وڭىردە ەڭ ءبىرىنشى كەزەكتە مەديتسينا قىزمەتكەرلەرى ۆاكتسينا الىپ جاتىر. بۇگىنگە دەيىن 365 دارىگەرگە رەسەيدىڭ «سپۋتنيك V» ۆاكتسيناسى ەگىلدى. رەسەيدەن اكەلىنگەن 1200 ۆاكتسينا تاۋسىلعان سوڭ, «قاراعاندى فارماتسەۆتىك كەشەنى» شىعارعان «گام-كوۆيد-ۆاك» پەن بعم بيولوگيالىق قاۋىپسىزدىك ماسەلەلەرى عىلىمي ينستيتۋتىنىڭ «QazCovid» ۆاكتسيناسى پايدالانىلاتىن بولادى.
بۇل تۋرالى وڭىرلىك كوممۋنيكاتسيا ورتالىعىندا وتكەن ءباسپاسوز جيىنىندا وبلىستىڭ باس سانيتارلىق دارىگەرى ەرمۇحانبەت داۋلەتباەۆ ءمالىم ەتتى.
«قازىر 18 جاسقا تولماعان جانە 65 جاستان اسقان تۇرعىندارعا ۆاكتسينا سالىنبايدى. مۇنىڭ «سپۋتنيك V» ۆاكتسيناسىنىڭ ساپاسىنا ەش قاتىسى جوق. ستاتيستيكالىق مالىمەتتەردىڭ ازدىعىنان وسىنداي ۇيعارىمعا كەلىپ وتىرمىز. ستاتيستيكانى تالداۋعا بىرنەشە اي ۋاقىت كەتەدى, تەك سودان كەيىن عانا بالالار مەن ەگدە تارتقان ازاماتتارعا ۆاكتسينا ەگۋ تۋرالى شەشىم قابىلدانادى», دەدى باس سانيتار.
وبلىستىق دەنساۋلىق ساقتاۋ باسقارماسى باسشىسىنىڭ م.ا. رۇستەم ايتباەۆتىڭ سوزىنشە, اقپان ايىندا تەك مەديتسينا قىزمەتكەرلەرىنە ەكپە جاساۋعا مۇمكىندىك بار. ويتكەنى دارىگەرلەر كۇندەلىكتى جۇمىستا ۆيرۋس تاسىمالداۋشىلارمەن كەزدەسۋى مۇمكىن. سوندىقتان ولاردى مەيلىنشە ساقتاندىرىپ, قاۋىپسىز جاعدايدا جۇمىس ىستەۋىن قامتاماسىز ەتكىمىز كەلەدى. ال كونتينگەنتتى كەڭەيتۋ ماسەلەسى مامىر ايىندا شەشىلەدى.
وبلىستىڭ باس سانيتارلىق دارىگەرى قىتايدان Pfizer ۆاكتسيناسىن الدىرتۋ جونىندە كەلىسىم ءجۇرىپ جاتقانىن ايتىپ قالدى.
