كەشە وبلىس اكىمدىگى ۇيىندە بەسىنشى شاقىرىلعان وبلىستىق ءماسليحاتتىڭ ءححى كەزەكتەن تىس سەسسياسى بولىپ ءوتتى. وعان قازاقستان رەسپۋبليكاسى پرەزيدەنتى اكىمشىلىگىنىڭ باسشىسى كارىم ءماسىموۆ قاتىستى.
كەشە وبلىس اكىمدىگى ۇيىندە بەسىنشى شاقىرىلعان وبلىستىق ءماسليحاتتىڭ ءححى كەزەكتەن تىس سەسسياسى بولىپ ءوتتى. وعان قازاقستان رەسپۋبليكاسى پرەزيدەنتى اكىمشىلىگىنىڭ باسشىسى كارىم ءماسىموۆ قاتىستى.
سەسسيادا وبلىس اكىمىنىڭ قىزمەتىنە جاڭادان تاعايىندالاتىن اكىمنىڭ كانديداتۋراسىنا كەلىسىم بەرۋ تۋرالى ماسەلە قارالدى. وسىعان بايلانىستى قازاقستان رەسپۋبليكاسى پرەزيدەنتى اكىمشىلىگىنىڭ باسشىسى كارىم ءماسىموۆ قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ جامبىل وبلىسىنىڭ اكىمى قىزمەتىنە بۇعان دەيىن جامبىل وبلىسى اكىمىنىڭ ءبىرىنشى ورىنباسارى بولىپ قىزمەت اتقارىپ كەلگەن كارىم ناسبەك ۇلى كوكىرەكباەۆتى ۇسىنعانىن جەتكىزدى. ەلباسى ۇسىنعان كانديداتتى قولداپ سەسسياعا جينالعان 27 دەپۋتات ءبىر اۋىزدان داۋىس بەردى.
بۇدان كەيىن كارىم ءماسىموۆ وبلىستىڭ اكتيۆ مۇشەلەرىنە جامبىل وبلىسىنىڭ بۇرىنعى اكىمى قانات بوزىمباەۆتىڭ پاۆلودار وبلىسىنا اكىم بولىپ تاعايىندالعانىن ايتىپ, ءسوز كەزەگىن ونىڭ وزىنە ۇسىندى. ق.بوزىمباەۆ سوڭعى ءتورت جىل ىشىندە وبلىستا اتقارىلعان جۇمىستارعا قىسقاشا توقتالىپ, اۋليەاتا ءوڭىرىنىڭ مەيماندوس حالقىن ەشقاشان ۇمىتپايتىنىن جانە ارقاشان قۇرمەتپەن ەسىنە الىپ جۇرەتىنىن جەتكىزدى.
بۇدان كەيىن ك.ءماسىموۆ اكتيۆكە جينالعاندارعا قازاقستان رەسپۋبليكاسى پرەزيدەنتى نۇرسۇلتان نازارباەۆتىڭ جارلىعىن وقىپ, كارىم ناسبەك ۇلى كوكىرەكباەۆتىڭ جامبىل وبلىسىنىڭ اكىمى قىزمەتىنە تاعايىندالعانىن حابارلادى. ەلباسىنىڭ جامبىل وبلىسىنا ساپارى كەزىندەگى تاپسىرمالارىنان تۋىندايتىن مىندەتتەردى دەر كەزىندە ورىنداۋ كەرەكتىگىنە توقتالدى.
ك.كوكىرەكباەۆ پاۆلودار وبلىسىنا اكىم بولىپ تاعايىندالعان ارىپتەسى ق.بوزىمباەۆقا اق جول تىلەپ, ەلباسى تاراپىنان وزىنە سەنىپ تاپسىرىلعان جاۋاپكەرشىلىگى زور لاۋازىمدى قىزمەتكە العىس سەزىمىن ءبىلدىرىپ, سەنىمدى اقتايتىنىن جەتكىزدى.
كوسەمالى ساتتىباي ۇلى,
«ەگەمەن قازاقستان».
جامبىل وبلىسى.
