وزگە ەلدىڭ ازاماتتىعىن الا تۇرا, مۇنىسىن رەسمي ورىنداردان ۇزاق ۋاقىت بويى جاسىرىپ كەلگەن تۇرعىندار دا جەتەرلىك. وتكەن جىلى ءدال وسىنداي ءۇش ازامات ەلدەن الاستاتىلىپ, 5 جىل مەرزىمگە قازاقستانعا قايتىپ ورالۋ قۇقىعىنان ايىرىلدى.
– زاڭ ورىندارىنىڭ قاتاڭ تالاپ قويعانىنا قاراماستان, ەكىنشى ەلدىڭ ازاماتتىعىن قابىلداپ «ەكى جەپ, بيگە شىققىسى» كەلەتىندەردىڭ قاتارى تىيىلار ەمەس. كوبى شەكارانىڭ ەكى بەتىندە دە ەركىن جۇرگىسى كەلەدى. ەكى ەلدەن بىردەي زەينەتاقى الىپ وتىرعاندار دا تابىلادى. ولار قر اقبتك-ءنىڭ 496-بابى بويىنشا اكىمشىلىك جاۋاپكەرشىلىككە تارتىلۋدا. ەل كونستيتۋتسياسىنىڭ 10-بابى مەن «ازاماتتىق تۋرالى» زاڭنىڭ 3-بابىنا سايكەس, قازاقستان ازاماتىنا باسقا مەملەكەتتىڭ ازاماتتىعىن قوسارلاپ الۋعا تىيىم سالىنادى. شەت مەملەكەتتىڭ ازاماتتىعىن قابىلداعان ادام وزگە ازاماتتىقا يە بولعان كۇننەن كەيىن وتىز كۇن ىشىندە مىندەتتى تۇردە بىزگە حابارلاسىپ, قازاقستان رەسپۋبليكاسىنىڭ پاسپورتى مەن جەكە كۋالىگىن قايتارىپ بەرۋى كەرەك. بۇلاي بولماعان جاعدايدا قازاقستان پاسپورتىن زاڭسىز پايدالانعانى ءۇشىن 100 ايلىق ەسەپتىك كورسەتكىش مولشەرىندە, سونداي-اق شەتەل ازاماتتىعىن العانى تۋرالى زاڭدا بەلگىلەنگەن مەرزىم ىشىندە حابارلاماعانى ءۇشىن 200 ايلىق ەسەپتىك كورسەتكىش مولشەرىندە ايىپپۇل سالىنادى. ءتىپتى اكىمشىلىك تارتىپپەن شەكارادان شىعارىلىپ جىبەرىلۋى دە مۇمكىن, – دەيدى وبلىستىق پوليتسيا دەپارتامەنتى كوشى-قون باسقارماسىنىڭ باسشىسى قايرات دۇتپاەۆ.
قوس پاسپورتپەن جۇرگەن ازاماتتاردى بۇرىن انىقتاۋ قيىن بولعانىمەن, كەيىنگى جىلدارى جۇزەگە اسىرىلعان تسيفرلاندىرۋدىڭ ناتيجەسىندە بۇل باعىتتاعى جۇمىستار دا ەداۋىر ىلگەرىلەي باستاعان.
باسقارما باسشىسىنىڭ ايتۋىنشا, مۇددەلى مەملەكەتتىك ورگاندار تاراپىنان قانداي دا ءبىر ازاماتتىڭ قوس تولقۇجاتپەن جۇرگەنى انىقتالعان جاعدايدا, بۇل اقپارات جەدەل تۇردە وبلىستىڭ كوشى-قون قىزمەتىنە جىبەرىلەدى. رەسمي ورىنداردىڭ مۇنداي ىنتىماقتاستىعى زاڭدى بەلدەن باسقانداردىڭ جولىن كەسۋگە ايتارلىقتاي سەپتىگىن تيگىزىپ وتىر.
– زەينەتاقى تولەمدەرىن جۇزەگە اسىراتىن مەملەكەتتىك ورگاندارمەن بىرلەسىپ جۇمىس ىستەپ جاتىرمىز. قازاقستاننان ءبىر, شەتەلدەن ەكى زەينەتاقى الىپ وتىرعان ازاماتتار بار. ولاردىڭ دەنى وسىدان 10-15 جىل بۇرىن شەتەل ازاماتىن قابىلداپ, كەيىن رايىنان قايتىپ قازاقستاندا قالىپ قويعان ەگدە جاستاعى ادامدار. مىسالى, بىلتىر رۋدنىي قالاسىندا رەسەي ازاماتتىعىن العان 5 ادام انىقتالىپ, بارلىعى اكىمشىلىك جاۋاپقا تارتىلدى. مۇنداي ازاماتتار ەكى ەلدەن زەينەتاقى الىپ وتىرعانىنا قاراماستان, كوبىنە قۋلىققا باسىپ زاڭ تالاپتارىنان حابارسىز ادامنىڭ كەيپىنە ەنىپ, جازادان جالتارىپ كەتۋگە تىرىسادى. بىراق زاڭ – جالپىعا ورتاق, – دەيدى ق.دۇتپاەۆ.
قوستاناي وبلىسى
