ بارلىعى دا «ارەنا ريگادا» وتەدى. بۇل كەشەننىڭ ىرگەتاسى 2004 جىلدىڭ 17 ماۋسىمىندا قالانىپ, 2006 جىلدىڭ اقپانىندا پايدالانۋعا بەرىلدى. قۇرىلىس جۇمىستارى مەن جابدىقتاۋعا كەتكەن قاراجات سوماسى – 20 ميلليون لات. 10 300 كورەرمەنگە ەسەپتەلگەن سپورتتىق نىساننىڭ جالپى كولەمى 22 568 شارشى مەتردى قۇرايدى. ءار جىلدارى «ارەنا ريگادا» كوپتەگەن حالىقارالىق سپورتتىق جارىس, ءتۇرلى شوۋ مەن الەمگە ايگىلى ەسترادا جۇلدىزدارىنىڭ قاتىسۋىمەن كەرەمەت كونتسەرتتەر وتكەن. ال ا توبىنداعى باسەكەلەردى وليمپيادالىق ورتالىق قابىلدايدى. بۇل كەزدەسۋلەردە رەسەي, شۆەتسيا, چەحيا, شۆەيتساريا, سلوۆاكيا, دانيا, ۇلىبريتانيا جانە بەلارۋس قۇرامالارى قۇش سىناسادى.
سپورت تاريحىنىڭ سارعايعان بەتتەرىن پاراقتاساق, شايبالى حوككەيدەن الەم چەمپيوناتى تۇڭعىش رەت 1920 جىلى وتكەنىن اڭعارامىز. باستاپقى كەزدەرى كانادا قۇراماسىنىڭ قارقىنى تىم كۇشتى بولدى. 1920-1953 جىلدار ارالىعىندا ايتۋلى جارىستىڭ جالاۋى 20 مارتە جەلبىرەسە, سونىڭ 15-ىندە ۇيەڭكى جاپىراقتار ەلىنىڭ ورەندەردى قارسىلاس شاق كەلتىرمەدى. سونداي-اق چەحوسلوۆاكيا ەكى رەت جانە اقش پەن ۇلىبريتانيا ءبىر رەتتەن باس جۇلدەنى ولجالادى. ودان كەيىن كسرو حوككەيشىلەرى كەرەمەت قارقىن الدى. 1954 جىلى ستوكگولمدە وتكەن الەمدىك دوداعا تۇڭعىش رەت قاتىسىپ وتىرعانىنا قاراماستان اركادي چەرنىشەۆ پەن ۆلاديمير ەگەروۆ باپتاعان كوماندا بارلىق قارسىلاسىن بەت قاراتپاي ۇتىپ, چەمپيوندىق تۇعىرعا كوتەرىلدى. تىپتەن, ماقتاۋلى كانادالىقتاردىڭ وزدەرى كەڭەس وداعىنىڭ وكىلدەرىنە جارىتىپ قارسىلىق كورسەتە العان جوق. بۇل كەزدەسۋ 7:2 ەسەبىمەن اياقتالدى. سودان كەيىنگى كەزدەرى كانادا باستاعان كەيبىر كوماندالار ارا-تۇرا التىن تۇعىرعا كوتەرىلگەنىمەن, باس جۇلدەنى كوبىنە-كوپ كسرو قۇراماسى ولجالاعانىن جانكۇيەرلەر جاقسى بىلەدى. توقسانىنشى جىلداردىڭ باسىندا توز-توزى شىققان قىزىلدار يمپەرياسى تاريح ساحناسىنان كەتتى. سول كەزگە دەيىن ولار 22 مارتە چەمپيوندىق اتاقتى يەلەندى. ال كانادالىقتار بولسا, 19 مارتە توپ جاردى.
كەيىننەن كانادانىڭ حوككەيشىلەرى قارقىنىن قايتا كۇشەيتتى. ءبىر عاسىر ۋاقىت ارالىعىندا ۇيەڭكى جاپىراقتار ەلىنىڭ ويىنشىلارى 26 رەت الەم چەمپيونى اتانسا, چەحيا (چەحوسلوۆاكيانى قوسا العاندا) 12 جانە شۆەتسيا 11 مارتە تەڭدەسسىز دەپ تانىلدى. كسرو-نىڭ مۇراگەرى سانالاتىن رەسەي 5 رەت توپ جاردى. سونىمەن قاتار فينليانديا – 3, اقش – 2, ۇلىبريتانيا مەن سلوۆاكيا 1 رەتتەن جەڭىمپاز اتاندى. الەمدىك دودادا بارلىعى 11 مەملەكەتتىڭ وكىلدەرىنە عانا جەڭىس تۇعىرىنا كوتەرىلۋ باقىتى بۇيىرعان ەكەن. جوعارىدا اتالعان كوماندالاردان بولەك, شۆەيتساريا 3 كۇمىس پەن 8 قولانى ەنشىلەسە, گەرمانيا (گفر-دى قوسا العاندا) 2 كۇمىس پەن 2 قولانى قورجىنعا سالدى. ال اۋستريا قۇراماسى ەكى رەت ءۇشىنشى ورىندى يەمدەندى.
سوڭعى باس جارىستىڭ ناتيجەسىن تىلگە تيەك ەتسەك, 2015 جانە 2016 جىلدارى كانادانىڭ مىسى باسىم بولدى. چەحيادا وتكەن الەم چەمپيوناتىنىڭ فينالىندا ولار رەسەيدى ۇتسا, رەسەيدە ۇيىمداستىرىلعان دودادا فينليانديادان باسىم ءتۇستى. 2017 جانە 2018 جىلدارى شۆەتسيا قۇراماسى ەشكىمگە دەس بەرمەدى. العاشقى جارىستىڭ فينالىندا كانادالىقتاردى قاپى قالدىرعان سكانديناۆيا تۇبەگىنىڭ تۇلەكتەرى ەكىنشىسىنىڭ شەشۋشى تۇسىندا شۆەيتساريالىقتاردى شاڭ قاپتىردى. 2019 جىلعى چەمپيوناتتىڭ جالاۋى سلوۆاكيانىڭ براتيسلاۆا مەن كوشيتسە قالالارىندا جەلبىرەدى. بۇل جولى فينليانديانىڭ مەرەيى ۇستەم بولدى. سۋومي ەلىنىڭ سايىپقىراندارى فينالدا كانادانى 3:1 ەسەبىمەن جەڭدى. قولا مەدال ءۇشىن تارتىس رەسەي مەن چەحيا اراسىندا ءوتتى. بۇل باسەكەنىڭ تاعدىرى بۋلليت سوعۋ بارىسىندا انىقتالىپ, ورىستاردىڭ اسىعى الشىسىنان ءتۇستى. ەسەپ – 3:2.
قازاقستان قۇراماسى جايىندا ايتار بولساق, قازاقستاننىڭ ۇلتتىق قۇراماسى الەم چەمپيوناتىندا سەگىز مارتە باق سىنادى. جاسىراتىنى جوق, سول جارىستاردا ءبىزدىڭ جىگىتتەر كوڭىل كونشىتەرلىك ناتيجەگە قول جەتكىزە المادى. ەڭ ۇزدىك ناتيجەمىز – 12-ورىن. 2005 جىلى اۋستريانىڭ ۆەنا مەن ينسبۋرك قالالارىندا وتكەن بايراقتى باسەكەدە D توبىندا ونەر كورسەتكەن جەرلەستەرىمىز تۇساۋكەسەر كەزدەسۋدە گەرمانيانى (2:1) ۇتقانىمەن, شۆەيتساريا (1:2) مەن چەحياعا (0:1) ەسە جىبەردى. ەكىنشى كەزەڭدەگى باسەكەلەردىڭ بارلىعىندا جەڭىلىستىڭ كەرمەك ءدامىن تاتتى. تارقاتىپ ايتساق, بەلارۋستەن 0:2, رەسەيدەن 1:3 جانە سلوۆاكيادان 1:3 ەسەبىمەن ۇتىلدىق. وسىلايشا, سلوۆەنيا, دانيا, گەرمانيا جانە اۋستريادان وزىپ, 12-ساتىعا تابان تىرەدىك. ال وزگە جارىستارداعى كورسەتكىشتەرىمىز مىناداي: 1998 جىل – 15-ورىن, 2004 جىل – 13-ورىن, 2006 جىل – 15-ورىن, 2010 جىل – 16-ورىن, 2012 جىل – 15-ورىن, 2014 جىل – 16-ورىن جانە 2016 جىل – 16-ورىن. قىسقاسى, قازاقستان قۇراماسى جوعارى ديۆيزيوندا تۇراقتاي الماي كەلەدى.
2019 جىلى نۇر-سۇلتاندا ۇيىمداستىرىلعان دودادا ءبىرىنشى ورىندى يەلەنىپ, مىقتىلارمەن كۇش سىناسۋ قۇقىعىنا يە بولدىق. ەندى بالتىق جاعالاۋىندا جالاۋى جەلبىرەيتىن جارىستا جەرلەستەرىمىز بۇرىنعى كورسەتكىشىن جاقسارتادى دەپ ۇمىتتەنەمىز.
