4 اقپاندا №2 كازتالوۆ اۋداندىق سوتىندا بۇل ءىس بويىنشا ۇكىم جاريالاندى. ۇكىمدى سوت ورىنداۋشىسى ايۆار بيجانوۆ جاريالادى.
«مەنىڭ قالام» باسىلىمىنىڭ حابارلاۋىنشا, جوعارى پەداگوگيكالىق كوللەدجدىڭ ەكىنشى كۋرس ستۋدەنتى 2020 جىلدىڭ كۇزىندە جۇكتى ەكەنىن بىلگەن. بىراق بۇل جاعدايدى قۇپيا ۇستاعان.
23 قاراشادا قىزدىڭ ءىشى اۋىرا باستايدى. شامامەن ساعات 16:00-دە قىزدىڭ اناسى دۇكەنگە كەتەدى, ال قالعان وتباسى مۇشەلەرى بولمەلەرىندە بولىپتى. قىز دالىزگە شىعا بەرىستە بوسانىپ قويادى. ەسەڭگىرەگەن كۇيىندە قايشىمەن نارەستەنىڭ كىندىگىن كەسىپ, نارەستەنى پوليەتيلەن پاكەتكە وراپ, جەكە ءۇيدىڭ قوراسىندا ورنالاسقان دارەتحاناعا تاستايدى. وسىلايشا, ول جاڭا تۋعان بالاسىن ءولتىردى. سودان كەيىن ول دالىزدەگى قاندى ءسۇرتىپ, بولمەسىنە كىرىپ جاتىپ قالادى. دۇكەننەن قايتىپ كەلگەن اناسى قىزىنىڭ جاعدايىن كورىپ, ونى جەدەل اۋرۋحاناعا جەتكىزدى.
ساراپشىنىڭ ايتۋىنشا, بالانىڭ ولىمىنە مەحانيكالىق اسفيكسيا سەبەپ بولعان. بالا شامامەن 8-8,5 ايىندا ءتىرى تۋعان. سوتتالۋشى كىناسىن تولىق مويىندادى. قىز جىگىتتىڭ بالا ءۇشىن جاۋاپكەرشىلىك الۋدان باس تارتقانىن جانە اتا-اناسىنىڭ رەاكتسياسىنان قورىققانىن ايتتى.
سوت ۇكىمىمەن قازتالوۆ اۋدانى جاڭاجول اۋىلىنىڭ تۇرعىنى قازاقستان رەسپۋبليكاسى قىلمىستىق كودەكسىنىڭ 100-بابى بويىنشا قىلمىس جاساعانى ءۇشىن كىنالى دەپ تانىلىپ, ەكى جىلعا باس بوستاندىعىنان ايىرىلدى.
ايدا ورالبەك
