1-اقپاندا باستالعان ءىس-شارانىڭ العاشقى ەكى كۇنى ىشىندە 10 شەتەلدىك ازامات اكىمشىلىك جاۋاپكەرشىلىككە تارتىلدى. كوشى-قون پوليتسياسىنىڭ مالىمەتىنشە, ولاردىڭ كوبىنىڭ ەل اۋماعىندا جۇرۋگە رۇقسات بەرەتىن قۇجاتتارىنىڭ مەرزىمى ءوتىپ كەتكەن. ءتىپتى ءبىر جىلدان ارتىق رۇقساتسىز جۇرگەندەر دە بار. بۇلاردىڭ ەكەۋى رەسپۋبليكا اۋماعىنان شىعارىلدى.
سونىمەن قاتار, قازاقستان رەسپۋبليكاسىنا كەلگەنى تۋرالى دەر كەزىندە حابارلاماعان 19 ازامات اكىمشىلىك جازا ارقالادى.
ماسەلەن, جىتىقارا قالاسىندا 2019 جىلدىڭ 19-مامىرىنان بەرى زاڭسىز جۇمىس ىستەپ كەلگەن وزبەكستان ازاماتى انىقتالىپ, جۇمىسشى دا, جۇمىس بەرۋشى دە اكىمشىلىك جاۋاپكەرشىلىككە تارتىلدى. قازىر كوشى-قون قىزمەتى مەن «دامىتۋ» قوعامدىق قورى وزبەكستاندىق ازاماتتىڭ قۇقىقتىق مارتەبەسىن انىقتاپ جاتىر. ول تاياۋ كۇندەرى ءوز وتانىنا قايتارىلماق.
شەتەلدىكتەر وبلىسقا كوبىنە جۇمىسقا تۇرۋ نەمەسە وقۋ, ەمدەلۋ, ميسسيونەرلىك قىزمەتپەن اينالىسۋ ءۇشىن كەلەدى ەكەن. ولاردىڭ ىشىندە وسى جەردە وتباسىن قۇرىپ, تۇراقتاپ قالعىسى كەلەتىندەر دە بار. كوشى-قون قىزمەتى ماماندارىنىڭ ايتۋىنشا, وبلىس اۋماعىنا زاڭدى نەگىزدە كەلگەن ءاربىر شەتەل ازاماتىنىڭ قۇقىقتىق مارتەبەسىنىڭ رەتتەلۋىنە كومەك كورسەتىلەدى. ەڭ باستىسى, ازامات ءتيىستى ورىندارعا ءوزىنىڭ سىرتتان كەلگەنى تۋرالى دەر كەزىندە حابارلاۋى ءتيىس.
