ءۇش كۇنگە سوزىلعان ءىس-شارا بارىسىندا وبلىس پوليتسەيلەرى ساياجاي ۇيلەرىن, گاراجداردى, قورىقتار مەن شالعايداعى شارۋا قوجالىقتارىنا رەيد جۇرگىزدى. سونداي-اق, ءتيىستى ورىندارعا جەكە قارۋىن تىركەتكەن ازاماتتاردىڭ مەكەنجايىنا بارىپ, قارۋ تۇرعان ورىننىڭ زاڭ تالاپتارىنا سايكەستىگىن تەكسەردى.
قىلمىستىڭ الدىن الۋ شارالارىنىڭ ناتيجەسىندە, زاڭسىز ساقتالعان تەگىس ۇڭعىلى قارۋ تاركىلەندى. سونداي-اق, پوليتسيا بۇرىننان ىزدەستىرىپ جاتقان 5 قارۋ تابىلىپ, رەسەيگە قونىس اۋدارعان قارۋ يەلەرى تىركەۋدە تۇرعان قارۋلارىن پوليتسياعا تاپسىرماي كەتكەنى انىقتالدى.
قوستاناي قالاسى پب ازاماتتىق جانە قىزمەتتىك قارۋ اينالىمىن باقىلاۋ ءبولىمىنىڭ باستىعى ەلەنا سەميۆولوۆا وبلىس تۇرعىندارىنا ازاماتتىق قارۋدى ساقتاۋعا جانە الىپ جۇرۋگە بەرىلەتىن رۇقسات قۇجاتتىڭ مەرزىمىن وتكىزىپ الماۋ كەرەكتىگىن ەسكەرتتى.
- رۇقساتتى ۇزارتۋ تۋرالى ءوتىنىش پوليتسيا ورگاندارىنا رۇقسات مەرزىمى اياقتالعانعا دەيىن ءبىر اي بۇرىن بەرىلەدى. ءوتىنىش ەتسق ارقىلى, «ە-ليتسەنزيالاۋ» ينتەرنەت-پورتالىنا بەرىلەدى. ءوتىنىم بەرگەن كەزدە تۇرعىندار قارۋ قۇجاتتارىنا قوسا مەديتسينالىق قورىتىندى, قارۋدى قاۋىپسىز جاعدايدا ۇستاۋ ەرەجەلەرىن بىلەتىنى تۋرالى انىقتاما جانە مەملەكەتتىك باجدىڭ تولەنگەنى تۋرالى تۇبىرتەك اكەلۋى كەرەك. بۇدان كەيىن پوليتسيا قىزمەتكەرلەرى تۇرعىلىقتى مەكەنجايى بويىنشا قارۋدىڭ ساقتالۋ شارتتارىن تەكسەرەدى, - دەدى ە.سەميۆولوۆا.
ءبولىم باستىعى تىركەلمەگەن قارۋ مەن ونىڭ وق-دارىلەرىن ءوز ەركىمەن تاپسىرعان ادامدار قىلمىستىق جانە اكىمشىلىك جاۋاپكەرشىلىكتەن بوساتىلاتىنىن اتاپ ءوتتى.
