ايەلدەر اراسىندا شتەففي گرافتىڭ الدىنا تۇسەتىن ەشكىم جوق. 1982-1999 جىلدار ارالىعىندا اتوي سالعان گەرمانيانىڭ مانگەيم قالاسىنىڭ تۋماسى «ۇلكەن دۋلىعا» تۋرنيرلەرىنىڭ بارلىعىندا باس جۇلدەنى ولجالادى. تارقاتىپ ايتساق, ۋيمبلدوندا – جەتى, رولان گارروستا – التى, اقش-تىڭ اشىق بىرىنشىلىگىندە – بەس جانە اۋستراليانىڭ اشىق بىرىنشىلىگىندە – ءتورت رەت توپ جاردى. بارلىعى 107 تۋرنيردە دارا شىقتى. گراف باقانداي 377 اپتا بويى WTA تىزىمىندە كوش باستادى. ياعني سول كەزدەرى جەر-جاھاندا نەمىس تەننيسشىسىمەن تەڭەسە الاتىن ويىنشىلار كەمدە-كەم ەدى. تىپتەن, شتەففيدىڭ باستى باسەكەلەستەرىنىڭ ءبىرى سانالعان يسپانيالىق ارانچا سانچەس-ۆيكاريونىڭ: «ونى ەندى ەشكىم توقتاتا المايدى. مەن جاراتۋشىدان ءبىر-اق نارسە سۇرايمىن – شتەففي تەزىرەك كۇيەۋگە شىعىپ, ۇلكەن سپورتتان قول ۇزسە ەكەن. ءبىزدىڭ باق جۇلدىزىمىز سوندا عانا جارقاراي جانادى», دەپ جىلارمان بولعانىنا ميلليونداعان جانكۇيەر كۋا. ءيا, بۇل – راس ءسوز. نەمىس تەننيسشىسى ءوز ءداۋىرىنىڭ ەڭ مىقتى ويىنشىلارىنىڭ بارلىعىن سىپىرا ۇتتى. وعان تەك مارتينا ناۆراتيلوۆا عانا لايىقتى قارسىلىق كورسەتە الدى. ەكى مىقتى 18 مارتە كەزدەسىپ, ارقايسىسى توعىز رەتتەن جەڭىسكە جەتكەن ەكەن.
كەزىندە شتەففي گرافتىڭ ءوزىن قايمىقتىرعان مارتينا ناۆراتيلوۆا جايىندا دا ۇزاق اڭگىمەلەۋگە بولادى. ول 332 اپتا بويى ەشكىمگە ەسە جىبەرگەن جوق. چەحوسلوۆاكيانىڭ استاناسى – پراگادا تۋىپ-وسكەن مارتينا كەيىننەن اقش-قا قونىس اۋداردى. سپورتتىق كارەراسىن 1975 جىلى باستاعان ول 2006 جىلى كورتپەن قوش ايتىستى. 30 جىلدان اسا ۋاقىت ارالىعىندا ناۆراتيلوۆا ۋيمبلدوندى – توعىز, اقش-تىڭ اشىق بىرىنشىلىگىن – ءتورت, اۋستراليانىڭ اشىق بىرىنشىلىگىن – ءۇش جانە رولان گارروستى ەكى رەت ۇتتى. بارلىعى 167 تۋرنيردە قارسىلاس شاق كەلتىرمەدى. امەريكالىق تەننيسشى 50 جاسقا كەلگەندە عانا ۇلكەن سپورتپەن قوش ايتىساتىنىن رەسمي تۇردە جاريا ەتتى.
قازىرگى كەزدە ورەلى ونەرىمەن كورەرمەندەردى قۋانتىپ جۇرگەن سەرەنا ۋيليامس 319 اپتا ەڭ بيىك تۇعىردان تۇسكەن جوق. كەزىندە ونىڭ دا تاڭداي قاعارلىقتاي تابىستارعا قول جەتكىزگەنى جانكۇيەرلەردىڭ جادىندا. جەكەلەگەن سايىستاردا اقش-تىڭ ميچيگان شتاتىنىڭ تۋماسى اۋستراليانىڭ اشىق بىرىنشىلىگى مەن ۋيمبلدوندا – جەتى رەتتەن, اقش-تىڭ اشىق بىرىنشىلىگىندە – التى جانە رولان گارروستا ءۇش رەت جەڭىمپاز اتاندى. بارلىعى – 23. سونىمەن قاتار سەرەنا ءوزىنىڭ تۋعان اپكەسى ۆينۋس ۋيليامسپەن بىرگە جۇپتىق باسەكەلەردە دە «ۇلكەن دۋلىعا» تۋرنيرلەرىنىڭ بارلىعىن ۇتتى. بۇل كۇندەرى جاسى 40-قا تاياپ قالعان امەريكالىق ويىنشى ءالى دە بابىندا دەۋگە بولادى.
حح عاسىردىڭ 1972-1989 جىلدار ارالىعىندا ونەر كورسەتكەن امەريكالىق كريس ەۆەرت 260 اپتا بويى الدىڭعى لەكتەن كورىنسە, شۆەيتساريالىق مارتينا حينگيس 209 اپتا شاشاسىنا شاڭ جۇقتىرمادى. ول ءوز مانسابىن 1994 جىلى باستاپ, 2017 جىلى اياقتادى. 1989-2008 جىلدارى كورتتى شايقاعان اقش-تىڭ تاعى ءبىر وكىلى مونيكا سەلەش 178 اپتا بيىك تۇعىردى بوساتقان جوق. ءبىر ايتا كەتەرلىگى, ناۆراتيلوۆا مەن سەلەش سوتسياليستىك جۇيەنى ۇستانعان مەملەكەتتەردە تۋىپ-ءوستى. ناقتىلاپ ايتساق, جوعارىدا اتاپ كورسەتكەنىمىزدەي, مارتينا چەحوسلوۆاكيادا تۋسا, مونيكا – يۋگوسلاۆيانىڭ تۋماسى. الايدا ناعىز كەمەلدەنگەن كەزدەرىندە ولار داۋلەتى تاسىعان وزگە ەلدىڭ – اقش-تىڭ تۋى استىندا ونەر كورسەتۋدى قۇپ كوردى.
ۇزدىكتەر تىزىمىندە جەتىنشى, سەگىزىنشى جانە توعىزىنشى ورىنداردى بەلگيالىق جيۋستين ەنەن (117 اپتا), امەريكالىق ليندسەي دەۆەنپورت (98 اپتا) جانە دانيالىق پولياك قىزى كارولينا ۆوزنياتسكي (71 اپتا) يەلەنۋدە. بۇل ويىنشىلار سپورتتىق كارەرالارىن اياقتاعان. ەندى ولاردىڭ ءوز كورسەتكىشتەرىن جاقسارتا المايتىنى انىق. ال ودان كەيىنگى ساتىلارعا جايعاسقان رۋمىنيالىق سيمونا حالەپ (64 اپتا), اۋستراليالىق ەشلي بارتي (57 اپتا), بەلارۋستىك ۆيكتوريا ازارەنكونىڭ (51 اپتا) جوعارىلاۋىنا تاماشا مۇمكىندىك بار. سەبەبى بۇلاردىڭ بارلىعى دا ءداپ قازىرگى كەزدە ورەلى ونەرلەرىمەن كوزگە تۇسۋدە. ماسەلەن, 24 جاستاعى بارتي بۇل كۇندەرى الەمدىك رەيتينگتە كوش باستاپ تۇر. 29 جاستاعى حالەپ ەكىنشى ورىندى ولجالاسا, 31 جاستاعى ازارەنكو 13-ساتىعا جايعاسقان.
سونداي-اق امەلي مورەسمو (فرانتسيا, 35 اپتا), انجەليكا كەربەر (گەرمانيا, 34 اپتا), دينارا سافينا (رەسەي, 26 اپتا), ناومي وساكا (جاپونيا, 25 اپتا), ترەيسي وستين (اقش, 21 اپتا), ماريا شاراپوۆا (رەسەي, 21 اپتا), كيم كلەيستەرس (بەلگيا, 20 اپتا), ەلەنا يۆانوۆيچ (سەربيا, 18 اپتا), دجەنيففەر كاپرياتي (اقش, 17 اپتا), انا يۆانوۆيچ (سەربيا, 12 اپتا), ارانچا سانچەس-ۆيكاريو (يسپانيا, 12 اپتا), ۆينۋس ۋيليامس (اقش, 11 اپتا), كارولينا پليشكوۆا (چەحيا, 8 اپتا), گاربينە مۋگۋرۋسا (يسپانيا, 4 اپتا) جانە يۆونن گۋلاگونگ-كوۋلي (اۋستراليا, 2 اپتا) سىندى سۇلۋلار ءار جىلدارى الەمنىڭ ءبىرىنشى راكەتكاسى اتاندى. ونداي باق نەبارى 27 تەننيسشىگە عانا بۇيىرعان ەكەن.
قازاقستاننىڭ تەننيسشىلەرى اراسىندا ەڭ ۇزدىك كورسەتكىشكە ەلەنا رىباكينا قول جەتكىزدى. بىلتىر اۋستراليانىڭ اشىق بىرىنشىلىگىندە ءۇشىنشى كەزەڭگە دەيىن جەتكەن جەرلەسىمىز الەمنىڭ 17-راكەتكاسى اتاندى. وزگە قىزدارىمىزدىڭ ەڭ ۇزدىك ناتيجەلەرى مىناداي: ياروسلاۆا شۆەدوۆا – 25 ورىن (2012 جىل), يۋليا پۋتينتسەۆا – 27 ورىن (2017 جىل), زارينا دياس – 31 ورىن (2015 جىل) جانە گالينا ۆوسكوبوەۆا – 42 ورىن (2012 جىل).
ال الەمدىك رەيتينگتە جوعارىلاۋىنا تاماشا مۇمكىندىك بەرىلەتىن «ۇلكەن دۋلىعا» ساناتىنداعى جارىستاردا ەڭ ءتاۋىر ناتيجە كورسەتكەن ويىنشىلار – شۆەدوۆا مەن پۋتينتسەۆا. ياروسلاۆا رولان گارروس (2010, 2012 جىلدارى) پەن ۋيمبلدوندا (2016 جىل) شيرەك فينالعا دەيىن جەتسە, يۋليا رولان گارروس (2016, 2018 جىلدارى) پەن اقش-تىڭ اشىق بىرىنشىلىگىندە (2020 جىل) ءدال سول مەجەدەن كورىندى. زارينا دياس بولسا, 2014 جانە 2015 جىلدارى ۋيمبلدوننىڭ ءتورتىنشى كەزەڭىندە كۇش سىناستى.
